"ისეთი შთაბეჭდილება რჩებოდა, თითქოს ჰაერი არ ჰყოფნიდა" - რა "გაშიფრეს" სხეულის ენის სპეციალისტებმა წლის მთავარი დებატებიდან?
"დემოკრატები" იმდენად პანიკაში არიან პრეზიდენტ ჯო ბაიდენის წარუმატებელი დებატების გამო, რომ ზოგი აქტიურად განიხილავს მისი ჩანაცვლების საკითხს, - ინფორმაციას Politico ავრცელებს.
- გამოცემის ცნობით, სამ პოტენციურ "დემოკრატ" კანდიდატთან დაახლოებული სამი სტრატეგის განცხადებით, მათ დებატების განმავლობაში უამრავი ტექსტური შეტყობინება მიიღეს.
ერთ-ერთი შესაძლო „დემოკრატი“ საპრეზიდენტო კანდიდატის მრჩეველმა აღნიშნა, რომ მან მიიღო რამდენიმე შემდეგი შინაარსის შეტყობინება მნიშვნელოვანი დონორებისგან : "კატასტროფაა", „პარტიამ რაღაც უნდა გააკეთოს“, თუმცა მან აღიარა, რომ ბევრი არაფერია შესაძლებელი, თუ ბაიდენი თავად არ გადგება განზე.
გამოცემის ცნობით, ერთმა მნიშვნელოვანმა დონორმა და ბაიდენის მხარდამჭერმა განაცხადა, რომ დროა პრეზიდენტმა დაასრულოს თავისი კამპანია. მისი თქმით, ბაიდენის გამოსვლა იმდენად „ცუდი იყო, რომ არავინ მიაქცევს ყურადღებას ტრამპის ტყუილს“.
- აშშ-ის საპრეზიდენტო არჩევნების განმეორებით დაპირისპირებაში, დებატების დროს დონალდ ტრამპისა და ჯო ბაიდენის ნათქვამიდან ძალიან ცოტა სიახლე შეიძლებოდა, გაგვეგო - რაც სხეულის ენას კიდევ უფრო მნიშვნელოვანს ხდიდა. ამის შესახებ ექსპერტებმა The New York Post-ს განუცხადეს.
დებატები 81 წლის ბაიდენისთვის თავიდანვე მეტისმეტად რთული ჩანდა, რომელიც თავის ტრიბუნასთან ხისტად მივიდა, სანამ 78 წლის ტრამპი სცენაზე გამოვიდოდა.
"მოძრაობის ბევრი ასპექტი, სხეულის ენის თვალსაზრისით, მისთვის რთული შესაცვლელია, თუ წონების ინტენსიურ აწევას ან კუნთების ვარჯიშს არ მიმართავს”, - განაცხადა სხეულის ენის ექსპერტმა და Carnegie Mellon-ის დრამის პროფესორმა, მისო ვეიმ, - "სხვა კუთხით, სიხისტე და ნელი ტემპი ნამდვილად მისი ასაკითაა გამოწვეული."
ვეის თქმით, მიუხედავად იმისა, რომ ბაიდენი მხოლოდ სამი წლით და შვიდი თვითაა ტრამპზე უფროსი, ის გაცილებით დაუძლურებული ჩანდა.
"მისი საუბრის მანერა მისი ასაკის დამალვის საშუალებას არ იძლევა", - თქვა მან.
- ვეის თქმით, ასევე, ისეთი შთაბეჭდილება რჩებოდა, თითქოს ბაიდენს დებატების დროს ჰაერი არ ჰყოფნიდა, რაც თეთრმა სახლმა გაციებას მიაწერა.
"მე მას ვურჩევდი, რომ აღიაროს თავისი ასაკი და შემდეგ გვითხრას: "კი ბატონო, მოხუცებული ვარ, მაგრამ აი, რა უპირატესობები აქვს ჩემს ასაკს: შემიძლია, შემოგთავაზოთ სიბრძნე, გამოცდილება, ნაცვლად იმისა, რომ ამის დამალვა სცადოს", - აღნიშნა ექსპერტმა.
ტრამპის შესახებ კი The Post-ს ტვინისა და სხეულის ენის ექსპერტი, ფსიქიატრი კეროლ ლიბერმანი ესაუბრა და აღნიშნა, რომ ბაიდენის საპირისპიროდ, ყოფილმა პრეზიდენტმა თავისი არგუმენტები მძლავრი ხმით წარმოადგინა და საერთოდ, მისი ტონისა და აღნაგობის წყალობით ის უფრო ავტორიტეტულად გამოიყურებოდა.
"იცით, ბედნიერი ვარ, იმით გამხნევებული, თუ როგორ იქცეოდა ტრამპი", - განაცხადა ლიბერმანმა, რომელიც ნოემბერში 45-ე პრეზიდენტის არჩევას აპირებს.
თუმცა, მისივე თქმით, ტრამპი "სრულყოფილი არ იყო".
ისევე, როგორც ბაიდენს თავისი ასაკის კრიტიკის გასაქარწყლებლად არაფერი გაუკეთებია, ლიბერმანის თქმით, ტრამპსაც მეტი ძალისხმევის გაწევა შეეძლო იმ ბრალდებების უარსაყოფად, რომ ის ზედმეტად თვითკმაყოფილია.
"ვფიქრობ, ის ზედმეტად ხშირად ამბობდა: ამაში მაგარი ვიყავი, იმაში მაგარი ვიყავი, თუმცა, მას ასე ნაკლებად უნდა ელაპარაკა, რადგან ეს ცოტა არ იყოს, გამაღიზიანებელია. ხალხი ამბობს, რომ ის ნარცისია, ამიტომაც სურვილი გეკარგება, მხარი დაუჭირო" - თქვა ექსპერტმა.
ფსიქიატრის მოსაზრებით, ბაიდენმა, რომელმაც 2020 წელს ტრამპთან დაპირისპირებებში იმით მოიპოვა უპირატესობა, რომ COVID-19 პანდემიის ფონზე ამერიკელების მიმართ "თანაგრძნობის" გამოხატვა გამოსდიოდა, ამ შთაბეჭდილების მოხდენა ამჯერად ვერ შეძლო.
"ბაიდენი, თითქოს, ვერ აცნობიერებს, თუ რამდენ ტკივილს განიცდიან ამერიკელები. ის მხოლოდ ცდილობდა, ეთქვა: “ოჰ, შესანიშნავად ვართ, ბლა, ბლა, ბლა”, მაგრამ ხალხი ამა თუ იმ სახით, მართლა იტანჯება. მან არც კი აღიარა, რომ პრობლემა არსებობს".
"მიუხედავად იმისა, რომ ტრამპის მხარდამჭერი ვარ, შეუძლებელი იყო, ბაიდენი არ შეგცოდებოდა. იცით, ის საკუთარ ბაბუას მოგაგონებდა, წინადადებებში იკარგებოდა და ნაწილობრივ, ამის გამო იწვევდა შებრალების გრძნობას" - თქვა ფსიქიატრმა/
მაშინაც კი, როცა კანდიდატები არ საუბრობდნენ, დებატების სცენიდან ბევრი რამის გაგება შეიძლებოდა. მაგალითად, ვეიმ აღნიშნა, რომ შემდეგ ჯერზე ტრამპისთვის რჩევა ექნებოდა: ბაიდენის საუბრის დროს არ გაეღიმა, რადგან ეს "ქედმაღლურ ტონს გადმოსცემს".
თუმცა, მანვე დაამატა, რომ ბაიდენი ხშირად დაბნეული ჩანდა, როცა მისი მეტოქე მოდერატორებს პასუხობდა.
"ბაიდენს ვურჩევდი, ყურადღება მიაქციოს იმ მომენტებს, როცა ის არ საუბრობს. რადგან ჩუმად ყოფნისას, მისი სახის გამომეტყველება იხსნება და ფართოდ გახელილი თვალები ჩანს", - დასძინა ექსპერტმა.
წაიკითხეთ ასევე: