ოჩამჩირე, როგორც რუსული ფლოტის ბაზა - საქართველოს ოკუპირებულ რეგიონში რუსეთის საზღვაო ძალების ხომალდი დააფიქსირეს: რას წერს მედია
- როგორც გამოცემა Naval News იტყობინება, რუსეთის სამხედრო-საზღვაო ფლოტის გემი ოკუპირებულ აფხაზეთში, ოჩამჩირეში შენიშნეს. გამოცემა წერს, რომ შავი ზღვის პორტი შეიძლება გახდეს მნიშვნელოვანი ბაზა რუსეთის სამხედრო-საზღვაო ფლოტისთვის და გახდეს უსაფრთხო თავშესაფარი უკრაინული დრონებისგან. თუმცა, ეს ოფიციალურად საქართველოს ტერიტორიაა, რაც ამ ნაბიჯს პოლიტიკურად თამამს და ჩახლართულს ხდის.
რუსეთის სამხედრო-საზღვაო ფლოტის გემი, რომელიც ჩვეულებრივ ნოვოროსიისკშია დაბანაკებული, ოჩამჩირის პორტში, საქართველოში დაბანაკდა. პორტი აფხაზეთის რეგიონში მდებარეობს, რომელსაც რუსეთი აკონტროლებს. ადგილობრივმა რუსეთისგან მხარდაჭერილმა ე.წ. ხელისუფლებამ განაცხადა, რომ რუსეთის სამხედრო-საზღვაო ფლოტი პორტში მუდმივ ბაზას დააარსებდა.
ბაზაში უკვე განთავსებულია რამდენიმე მცირე ზომის FSB-ს (რუსეთის ფედერალური უსაფრთხოების სამსახურის) საპატრულო კატარღა. ეს პირველი მნიშვნელოვანი სამხედრო-საზღვაო გემის ვიზიტია ამ მხარეში.
"ნაბიჯი საკამათოა, რადგან პორტი საქართველოშია, რაც გულისხმობს საქართველოს ჩათრევას რუსეთ-უკრაინის ომში. რუსეთმა შეიძლება სცადოს პორტის გამოყენება თავდასხმებისგან თავშესაფრად, მათ შეიძლება გამოიყენონ ის, როგორც უსაფრთხო ბაზა საბრძოლო მისიების განსახორციელებლად. უკრაინის ვარიანტები კი გართულდება, რადგან ის საქართველოს ტერიტორიაზე მდებარეობს, მიუხედავად იმისა, რომ სეპარატისტული აფხაზეთის მიერ კონტროლდება". - წერს Naval News.
- გამოცემის ცნობით, გემი პროექტ 22870-ის დამხმარე გემია. ის 28 ივნისს, თავის “მშობლიურ” პორტში, ნოვოროსიისკში შენიშნეს. შემდეგ, 1 ივლისს "გაქრა" და ოჩამჩირეში 4 და 5 ივლისს გამოჩნდა.
3 ივლისს უკრაინის მთავარი სადაზვერვო სამმართველო (GUR) ნოვოროსიისკს თავს დაესხა. მათმა Magura უპილოტო ზედაპირულმა ხომალდებმა (USV) იმ ნავმისადგომს დაარტყეს, სადაც ჩვეულებრივ, გემი დგას ხოლმე. ერთი ჰიპოთეზა, შესაბამისად, არის ის, რომ გემი ზღვაში იყო და თავდასხმისგან თავშესაფარი ოჩამჩირეში მოძებნა.
2022 წელს რუსეთის ფლოტი შავ ზღვაზე დომინირებდა. მისი მთავარი ბაზა სევასტოპოლი იყო. მას შემდეგ მნიშვნელოვანი რაოდენობის სამხედრო გემი დაკარგა. სევასტოპოლი შედარებით დაუცველია USV-ების, ნაღმების, საჰაერო დრონებისა და რაკეტების მიმართ. შესაბამისად, მაღალი ღირებულების საზღვაო აქტივების უმეტესობა აღმოსავლეთით ნოვოროსიისკში გადაიტანეს. ისინი აქაც საფრთხის ქვეშ არიან. ამრიგად, ოჩამჩირემ შეიძლება, რუსეთს უკრაინული ძალებისგან "პოლიტიკურად ჩახლართული" თავშესაფარი შესთავაზოს.
რა მიზეზიც არ უნდა იყოს, გემი შავი ზღვის ფლოტში აქტიურია და რუსეთ-უკრაინის ომში მონაწილეობს.
მიუხედავად იმისა, რომ პორტი შედარებით პატარაა, მას მარტივად შეუძლია, რამდენიმე დიდ სამხედრო გემს უმასპინძლოს. ეს შეიძლება მოიცავდეს სადესანტო გემებს ან ფრეგატებს. უფრო დიდი გემები შეიძლება ნაპირზე კიჩოთი მიაბან, როგორც აღნიშნული გემის შემთხვევაში, რათა ნავმისადგომების რაოდენობა გაიზარდოს. აქ საბჭოთა პერიოდში წყალქვეშა ნავები იყო ბაზირებული.
- მნიშვნელოვანი საზღვაო აქტივი შავ ზღვაში
მიუხედავად იმისა, რომ პროექტ 22870-ის გემებს სამაშველო ბუქსირებს უწოდებენ, ისინი შეიძლება ზოგადი დანიშნულების გემებად ჩაითვალოს. ისინი ხშირად ახლავს საბრძოლო გემებს და ცნობილია, რომ მიმდინარე ომის დროს სარაკეტო სისტემებს ატარებენ. ეს "ვასილი ბეხის" (SB-739) მსგავსი გემია, რომელიც უკრაინულმა გემსაწინააღმდეგო რაკეტებმა ზმეინთან (გველის კუნძულთან) ახლოს, 2022 წლის 17 ივნისს ჩაძირეს. იმ დროს "ვასილი ბეხი" SA-15 Gauntlet ('Tor') საჰაერო თავდაცვის სარაკეტო სისტემით იყო აღჭურვილი.
ოჩამჩირეში მყოფ გემს, როგორც ჩანს, გემბანზე სატრანსპორტო საშუალება ან კონტეინერი აქვს, რაც SA-22 Greyhound ('Pantsir') რაკეტებს შეესაბამება. თუმცა, Naval News-მა ამ ობიექტის იდენტიფიცირება ვერ შეძლო.
შავ ზღვაში სამი: SB-742, “პროფესორი ნიკოლაი მურუ” და “კაპიტანი გურიევია” აქტიური. მეოთხე, “ვასილი ბეხი” (SB-739) უკრაინამ 2022 წელს ჩაძირა. Naval News-ს ინფორმაცია არ აქვს, მათ შორის რომელია ოჩამჩირეში.
ჯერ კიდევ უცნობია, გაჰყვება თუ არა აღნიშნულ გემს რუსეთის სამხედრო-საზღვაო ფლოტის მეტი გემი. შესაძლოა, ამაზე საქართველოს მთავრობისა და საერთაშორისო საზოგადოების რეაქციას ჰქონდეს გარკვეული გავლენა - წერს გამოცემა.