"გიორგის ირანში ფანების არმია ჰყავს... როცა გავიცანი, ფეხბურთელი სანაცნობო წრეშიც არავინ მყავდა" - ცნობილი ფეხბურთელისა და ბიზნესვუმენის "ლავსთორი": ინტერვიუ გველესიანის მეუღლესთან
საქართველოს ეროვნული ნაკრების წარმატებაზე საუბარი დღეს არავის ჰბეზრდება. ქართული თუ უცხოური მედია გადაჭრელებულია ნაკრების ფეხბურთელებზე ინფორმაციებით. ამჯერად საქართველოს ნაკრების ერთ-ერთ წევრზე, გიორგი გველესიანზე ვისაუბრებთ.
ირანული საფეხბურთო კლუბის "პერსეპოლისის" წარმატებული ქართველი ფეხბურთელი საქართველოს ნაკრებში პირველად რამდენიმე თვის წინ გამოიძახეს. გველესიანს ოცნება 32 წლის ასაკში აუხდა.
"ძალიან გახარებული ვარ. ის ემოცია, რომელიც საკუთარი ქვეყნის მაისურით თამაშს, ქომაგების გამხნევებას, ჰიმნის მოსმენას მოაქვს, სხვა ემოციებთან დაუვიწყარი და შეუდარებელია. ამ მომენტს მთელი ჩემი კარიერის განმავლობაში ველოდებოდი. იმ 7 წლის განმავლობაში, რომელიც სხვა ქვეყანაში გავატარე, იქაური ხალხის დიდი სიყვარული და პატივისცემა მოვიპოვე, რომელიც ასევე ძალიან სასიამოვნოა, თუმცა როცა ამას საკუთარ ქვეყანაში საკუთარ ხალხთან აღწევ, ნამდვილად სხვა გრძნობაა" - აღნიშნავს გიორგი გველესიანი ერთ ერთ ინტერვიუში.
ხოლო თუ როგორია მეუღლის თვალით დანახული ეს წარმატებული ფეხბურთელი, ამის გასაგებად, AMBEBI.GE მის ასევე წარმატებულ მეუღლეს ლინდა კიკოლაშვილს გერმანიაში დაუკავშირდა:
- პორტუგალიასთან თამაშის შემდეგ ბიჭები ვნახეთ და ზუსტად იგივე განწყობაზე არიან, როგორც 26-ში. მიუხედავად იმისა, რომ ურთულესი თამაში იქნება, თავისას შეეცდებიან... ჩვენი გუნდი პირველად აღმოჩნდა იქ, სადაც ვართ და ისეთები გავაკეთეთ, მთელი პრესა, ფეხბურთის სპეციალისტები შოკში არიან. ზოგადად ემოციურია ჩვენი აქ, "ევროზე" ყოფნა... მესამე თამაში პორტუგალიასთან გადამწყვეტი იყო და მხოლოდ მოგების მოლოდინი გვქონდა. გასაოცარი სანახავი აღმოჩნდა სტადიონი, რომელიც ჩვენი გულშემატკივრებით იყო სავსე. საოცარი ემოცია მოდიოდა. პირველივე წუთებზე გამოჩნდა ჩვენი პოზიციები, რაც "კვარას" გოლითაც დადასტურდა. რამაც დამატებით დიდი სტიმული მოგვცა. ამ თამაშში თითოეულმა ფეხბურთელმა კარგი მატჩისთვის ყველაფერი გააკეთა. კარგ იყო დაცვა, "მამარდა", შეტევა, - ყველა თავის პოზიციაზე თავდაუზოგავად მუშაობდა.
- შემდეგ თამაშზე, ესპანეთთან როგორი მოლოდინი გაქვთ?
- ვიცით, რომ მომდევნო მატჩი კიდევ უფრო რთულ მეტოქესთან გვაქვს, მაგრამ იმდენად დიდი შემართებაა ბიჭებში, ასევე მათ მეუღლეებში, რა გითხრათ. ყველანი აქ ვართ, ძალიან ვგულშემატკივრობთ და წარმატების გვჯერა. ჩვენთვის გვაქვს დადებითი პროგნოზები გაკეთებული, თუმცა თამაში როგორც არ უნდა დასრულდეს, თითოეული ფეხბურთელი გმირი იქნება, რადგან უკვე შეუძლებელი შეძლეს.
- როგორც მითხარით, ჩემს მეუღლესთან რონალდუს ნათამაშევი აქვსო. რა პერიოდში და სად მოხდა მათი შეხვედრა?
- მათი შეხვედრა ირანში მოხდა. ერთობლივი თამაში ჩაატარეს. გიორგი, მოგეხსენებათ, ცნობილ ირანულ გუნდში თამაშობს, გუნდი "პერსეპოლისი“ ჩემპიონია. ისე, როგორც პორტუგალიასთან იყო, მაშინაც რონაალდუს ფეხი არ გადაადგმევინა, ზუსტად ასეთივე შედეგით დაასრულა პირველი მატჩი და შეხვედრა მასთან. პორტუგალიასთან თამაში ჩემი მეუღლისთვის სადებიუტო იყო იმ კუთხით, რომ წინა თამაშზე შეცვლაზე შემოვიდა. კარგად გვესმოდა, რამდენად მნიშვნელოვანი მატჩი იყო. მე კმაყოფილი ვარ, თვითონაც იმიტომ, რომ ძალიან ძლიერი და საჩვენებელი შეხვედრა ჩაატარა.
- მეტყველი, მოაზროვნე, ინტელიგენტი, თავმდაბალი, გაწონასწორებული, მშვიდი ადამიანი - რამდენიმე დღეა, სწორედ ეს სიტყვები გაისმის თქვენი მეუღლის მისამართით...
- ნამდვილად ასეა. უხერხულია ჩემი მხრიდან მისი ქება, თუმცა გიორგის აქვს უნარი, საკუთარი აზრი გაწონასწორებულად, კორექტულად, მშვიდად ჩამოაყალიბოს. მისი განათლება თვალში საცემია. მასთან ამის გამოც მსიამოვნებს კომუნიკაცია. ეს იყო ის ერთ-ერთი ფაქტორი, რაც მასში თავიდანვე შევნიშნე და მომეწონა. ხშირად გვაქვს დიალოგი სხვადასხვა თემაზე - ნებისმიერ საკითხზე შეუძლია გესაუბროს.
- როდის დაიწყო მისი ირანული საფეხბურთო კარიერა?
- რვა წლის წინ მოხდა ეს ამბავი. თავიდან სხვადასხვა გუნდში თამაშობდა. 2 წელია, ყველაზე პრესტიჟულ გუნდში „პერსეპოლისში“ თამაშობს. გუნდს 60 მილიონი ფანი ჰყავს. ზოგადად ირანში ფეხბურთს დიდ პატივს სცემენ, შესაბამისად ის მათთვის ერთ-ერთი გასართობი სფეროა. ფეხბურთს უყურებს ყველა - ქალი, ბავშვი, კაცი, ერთნაირი ქომაგები არიან. ბოლო რამდენიმე წელიწადია, სტადიონზე ქალები დაუშვეს, ოღონდ, მატჩს ცალკე გამოყოფილ სივრცეში უყურებენ, მამაკაცები - ცალკე. მანამდე ქალბატონებს საერთოდ აკრძალული ჰქონდათ სტადიონზე მიბრძანება და თამაშზე დასწრება.
- რამდენად კომფორტულია გიორგის დონის ადამიანისთვის იმ სამყაროში ცხოვრება და საქმიანობა?
- გიორგისთვის პირველი რამდენიმე წელიწადი რთული იყო, როდესაც კულტურის გაცნობა ხდებოდა და როცა იქაურობას ეგუებოდა. ირანში კი არა, რაც არ უნდა განვითარებულ ქვეყანაში გადახვიდე, მაინც ჭირს ადაპტაცია და შეგუება. ამ შემთხვევაშიც პირველი 2 წელი რთული გახლდათ... ახლა უკვე მეც შეჩვეული ვარ იქაურ ატმოსფეროს. დღეს ისეთ სირთულეს ნამდვილად აღარაფერი წარმოადგენს.
- გიორგის თავის ფანები ჰყავს იქ?
- ჰყავს ფანების უდიდესი არმია. არის ძალიან ცნობილი ირანში. დიდ პატივს სცემენ და ერთადერთი ლეგიონერია, რომელსაც სხვა გუნდებიდანაც ჰყავს ფანები. მოსწონთ მისი თამაში. ენაც იცის... მუდმივად იქ ვერ ვცხოვრობ, ვინაიდან მყავს მცირეწლოვანი ბავშვი, ასევე მოზარდი შვილებიც და მაქვს ჩემი საქმიანობა.
- ოჯახი რომ შექმენით გიორგი უკვე ირანში თამაშობდა?
- პირველი წელი იყო, რაც იქ თამაშობდა. გიორგისთვის ერთადერთი სირთულე თავიდანვე ის იყო, რომ არ არის 24/7-ზე აქ. ძალიან ჩართულია ყველა ბავშვის ცხოვრებაში. იშვიათი მამაა და რა თქმა უნდა, მეუღლეც ასეთივეა. ამიტომ ერთმანეთთან გვაქვს ტელეფონთ ინტენსიური კომუნიკაცია. ეს იმისთვის, რომ სიშორის ტკივილები დავძლიოთ... გიორგი ყურადღებიანი, თბილი ადამიანია, უყვარს სიურპრიზების გაკეთება. რაღაც დონეზე რომანტიკულიც არის, როგორც ამის საშუალებას მისი საფეხბურთო ცხოვრება აძლევს. ცდილობს, ჩვენ ორისთვისაც დრო გამონახოს.
- რთულია ფეხბურთელის მეუღლეობა?
- რომ ამბობდნენ, რთულიაო, არ მჯეროდა, მაგრამ დღეს დარწმუნებული ვარ ამაში. თავიდან ბოლომდე გიწევს, შენი მეორე ნახევრის ცხოვრებით ცხოვრება. სხვანაირად არ გამოვა. გიწევს მუდმივად გამხნევება, გვერდში დგომა. ეს ყველაფერი ძალიან მნიშვნელოვანია ნებისმიერი წარმატებული ადამიანისთვის, რომ ოჯახში სიმშვიდე ჰქონდეს. ასეთ დროს საკუთარ საქმეს ადამიანი გაცილებით უკეთ აკეთებს. ეს ოჯახური სიმყუდროვე, უკვე ჩვენი, მეუღლეების გასაკეთებელი და შესაქმნელია.
- ფეხბურთის ფანი იყავით, როცა გიორგი გაჩნდა თქვენს ცხოვრებაში?
- აბსოლუტურად არ ვიცოდი ფეხბურთის შესახებ არაფერი. ფეხბურთელი სანაცნობო წრეშიც არავინ მყავდა. ცოლად რომ გავყევი, მერე ვიკითხე, კარის შეცვლა მეორე ტაიმში რატომაა საჭირო-მეთქი?! არ ვიყავი დაინტერესებული, სულ სხვა სფეროში ვსაქმიანობდი. ახლა ფეხბურთში საკმაოდ კარგად ვერკვევი.
- როგორ დაიწყო თქვენი ურთიერთობა?
- ძალიან საინტერესო გაცნობის ამბავი გვაქვს. ერთმანეთი საერთო მეგობარმა გაგვაცნო. მანამდე კი, სადაც გიორგის რაღაც ფოტოში მოვწონებივარ და იმ მეგობრისთვის უთხოვია, გამაცანიო. ისე მოაწყვეს შეხვედრა, მე არც ვიცოდი. პირველივე შეხვედრაზე მითხრა, - სამი თვეა გიყურებ, თვალს გადევნებ. მე და შენ ერთად უნდა ვიყოთო. ამას ერთი წელი მოჰყვა, მთლად ასე მარტივი არ იყო ჩემი დათანხმება, დიდი ბრძოლა მოუწია... დღესდღეობით ყველა წარმატებას და წარუმატებლობას ერთად გავდივართ. არასდროს გვბეზრდება ერთად ყოფნა.
- თავადაც წარმატებული ქალბატონი ხართ...
- რამდენიმე კომპანიის დამფუძნებელი ვარ და საქართველოში ჰოლივუდის ფილმების აკადემიის თანადამფუძნებელი. პირველი განათლება იურიდიული მაქვს, შემდეგ მარკეტინგზე გადავედი, მაგისტრატურაც ამ კუთხით დავამთავრე. 19 წლიდან ვმუშაობ. ალბათ შრომის შედეგია და გამართლებაც იყო, რომ რამდენიმე მსხვილი პროექტის ავტორი გავხდი. მქონდა ჩემი მარკეტინგული კომპანიაც. დღეს მაქვს ამერიკაში ჰოლივუდ ფილმ-აკადემიის ფილიალი. კი ლოს-ანჯელესის ოფიციალური ფილიალია საქართველოში გახსნილი, კერძოდ, ამ პროექტს „სეუს“ უნივერსიტეტთან ერთად ვახორციელებთ და ვარ თანადამფუძნებელი, პრეზიდენტი. სასწავლებელი ინგლისურენოვანია და ძირითადად უცხოელები სწავლობენ. სწავლობენ სამსახიობო ოსტატობას, რომელსაც ცნობილი ამერიკელი პედაგოგები ასწავლიან. ასე რომ, აქტიურ ცხოვრებას ვარ მიჩვეული.
- შვილებზე გვიამბეთ...
- მე და გიორგის ერთი საერთო შვილი გვყავს და ეს არის დუდუ გველესიანი, რომელიც 4 წლისაა. ძალიან გვგავს ორივეს, გარეგნულად და ხასიათითაც. მამა მასზე დიდ იმედებს ამყარებს, რომ დუდუ ფეხბურთს გაჰყვეს. უფროსი ძმაც შევიყვანეთ ფეხბურთზე - გიორგის შვილი პირველი ქორწინებიდან. პირველი ქორწინებიდან მას გოგოც ჰყავს. პირველი ქორწინებიდან მეც მყავს 2 გოგონა. ბავშვები გიჟდებიან ერთმანეთზე, ძალიან მეგობრობენ. ჩვენც ყველანაირად ვპატრონობთ და ყველანაირად გვერდში ვუდგავართ. ჯამში გყავს 5 შვილი.
- როგორია თქვენი პროგნოზი შემდეგი თამაშისთვის?
- მე პროგნოზს ჩვენს მოგებაზე ვაკეთებ და 2:1 იქნება ანგარიში. ბურთებს ვინ გაიტანს, ჯერ არ ვიცი, რადგან შემადგენლობა არ ვიცით. ასე რომ, მხოლოდ გამარჯვება!