რა დაჯდა მსოფლიოში ყველაზე ძვირადღირებული ქორწილი - თავლისმომჭრელი ფუფუნება და ვარსკვლავთცვენა
ექსტრავაგანტული წინასაქორწინო ზეიმებისა და წვეულებების შემდეგ, რომელიც შვიდი თვე გრძელდებოდა, ინდოეთის უმდიდრესი ოჯახის ვაჟი ანანტ ამბანი, მის რჩეულზე - რადჰიკა მერჩანტზე ბოლოს და ბოლოს დაქორწინდა.
ქორწილი მართლაც გრანდიოზული გამოვიდა. ისევე როგორ წინასაქორწილო წვეულებებს, ამ ცერემონიასაც ვარსკვლავები მსოფლიოს სხვადასხვა კუთხიდან ესწრებოდნენ. ცნობილია, რომ ამ 7 თვის განმავლობაში გამართულ საქორწინო ღონისძიებებში 300-დან 600 მილიონ დოლარამდე დაიხარჯა.
12 ივლისს კი გაიმართა დასკვნითი ცერემონია, რომელსაც მსოფლიოს უმდიდრესი ადამიანები, ჰოლივუდის ვარსკვლავები და გამორჩეული სტუმრები ესწრებოდნენ. ყველა მათგანმა ამაში საოცარი ანაზღაურება მიიღო.
ცერემონიაზე, პატარძალი კრემისფერ-წითელ ინდურ საქორწინო კაბაში იყო გამოწყობილი. უძვირფასესი სამკაულებითა და მძივებიანი თავსაბურავით იყო შემკული. ბედნიერი სიძე წითელმძივებიან პიჯაკში - ე.წ. ნეჰრუშში გამოჩნდა. წყვილმა ტრადიციულ ინდურ ცერემონიაზე, მუმბაიში მდებარე, ამბანების საკუთრებაში არსებულ, 16 000 ადგილიან Jio World Convention Center-ში იქორწინა.
- ვარსკვლავებით სავსე საქორწინო ზეიმის წინ, პოლიციამ მიმდებარე ქუჩები გადაკეტა.
ექსტრავაგანტულ პიჯაკთან ერთად, ანანტს თეთრი შარვალი და მოოქროვილი სპორტული ფეხსაცმელი ეცვა. დღის დასაწყისში ის თავის ამაყ მშობლებთან: Reliance Industries-ის დირექტორთან, მუკეშ ამბანისთან და Reliance Foundation-ის თავმჯდომარესთან ნიტა ამბანისთან ერთად პოზირებდა.
ამბანის ოჯახი და ბოლივუდის ვარსკვლავები პირველი სტუმრები იყვნენ, რომლებიც ვარდისფერ ხალიჩაზე გამოჩნდნენ.
A - კლასის სტუმრებს შორის, რომლებიც სპეციალურად ქორწილზე დასასწრებად მუმბაიში ჩაფრინდნენ, იყვნენ კიმ და ქლოი კარდაშიანები, ჯონ სენა და ბრიტანეთის ყოფილი პრემიერ-მინისტრი, ტონი ბლერი. პრესტიჟულ ქორწილზე პრიანკა ჩოპრა და მისი მეუღლე, ნიკ ჯონასიც გამოჩნდნენ.
41 წლის ჩოპრას, რომელიც ინდოეთში დაიბადა, გლამურული ნარინჯისფერი ბიუსტჰალტერი და შესაბამისი ქვედაბოლო ეცვა. მოციმციმე ყელსაბამი და სამაჯურები ეკეთა.
31 წლის ნიკ ჯონასი კი მომხიბვლელად გამოიყურებოდა ვარდისფერ მბრწყინავ ნეჰრუშში.
კიმ კარდაშიანს თვალისმომჭრელი რუბინის წითელი კოსტიუმი ეცვა, მანამდე კი 43 წლის ინფლუენსერი დასთან, ქლოისთან ერთად გამოჩნდა და თეთრში იყო შემოსილი.
რაც შეეხება ჯონ სენას, მას ცისფერი პიჯაკი ეცვა ნაცრისფერი ყვავილოვანი პრინტითა და ვერცხლისფერი ღილებით. სენამ პიჯაკი თეთრ შარვალს და ყავისფერ ტყავის მოკასინებს შეუხამა.
ქორწილში FIFA-ს პრეზიდენტი ჯანი ინფანტინო და მისი მეუღლე ლინა ალ აშქარიც იმყოფებოდნენ. იტალიურ-შვეიცარიელი ფეხბურთის ადმინისტრატორი მთლიანად შავებში იყო შემოსილი, ხოლო მისი ლიბანელი მეუღლე სარიში გლამურულად გამოიყურებოდა.
ქორწილი სავარაუდოდ, ერთ-ერთი ყველაზე ძვირადღირებული საზეიმო ღონისძიება უნდა იყოს, რაც კი ოდესმე გადახდილა. მოსალოდნელია, რომ წყვილი 100 მილიონ ფუნტზე მეტი ღირებულების საჩუქრებს მიიღებს.
- მუშაკებმა ინდოეთის JIO World Convention ცენტრში დილით დაიწყეს მზადება, მათ შორის, ექსტრავაგანტული წითელი ხალიჩისა და ძვირფასი დეკორის მოწყობა. ტერიტორია მდიდრულ ვერცხლისფერ პანელებს, კრემისფერ კედლებს, შთამბეჭდავ სანთლების კომპოზიციებს და ყვავილების თაიგულებს დაეთმო.
უსაფრთხოება ამ ღონისძიების მთავარი ხაზი იყო. ილუზიონისტმა და Britain's Got Talent-ის კონკურსანტმა ლუის ფულერმა FEMAIL-თან საკუთარ გამოცდილებაზე ისაუბრა. მან 2019 წელს აკაშ ამბანის ქორწილზე გამოსვლა გაიხსენა.
"ღონისძიებებზე უსაფრთხოების თანმხლები პირი მახლდა, ის მუდმივად ჩემთან იყო, სააბაზანომდეც კი მაცილებდა და გარეთ მელოდებოდა," - აღნიშნა მან, - "ყველაფერი უზარმაზარი და თვალისმომჭრელად ლამაზი იყო, თითქოს სხვა სამყაროში აღმოვჩნდი. როდესაც ჩავედი, მრავალი უსაფრთხოების პროცედურა გავიარეთ და შევნიშნე, რომ სახლის გარეთ შეიარაღებული დაცვა იდგა. სტუმრებისა და შემსრულებლების უმეტესობას არ ჰქონდა უფლება, თან ჰქონოდათ მობილური ტელეფონები, მაგრამ მე ჩემს ტელეფონს ზოგიერთ ჯადოსნურ ნომერში ვიყენებ, ასე რომ, ერთ-ერთი ვიყავი იმ მცირერიცხოვან ადამიანთაგან, ვისაც ტელეფონის დატოვების უფლება მისცეს."
პომპეზური ღონისძიება სამი დღის განმავლობაში გაგრძელდა. სტუმართა სიაში იყვნენ Meta-ს დამფუძნებელი მარკ ცუკერბერგი, ივანკა ტრამპი, ბილ გეითსი; დევიდ და ვიქტორია ბექჰემები და სხვა ინდუსტრიის ტიტანები; ასევე, ბოლივუდის ვარსკვლავები, პოპ-ვარსკვლავები და წამყვანი პოლიტიკოსები.
წინასაქორწინო წვეულებაზე, რომელსაც “სანგიტი” ეწოდება, ჯასტინ ბიბერმა იმღერა და მას სავარაუდოდ, 7 მილიონი ფუნტი გადაუხადეს.
რაც შეეხება საჩუქრებს, 67 წლის ამბანიმ, რომელიც Forbes-მა მსოფლიოს მეცხრე უმდიდრეს ადამიანად დაასახელა 100 მილიარდი ფუნტის ქონებით, წყვილს უკვე 62-მილიონი ფუნტის ღირებულების ფეშენებელური ვილა აჩუქა დუბაიში. უძრავი ქონება 3,000 კვადრატულ ფუტზეა გადაჭიმული, ათი საძინებელი და საკუთარი კერძო პლაჟი აქვს.
წყვილს ასევე აჩუქეს 500,000 ფუნტის ღირებულების Bentley Continental GTC Speed და ინდივიდუალურად დამზადებული სამკაულებისა და ტანსაცმლის თვალისმომჭრელი ნაკრები, რომელთა ღირებულება მილიონობით ფუნტია.
ამბანის მეუღლემ, 60 წლის ნიტამ რძალს შთამბეჭდავი მარგალიტისა და ბრილიანტის ყელსაბამი აჩუქა, რომლის ღირებულება, დაახლოებით, 10 მილიონი ფუნტია. ყელსაბამი მხოლოდ ერთ-ერთია რძლისთვის ინდივიდუალურად დამზადებული ათეულობით უძვირფასესი ნივთიდან. ანანტს კი დედამ 2 მილიონი ფუნტის ღირებულების Cartier-ის ბროში აჩუქა.
სავარაუდოდ, ამბანებმა, მსოფლიოს სხვადასხვა კუთხიდან თავიანთი სტუმრების ინდოეთში ჩამოსაყვანად 100 კერძო თვითმფრინავი დაიქირავეს. მათთვის მუმბაის ყველა ხუთვარსკვლავიანი სასტუმრო დაჯავშნეს.
ინსაიდერების შეფასებით, ქორწილის ყველა ასპექტის გათვალისწინებით, ჯამური ხარჯები შესაძლოა, 500 მილიონ ფუნტს უახლოვდებოდეს.
აღსანიშნავია, რომ მარტში, სამდღიან წინასაქორწინო წვეულებებზე, რიანა იყო მიწვეული. მას 90-წუთიანი გამოსვლისთვის სავარაუდოდ, 5 მილიონი ფუნტი გადაუხადეს.
მიმდინარე კვირის ზეიმების მზადებისთვის ამბანიმ 800 სტუმრისთვის ფეშენებელური საკრუიზო ხომალდი - Celebrity Ascent დაიქირავა. სტუმრებმა კრუიზზე ისეთი ვარსკვლავების გამოსვლებით ისიამოვნეს, როგორებიც არიან ქეითი პერი, პიტბული და Backstreet Boys.
ქორწილის ერთ-ერთი მთავარი მომენტი კი ოქროს ბადეში გახვეული როლს-როისის გამოჩენა იყო - როდესაც ანანტ ამბანის საქორწილო მანქანის სურათები ინტერნეტში გავრცელდა, ყურადღებას იქცევდა არა მხოლოდ როლს-როისის ბრენდი, არამედ მისი უნიკალური მორთულობა.
ინდოეთში საქორწილო მანქანების ყვავილებით მორთვა ჩვეულებრივი ამბავია. თუმცა, ეს მანქანა თავისი განსხვავებული “აღჭურვილობით” გამოირჩეოდა. მას მართლაც ჰქონდა გარკვეული ყვავილოვანი დეკორაციები, მაგრამ ყურადღების ცენტრში ოქროსფერ ტონში გადაწყვეტილი წითელმოსართავიანი ბადისებრი საფარი მოექცა, რომელიც მთელ ავტომობილზე იყო გადაფარებული. ზოგიერთმა ივარაუდა, რომ დეკორაციები შესაძლოა, ნამდვილი ოქროსგან იყოს დამზადებული.
ცნობისთვის, რადჰიკა ინდოელი ფარმაცევტული მაგნატის, ვირენ მერჩანტის ქალიშვილია და მის კომპანიაში მუშაობს, ხოლო ანანტი - მამამისის კომპანიაში. ორივე აშშ-ს უნივერსიტეტებში სწავლობდა და ერთმანეთი საერთო მეგობრების მეშვეობით, 2017 წელს გაიცნეს, რის შემდეგაც მალევე დაიწყეს შეხვედრა.
წყარო: Daily Mail, MSN