ქირურგიის ეროვნულ ცენტრში ახალი ტექნოლოგიების მეშვეობით სიმსივნური დაავადებების მკურნალობის ინოვაციური მეთოდი დაინერგა
კონსტანტინე ერისთავის სახელობის ქირურგიის ეროვნული ცენტრი კიბოს მკურნალობის ინოვაციური მეთოდების დანერგვას განაგრძობს - რამდენიმე კვირის წინ რადიოთერაპიის დეპარტამენტი ამერიკული კომპანია Varian-ის ხელოვნური ინტელექტის მქონე ადაპტაციური სხივური ამაჩქარებლით აღიჭურვა.
Varian Ethos-ის ტექნოლოგია, რომელიც სიმსივნური დაავადებების მკურნალობაში რევოლუციურ მიღწევად მიიჩნევა, საქართველოში პირველად გახდა ხელმისაწვდომი და აქამდე არსებულ მიდგომებთან შედარებით უფრო მაღალი ეფექტიანობით ხასიათდება. მისი ადაპტაციური შესაძლებლობები უზრუნველყოფს სიზუსტეს ყოველ ნაბიჯზე, პერსონალიზაციასა და კომფორტს, რაც პაციენტის მკურნალობის უმაღლეს სტანდარტს წარმოადგენს.
უწყვეტი ვიზუალიზაციის მეშვეობით Varian Ethos-ი ახორციელებს მკურნალობის დროის კორექტირებას, რათა მოერგოს პაციენტის პოზიციას ან სუნთქვისა და ანატომიის ცვლილებებს, რაც გვერდითი ეფექტების შემცირების შესაძლებლობას იძლევა.
ქირურგიის ეროვნულმა ცენტრმა დანერგა მეორე მნიშვნელოვანი ინოვაციური ტექნოლოგია, რადიო ქირურგიაც (SRS, SBRT) რაც მაგალითად, თავის ტვინის სიმსივნური დაავადებების მკურნალობისას განსაკუთრებით ეფექტურია.
უფრო დეტალურად, რა უპირატესობები აქვს ინოვაციურ ტექნოლოგიებსა და მკურნალობის თანამედროვე მეთოდებს, ამის შესახებ ქირურგიის ეროვნული ცენტრის რადიო თერაპიის დეპარტამენტის ხელმძღვანელი ბესიკ სოკურაშვილი და ამავე კლინიკის სამეთვალყურეო საბჭოს თავმჯდომარე ლალი ივანიშვილი საუბრობენ:
ქირურგიის ეროვნული ცენტრის რადიო თერაპიის დეპარტამენტის ხელმძღვანელი ბესიკ სოკურაშვილი:
ბატონო ბესიკ, რა უპირატესობები აქვს Varian Ethos-ით ადაპტაციური სხივური თერაპიის ჩატარებას და რამდენად ეფექტურია აღნიშნული მეთოდით მკურნალობა?
ამერიკული კომპანია Varian-ის აპარატმა Ethos-მა შესაძლებლობა მისცა ჩვენს განყოფილებას, უფრო ხარისხიანად ვუმკურნალოთ პაციენტებს. აღსანიშნავია, რომ აპარატი მთელი მსოფლიოს მასშტაბით მხოლოდ და მხოლოდ 40-მდე სამედიცინო ცენტრში დგას, ერთ-ერთი მათგანი კი საქართველოში, ქირურგიის ეროვნული ცენტრის რადიაციული ონკოლოგიის განყოფილებაა.
რაც შეეხება უპირატესობებს, აპარატი აღჭურვილია ხელოვნური ინტელექტითა და ადაპტაციური სხივური თერაპიის შესაძლებლობით. ხელოვნური ინტელექტი მნიშვნელოვნად ზრდის ETHOS-ის ეფექტურობას. უპირველეს ყოვლისა, ის საშუალებას გვაძლევს, სხივები მეტი სიზუსტით დავუმიზნოთ სიმსივნურ უბანს, ისე, რომ ახლომდებარე ჯანმრთელი ქსოვილები მინიმალურად დაზიანდეს. ამის გამო მკურნალობის შედეგიც გაცილებით უკეთესია და თანმხლები მოვლენებიც გაცილებით ნაკლები. გარდა ამისა, ხელოვნური ინტელექტი ავტომატურად ასრულებს ბევრ საჭირო მოქმედებას, რითაც აჩქარებს მკურნალობის დაგეგმვის პროცესს და აუცილებლობის შემთხვევაში გეგმის რეალურ დროში კორექტირების საშუალებას იძლევა. ეს იმას ნიშნავს, რომ პაციენტი ნაკლებ დროს ატარებს სამკურნალო სივრცეში და იღებს მათ უნიკალურ საჭიროებას მორგებულ პერსონალიზებულ თერაპიას.
უფრო კონკრეტულად რა ონკოლოგიური დაავადებების მკურნალობა ხდება Varian Ethos-ის ტექნოლოგიით?
აღნიშნული აპარატით თითქმის ყველა ლოკალიზაციის ავთვისებიანი სიმსივნეების მკურნალობაა შესაძლებელი - ცენტრალური ნერვული სისტემის, თავ–კისრის, ფილტვის, ძუძუს, კუჭ–ნაწლავის ტრაქტის ორგანოების, შარდ–სასქესო სისტემის ონკოლოგიური დაავადებების, ლიმფომების და ჰემატოლოგიური სიმსივნეების, ძვლის და რბილი ქსოვილების, კანის, თავის ტვინისა და ძვლების მრავლობითი მეტასტაზების რადიოთერაპია
ETHOS-ის ერთ-ერთი ყველაზე საინტერესო ასპექტია ადაპტაციური რადიაციული თერაპია. მისი დახმარებით შეგვიძლია, ყოველდღიურად ვცვალოთ მკურნალობის გეგმა და რეალურ დროში მოვარგოთ პაციენტის ანატომიურ ცვლილებებს. მაგალითად, თუ მკურნალობის პროცესში შეიცვალა სიმსივნის ზომა, ფორმა ან მდებარეობა, აპარატი გაითვალისწინებს ამას და აღნიშნული ცვლილების შესაბამისად გადაეწყობა. გეგმის მუდმივი მოდიფიკაცია მკურნალობის მაქსიმალურ ეფექტურობას უზრუნველყოფს. ადაპტაციური თერაპია ზრდის მკურნალობის სიზუსტეს და ამცირებს თანმხლები მოვლენების რისკს.
ETHOS-ის შესაძლებლობიდან გამომდინარე, თითოეული პაციენტი იღებს დასხივების პერსონალიზებულ გეგმას, რომელიც განუწყვეტლივ იხვეწება და ზედმიწევნით შეესატყვისება მის სპეციფიკურ საჭიროებებს.
რამდენადაც ვიცი, მკურნალობის დაწყებამდე ადგენთ პაციენტის მკურნალობის ტაქტიკისა და დასხივების გეგმას. რა მნიშვნელობა აქვს მას ეფექტური შედეგების მისაღებად? ასევე, რამდენად მნიშვნელოვანია, რომ ამ პროცესში უცხოური გამოცდილების მქონე ექიმები არიან ჩართულები? (როგორც თქვენ, მადრიდში მიღებული გამოცდილებით, ისე ემორის უნივერსიტეტის რადიაციული ონკოლოგიის დეპარტამენტის ხარისხის განყოფილების უფროსი, პროფესორი ნათია ესიაშვილი და ესპანეთის Genesis Care-ს ონკოლოგიის მულტიდისციპლინური ინსტიტუტის წამყვანი სპეციალისტი, ESTRO-ს საერთაშორისო რადიაციულ ონკოლოგთა საზოგადოებებთან ურთიერთობის კომიტეტის წევრი და მურსიის უნივერსიტეტის ასოცირებული პროფესორი - მაია ჯუღაშვილი).
თითოეული ჩვენი პაციენტი მკურნალობას იწყებს მას შემდეგ, რაც შემთხვევა განიხილება კონსილიუმზე, რომელშიც მართლაც მდიდარი საერთაშორისო გამოცდილების მქონე ექიმები არიან ჩართულები. მნიშვნელოვანია, სწორად განისაზღვროს, სჭირდება თუ არა პაციენტს სხივური თერაპია თუ უმჯობესია, მკურნალობის პროცესი სისტემური მკურნალობით ან ქირურგიული ოპერაციით დაიწყოს.
ეს მიდგომა იძლევა სწორი მკურნალობის შესაძლებლობასა და სასურველ შედეგს. მკურნალობის პროცესში თითოეულ შემთხვევას უცხოური გამოცდილების მქონე ექსპერტებთან ერთად ყოველკვირეულად განვიხილავთ და ვადგენთ, რა იქნება მკურნალობის ყველაზე ეფექტური გზა, რათა პაციენტს სრულად გამოჯანმრთელების ან ხანგრძლივი რემისიის შესაძლებლობა მივცეთ.
რაც შეეხება რადიო ქირურგიას, რომელიც ასევე სიახლეა ქირურგიის ეროვნული ცენტრის რადიო თერაპიის დეპარტამენტში, რას გულისხმობს ის და რა შემთხვევაში გამოიყენება?
რადიოქირურგია, რომელიც ჩვენს დეპარტამენტში ახლახან დაინერგა, გულისხმობს მცირე ზომის წარმონაქმნების მაქსიმალურად მაღალი დოზით დასხივებას. მას არანაირი შეხება არ აქვს ქირურგიასთან, რადგან მკურნალობის არაინვაზიური მეთოდია, თუმცა ეფექტი ისეთივე აქვს, როგორიც ოპერაციული ჩარევის დროს მიიღება.
რადიო ქირურგიის მეშვეობით შეგვიძლია გავაკეთოთ როგორც ინტრაკრანიალური დასხივებები თავის ტვინში არსებულ მეტასტაზებზე, ასევე ექსტრაკრანიალური - თავის ტვინის გარეთ, სხეულის ნებისმიერ ადგილზე.
მინდა, ყურადღება გავამახვილო კიდევ ერთ სიახლეზე თავის ტვინის სიმსივნის მკურნალობის კუთხით, რომელიც ასევე ცოტა ხნის წინ დავნერგეთ და ერთადერთია საქართველოში. უფრო კონკრეტულად, ჩვენს დეპარტამენტში თავის ტვინში არსებული მეტასტაზების დასხივება ხდება SRS HyperArc სისტემის გამოყენებით, რომელიც გულისხმობს თავის ტვინში არსებული მრავლობითი მეტასტაზის ერთ პროცედურაზე დასხივებას. აღნიშნული მეთოდი პაციენტებს აძლევს შანსს, დარჩნენ მკურნალობის რადიკალურ რეჟიმში და მიეცეთ ხანგრძლივი რემისიის შესაძლებლობა. ზოგადად ყველაფერი ეს საშუალებას გვაძლევს, ონკოპაციენტებს მათ საჭიროებებს მორგებული ოპტიმალური მკურნალობა შევთავაზოთ და საუკეთესო შედეგი მივიღოთ.
კონსტანტინე ერისთავის სახელობის ქირურგიის ეროვნული ცენტრის სამეთვალყურეო საბჭოს თავმჯდომარე ლალი ივანიშვილი განმარტავს, რომ კლინიკა გააგრძელებს ინოვაციური ტექნოლოგიების დანერგვას, რათა პაციენტებს შესაძლებლობა ჰქონდეთ, ჩვენს ქვეყანაშივე მიიღონ მაღალი ხარისხის სამედიცინო მომსახურება:
ქალბატონო ლალი, რა სტანდარტებს უნდა აკმაყოფილებდეს თანამედროვე კლინიკა და საინტერესოა, როგორ მუშაობს აღნიშნული მათ დანერგვასა და შენარჩუნებაზე ქირურგიის ეროვნული ცენტრი?
თანამედროვე მედიცინის მიღწევებზე საუბრისას თვალწინ წარმოგვიდგება უახლესი აპარატურა, თანამედროვე კლინიკები, უნიკალური ოპერაციები, რასაც თან ახლავს პროფესიონალთა დიდი ძალისხმევის ფონზე მიღებული შედეგებით მიღწეული წარმატების უდიდესი ემოცია. თამამად შეიძლება ითქვას, რომ ამ სტანდარტებს სრულად აკმაყოფილებს ჩვენი კლინიკა. ესაა პროგრესულად მოაზროვნე მენეჯმენტის, უახლესი სამედიცინო აპარატურისა და, რაც მთავარია, უმაღლესი კვალიფიკაციის პროფესიონალ ექიმთა ერთობლიობა. ცენტრის მენეჯმენტი მონაწილეობს ყველა მნიშვნელოვან ადგილობრივ თუ საერთაშორისო შეხვედრებში, სამეცნიერო თუ პრაქტიკულ კონფერენციებში, სემინარებში, გამოფენებში, სადაც თავს იყრის ის აუცილებელი ინფორმაცია და მონაცემები, რაც შეჯერების შემდგომ განვითარების გეგმის შემუშავების საშუალებას იძლევა.
მუშაობის რა მთავარ პრინციპებზე დგას ქირურგიის ეროვნული ცენტრი და როგორია მისი სამომავლო გეგმები?
მაღალკვალიფიციური სამედიცინო და ადმინისტრირებაში მონაწილე პერსონალით ცენტრის დაკომპლექტების შემდგომ მენეჯმენტის მიერ გაანალიზდა თანამედროვე ინოვაციების და ტექნოლოგიების როლი დარგის განვითარებისათვის. შესაბამისად, დაიგეგმა ცენტრის განვითარების შემდგომი ეტაპი, რაც, ძირითადად, გულისხმობს ტრადიციული სამედიცინო მომსახურების მიწოდების გვერდით ინოვაციური და მაღალ ტექნოლოგიაზე დამყარებული სერვისების მუდმივ რეჟიმში დანერგვას. ყოველივე ეს, ჩემი რწმენით, დადებითად აისახება მოსახლეობის კეთილდღეობასა და სიცოცხლისუნარიანობის გახანგრძლივების მიზნებზე.
ჩვენ კვლავაც გავაგრძელებთ თანამედროვე ტექნოლოგიების შემოტანას ქვეყანაში, რათა მაღალი ხარისხის სამედიცინო სერვისები კიდევ უფრო ხელმისაწვდომი გავხადოთ.
R