სტიქია კახეთში: მოგლეჯილია ხეები და ელექტროგადამცემი ბოძები, დაზიანებულია სახლების სახურავები - რომელი რეგიონი დაზარალდა?
ძლიერმა ქარმა ლაგოდეხის მუნიციპალიტეტი დააზარალა. მოგლეჯილია ხეები და ელექტროგადამცემი ბოძები, რის გამოც საავტომობილო მოძრაობა შეფერხებული იყო.
- უამინდობის გამო, რომელიც დაახლოებით 5 წუთს გრძელდებოდა, სოფელ მაწიმში რამდენიმე სახლის სახურავი დაზიანდა. ადგილზე უკვე იმუშავეს საგანგებო სიტუაციების მართვის და სხვა შესაბამისი სამსახურის თანამშრომლებმა.
ადგილობრივი ხელისუფლების წარმომადგენლები აცხადებენ, რომ ზარალის შესახებ ამ ეტაპზე, ინფორმაცია არ აქვთ. ხეებისგან ჩახერგილი გზები კი უკვე გაიწმინდა.
ამ დროისთვის, სოფლის ნაწილს ელექტროენერგია არ მიეწოდება.
რა განცხადებას ავრცელებს ლაგოდეხის მუნიციპალიტეტის მერია?
"ძლიერმა ქარმა, ლაგოდეხის მუნიციპალიტეტის, სოფელი მაწიმი დააზარალა. დაზიანებულია ელსადენების გადამცემი ბოძები, მოგლეჯილია ხეები.
ლაგოდეხის მერის, ჯონდო მდივნიშვილის ინფორმაციით, სტიქიის ზონაში, მუნიციპალიტეტის შესაბამისი სამსახურები, საგანგებო სიტუაციების მართვის სამსახურის წარმომადგენლებთან ერთად, პირველად სამუშაოებს ახორციელებენ. მიმდინარეობს ჩახერგილი გზების გაწმენდითი სამუშაოები".