"მანჩესტერ სიტი" და საქართველო: საამაყო კავშირები" - კლუბის ოფიციალური საიტი გიორგი ქინქლაძესა და სხვა ქართველებზე სტატიას აქვეყნებს
"ქვეყანა რომელსაც 4 მილიონი მოსახლე ჰყავს, ესაზღვრება შავ ზღვას და მსოფლიო ფეხბურთის რეიტინგში 74-ე ადგილს იკავებს, ევროპის ჩემპიონატის ფავორიტი გახდა", - ამის შესახებ ინგლისური "მანჩესტერ სიტის" ოფიციალური საიტი წერს და იქვე აცხადებს, რომ მათთვის საქართველო უცხო ქვეყანა ნამდვილად არ არის.
"ეს იმიტომ, რომ არცერთ ინგლისურ კლუბს არ ჰყოლია იმაზე მეტი ქართველი მოთამაშე, ვიდრე "მანჩესტერ სიტის.
ყველაფერი ასე დაიწყო:
ბრიტანელები საქართველო - უელსის თამაშს უყურებდნენ. გაოცებულები დარჩნენ ქართველი ფეხბურთელების სისწრაფით, ტექნიკით, თავდადებული თამაშით. ფრენსის ლი, რომელიც იმჟამად "სიტის“ პრეზიდენტი იყო, 21 წლის "ქინქის" თამაშით მოინუსხა და გადაწყვიტა, რომ ნებისმიერ ფასად მოიყვანდა ვუნდერკინდს გუნდში.
"სიტიმდე“ ქინქლაძეს რამდენიმე შესაძლებლობა მიეცა, რომ დიდ ფეხბურთში თავი გამოეჩინა, თუმცა ეს არა და არ გამოსდიოდა. ჯერ გერმანიაში, შემდეგ არგენტინაში. გერმანულ "საარბრიუკენში“ 11 მატჩი ჩაატარა. არგენტინულ "ნოკაში“ ადგილობრივ პირობებთან შეგუება გაუჭირდა. მცირე ხანი ესპანეთში გაატარა, მაგრამ "სიტის“ ინტერესი არსებულ ვარიანტებს შორის ყველაზე რეალისტური აღმოჩნდა. ფრენსისმა იმ დროისთვის საკმაოდ დიდი ფული, 2 მილიონი ფუნტი გადაიხადა.
სხვათა შორის, მის ამ გადაწყვეტილებას დიდი წინააღმდეგობა მოჰყვა. გიოს კლუბში მიპატიჟებით ზოგიერთი თანამშრომელი არ აღფრთოვანდა. ქართველის გამოცდილება მიმზიდველად არ ჩანდა.
თუკი ღმერთს ვინმესთვის უბოძია უსაზღვრო ნიჭი, ერთ-ერთი გიორგი ქინქლაძე იყო. ფანტასტიკური დრიბლინგისა და ფინტების ოსტატი, გამორჩეულად ლამაზი ფეხბურთის თამაშის უნარით, სწრაფი, უკომპრომისო, ნამდვილი შემოქმედი... ქინქლაძე "სიტის“ ფანებმა ფანატიკურად შეიყვარეს. თუმცა ის უყვარდათ არა მხოლოდ გასაოცარი თამაშის გამო, არამედ სამაგალითო ერთგულებისთვისაც, რომელიც გიომ გამოავლინა.
სამწუხაროდ, მხოლოდ "ქინქის“ გასაოცარი თამაში საკმარისი არ აღმოჩნდა, იმისთვის, რომ "სიტი“ პრემიერ ლიგაში დარჩენილიყო. კლუბი "ჩემპიონშიფში" გავარდა. ასეთ დროს, ნიჭიერი ფეხბურთელები, აუცილებლად გადადიან სხვა კლუბებში, რათა კარიერული ზრდა განაგრძონ, შემოსავალი გაიუმჯობესონ და თავისი პოპულარობა გაზარდონ.
ქინქლაძის გადაბირებით დაინტერესებული იყო რამდენიმე კლუბი, მათ შორის "ბარსელონა“, "მილანის ინტერი“, "ლივერპული“ და "სელტიკი“. თუმცა, მან "მანჩესტერ სიტიში“ დარჩენა არჩია, სადაც 1995-96 წლების სეზონის საუკეთესო ფეხბურთელად დასახელდა.
"ქალაქელები“ შოკში იყვნენ, არ იცოდნენ მადლობა რით გადაეხადათ ქართველი ფენომენისთვის....
- 1996 წელს გუნდს მიხეილ ყაველაშვილი შეუერთდა. წლის ბოლოს კიდევ ორი ქართველი ჩამოვიდა - ორივე ცენტრალური მცველი - პირველი იყო მურთაზ შელია და ექვსი კვირის შემდეგ კახაბერ ცხადაძე. ორივე შესანიშნავი დამატება იყო, გამოცდილი საერთაშორისო მოთამაშეები. თუმცა, ვერცერთმა შეაჩერა "სიტის" საბოლოოდ მესამე ლიგაში დაქვეითება.
1996-97 წლების სეზონში ბევრი ცვლილება მოხდა "მანჩესტერ სიტიში“, მთელი სეზონის განმავლობაში ქინქლაძემ ითამაშა ხუთი სხვადასხვა მწვრთნელის ხელმძღვანელობით. კეიტ კარლის კლუბში მცირე ხნის მუშაობის დროს ქინქლაძე გახდა კლუბში პენალტების მთავარი შემსრულებელი, ასევე გაიტანა რამდენიმე გოლი თავისუფალი დარტყმის შესრულებით, მათ შორის 35 იარდიდან (32 მეტრი) გაუტანა "სუინდონ თაუნს“, რომელსაც ინგლისურმა გაზეთმა Manchester Evening News-მა "სარაკეტო დარტყმა“ უწოდა.
"მართალია, წასვლის შანსი მქონდა. "ბარსელონა" და სხვა მხარეები დაინტერესდნენ, მაგრამ ვერ წავედი. მინდოდა "სიტის" პრემიერ ლიგაში დაბრუნებაში დავხმარებოდი, ამიტომ ეს არ იყო ჩემთვის რთული გადაწყვეტილება", - იხსენებდა მოგვიანებით ქინქლაძე.
იხილეთ ასევე: