“მას შემდეგ ქართულად წერა დავიწყე, მოწონება რაკეტის სიჩქარით გაფრინდა; გიორგი ჩვენთან ძალიან ახალგაზრდა მოვიდა, თავმდაბალი, ქარიზმატული იყო“ - ვრცელი ინტერვიუ Levante UD- ის ადმინთან
მას შემდეგ, რაც საქართველომ საბერძნეთთან ევრო 2024-ის საკვალიფიკაციო მატჩი მოიგო და ევროპის კონტინენტის სხვადასხვა ცნობილ გუნდებს შორის, ჩემპიონისთვის ბრძოლაში ჩაერთო, ქართველი ფეხბურთელების მიმართ ყურადღება გაასმაგდა. სოციალურ ქსელში სხვადასხვა მხარდამჭერი პოსტერები, სტატუსები და ვიდეოები გამოჩნდა, სადაც უცხო კლუბებში მოთამაშე საქართველოს ეროვნული საფეხბურთო ნაკრების წევრებს ამხნევებდნენ და გამარჯვებას უსურვებდნენ.
მათ შორის ერთ-ერთი პირველი და გამორჩეული იყო Levante UD. მათ ფეისბუქ-გვერდზე გამოჩნდა ქართული მიმართვა გიორგი ქოჩორაშვილისადმი და როგორც გვერდის ადმინი “ფორმულასთან“ ინტერვიუში ამბობს, “მას შემდეგ, რაც შოთა [არველაძეზე] პოსტი დადეს და ქართულად წერა დაიწყეს, პოსტების მოწონება რაკეტის სიჩქარით გაფრინდა“.
- ხავი დე ლა ოსასმა “ფორმულას“ ვრცელი ინტერვიუ მისცა.
“რა საკვირველია ვხვდებით, რომ ჩვენც პოპულარულები გავხდით საქართველოში ამ პოსტებით. გვესმის რატომ მოჰყვა ამხელა გამოხმაურება მათ ქართულ ენაზეც. აუცილებლად უნდა გითხრათ, თუ როგორ ვამაყობთ გიორგით და იმ დონით, რომლითაც მან ითამაშა ევროპის ჩემპიონატზე. ჩვენთვის უდიდესი სიამოვნება იყო იმის ნახვა, თუ როგორ წარმოაჩინა მან თავიც და ქვეყანაც. საქართველომ ამ ჩემპიონატზე ისტორია დაწერა.
მივხვდით, რომ ქართულად წერა ჩვენს პოტენციურ აუდიტორიას გაზრდიდა და ჩავეჭიდეთ ამ შესაძლებლობას. თუმცა, ეს ჩვენი პირადი სიამაყის საკითხიცაა, როდესაც ჩვენი კლუბის წევრი ამხელა წარმატებას აღწევს ევროპაზე და ნაკრების ტრიუმფის ერთ-ერთი შემქმნელია.
გვაინტერესებდა ქართველი გულშემატკივარიც, რომელიც მანამდე შესაძლოა ჩვენი გულშემატკივარი არ იყო. მაგრამ შესაძლებელი გახდა ახლოდან გავეცანით მათ და ჩვენს მხარეს გადმოსულიყვნენ. ამიტომ აუცილებლობად ჩავთვალეთ მესიჯები გაგვეგზავნა ორივე მიმართულებით. როგორც გიორგის მხარდაჭერის თვალსაზრისით, ისე გუნდის უკეთ წარმოჩენისთვის. ქოჩორაშვილმა ძალიან დიდი საქმე გააკეთა ჩვენი კლუბის მეტად წარმოჩენისთვის. როგორც ესპანეთში, ისე საერთაშორისო დონეზე“
- ხავი დე ლა ოსასმა ქართულ ენაზე დაწერილი პირველი პოსტი გაიხსენა. თუმცა, როგორც აღმოჩნდა, მისთვის ყველაზე დასამახსოვრებელი ქოჩორაშვილისა და შოთა არველაძის შესახებ დადებული ფოტოა.
“რაც უფრო იზრდებოდა საქართველოს ნაკრების თამაშის ხარისხი ევროპის ჩემპიონატზე და გიორგის პოპულარობა, ვატყობდით რომ პოსტების პოპულარობა და აუცილებლობაც იზრდებოდა. საქართველოს ნაკრებმა პირველივე მატჩიდან ძალიან კარგად ითამაშა. თურქეთთან მოგებას იმსახურებდით, ჩეხეთთან მოგებამდე სულ ცოტა დაგაკლდათ - ყველაზე მეტი მოწონება მემგონი ჩეხეთთან მატჩის წინ დადებულ პოსტს ჰქონდა, მაგრამ მე დამამახსოვრდა პოსტი, სადაც გიორგის და შოთა არველაძის ფოტო დავდე, ვიცი რომ შოთა ძალიან საყვარელი და მნიშვნელოვანი ფეხბურთელია საქართველოში. მას შემდეგ რაც ეს პოსტი დავდე და ქართულად წერა დავიწყე, მოწონება რაკეტის სიჩქარით გაფრინდა“
- როგორ არჩევთ რა ფრაზა დაწეროთ ქართულად, თუ ვინმე გეხმარებათ?
- ყველას ჩვენი საიდუმლო გვაქვს, ყველაფერს ვერ გაგიმხელთ. ერთ-ერთი მნიშვნელოვანი დამხმარე გიორგი ქოჩორაშვილია. მაგრამ რა საკვირველია სხვადასხვა აპლიკაციებსაც ვიყენებთ...
გიორგი ჩვენთან ძალიან ახალგაზრდა 18-19 წლის მოვიდა. იმდენად კარგი ხასიათი გამოავლინა, იმდენად მნიშვნელოვანი თვისებების მქონე ადამიანი იყო... ძალიან თავმდაბალი, ქარიზმატული, მაშინვე პოპულარული გახდა გულშემატკივრებს შორის. მისი პოპულარობა მაშინ გაიზარდა, როდესაც ლევანტეს გუნდში გადმოვიდა.
“კარგ გიორგის“ რაც შეეხება, ეს ჩვენი შიდა ხუმრობაა. “ლევანტეც“ ვალენსიას გუნდია, აქ მეორე მნიშვნელოვანი კლუბია „ვალენსია“, რომელთანაც დიდი კონკურენცია გვაქვს. იქ გიორგი მამარდაშვილი თამაშობს, რომელიც გასაოცარი მეკარეა. უბრალოდ საუკეთესოა და ასე ერთმანეთს ვეხუმრეთ. ვხედავთ, რომ საქართველოს ნაკრებში ბევრი გიორგი თამაშობს და ეს ხუმრობა იმაში მდგომარეობდა რომ „კარგი გიორგი“, ანუ უკეთესი გიორგი ჩვენ გვყავს“ - აცხადებს “ლევანტეს“ ფეისბუქ ადმინი
“მგონი აქაურებიც მიხვდებოდნენ, რომ გიორგის სიყვარულით იყო გამოწვეული ეს ყველაფერი. მისი პიროვნული პატივისცემით. ფეისბუქზე არა, მაგრამ სხვა სოციალურ ქსელში რამდენიმე გულშემატკივარმა გვისაყვედურა, რომ უფრო კორექტული იქნებოდა საქართველოს ნაცვლად, ესპანეთის მხარი დაგვეჭირა იმ მომენტში.
საქართველოს 5-6 ძალიან მაღალი დონის ფეხბურთელი ჰყავს, მაგრამ ჩვენთვის “ქოჩო“ საუკეთესოა. იმისაც ვხედავდით, რომ საქართველოს ნაკრები არის გუნდი, რომელიც თავს გაწირავს სამშობლოსთვის, ქვეყნის დროშისა და ფარისთვის. თუმცა, რა საკვირველია, საქართველო-ესპანეთის თამაშზე ინდივიდუალურად გიორგის ვგულშემატკივრობდით და არა მის ნაკრებს ჩვენ წინააღმდეგ. ოღონდ, მინდა იცოდეთ, რომ მხოლოდ ამ მატჩზე იყო ასე. “ლევანტისტების“ სრული შემადგენლობა ყოველთვის, ყველა თამაშზე იყო საქართველოს თავგადაკლული გულშემატკივარი. გადაჭრით თქვენს მხარეს ვიყავით თურქეთთან, ჩეხეთთან, პორტუგალიასთან თამაშებზე“ - ხავი დე ლა ოსას თქმით, მას ქართული ენის შესწავლა სურს.
“გიორგისთან უნდა ვიარო კერძო გაკვეთილებზე. მინდა მასწავლოს გამარჯობა, ნახვამდის. ძალიან მომწონს რომ ქართული ჟღერადობა ჩვენს ფონეტიკასთან ახლოს არის. მასტერკლასები გვექნება ქართულში და იმედია დიდხანს გასტანს ეს კურსი. იმიტომ, რომ ეს იმას ნიშნავს, რომ გიორგი ჩვენთან კიდევ დიდხანს დარჩება. მოგიწოდებთ ყურადღებით იყოთ ჩვენს გვერდზე, გიორგისთან დაკავშირებით სიახლე, ძალიან მალე იქნება.“
ასევე იხილეთ:
- "მადლობა ყველას, ვისაც ჩვენი სჯეროდა" - რას წერენ სოციალურ ქსელში "კვარა", "მამარდა" და ზურიკო?
- "დაუვიწყარი თავგადასავალი გერმანიაში დასრულებულია... არასდროს დავიღლები იმის თქმით, რომ მსოფლიოში საუკეთესო გულშემატკივარი გვყავს" - რას წერს ქოჩორაშვილი?