"წყალს ჩემი ჩექმიდან ვსვამდი, მთის ლომი გამომეკიდა, მაგრამ..." - როგორ გადარჩა ველურ ბუნებაში დაკარგული მოლაშქრე, რომელიც 10 დღის შემდეგ იპოვეს
მოლაშქრე, რომელიც კალიფორნიის მთებში დაიკარგა, 10 დღის შემდეგ ცოცხლად იპოვეს. მას არავისთვის ჰქონდა ნათქვამი, სად მიდიოდა. მოლაშქრე საკუთარი თავის გადასარჩენად საკუთარი ჩექმიდან ერთ გალონ წყალს სვამდა.
34 წლის ლუკას მაკლიში, 11 ივნისს სამსაათიან ლაშქრობას შეუდგა Big Basin Redwoods-ის სახელმწიფო პარკში, მას შემდეგ, რაც მეგობარი ნახა, რომელმაც უთხრა, რომ იქ იშვიათი გრანიტის შრეები იყო.
ლუკასს არავისთვის შეუტყობინებია, სად მიდიოდა და თან მხოლოდ რამდენიმე ნივთი წაიღო, რადგან გასეირნებას მხოლოდ შუადღისთვის გეგმავდა. მას პერანგიც კი არ ჩაუცვამს.
"წავედი შარვლით, ლაშქრობის ფეხსაცმლით და ქუდით," - აღნიშნა გადარჩენილმა მაკლიშმა, - "მქონდა ფანარი და დასაკეცი მაკრატელი - სულ ეს იყო, რაც წავიღე”.
მაკლიში, გამოცდილი მოლაშქრე , რომელიც ხანძრით განადგურებულ ტყეებში ლანდშაფტის დიზაინს აკეთებს, ამბობს, რომ "გაოცებული" იყო, როცა აღმოაჩინა, რომ დაიკარგა - და ეს საკმაოდ სწრაფად მოხდა. განგაში მისმა მშობლებმა 16 ივნისს, მისი გაუჩინარებიდან ხუთი დღის შემდეგ ატეხეს, როდესაც ის მამის სადილზე არ გამოჩნდა.
მან ცხრა ღამე და 10 დღე გაშლილ ბუნებაში, უპერანგოდ გაატარა - წყალს ნაკადულიდან საკუთარი ჩექმით სვამდა, იკვებებოდა ველური კენკრით და სველ ფოთლებზე ეძინა. მოლაშქრემ წონაში დაახლოებით 30 ფუნტი დაიკლო.
"უბრალოდ ვცდილობდი, ყოველდღე გალონი წყალი დამელია, მაგრამ შემდეგ, ბოლოსკენ, ჩემს სხეულს საკვები, რაიმე საზრდო სჭირდებოდა", - თქვა მან.
მდგომარეობა მერვე დღეს გაუარესდა, როდესაც მას ჰიპოთერმია დაემართა და კლდის ზედაპირზე ასვლისას დაცურდა. გადაწყვიტა, ეყვირა: "დამეხმარეთ, მიშველეთ, აქ ვარ". ასე დაახლოებით 48 საათის განმავლობაში ყვიროდა, სანამ მის სამძებრო სამუშაოებში ჩართული 300 რეინჯერიდან რამდენიმემ მისი ხმა არ გაიგონა.
რეინჯერებმა დრონი გაუშვეს და მაძებარი ძაღლის დახმარებით მოლაშქრე მალევე იპოვეს. გასაკვირია, რომ მას საავადმყოფოში მხოლოდ ერთი ღამის გატარება დასჭირდა, სანამ ოჯახთან დაბრუნებას შეძლებდა.
ტერიტორია, სადაც ის ლაშქრობდა, 2020 წლის ხანძარმა გაანადგურა და "სხვა ადგილებისგან სრულიად განსხვავებულად გამოიყურება," - აღნიშნა მან, - "ეს ერთი რამაა, რაც მხედველობაში არ მიმიღია - როდესაც ხანძარი არეალს ასე გაანადგურებს, ის უდაბნოდ იქცევა და ორიენტირს ვერ პოულობ".
მიმართულების გასარკვევად ჩვეულებრივი ნიშნები, როგორიც ირმების მიერ გაყვანილი ბილიკები ან სალაშქრო გზებია, აღნიშნულ ტერიტორიაზე გამქრალი იყო.
New York Times-ის თანახმად, თავდაპირველად, მაკლიშმა თავისი მდგომარეობა გადარჩენის უნარების გამოცდის შანსად ჩათვალა.
"გამოცდილი ზურგჩანთიანი მოლაშქრე ვარ, ასე რომ, ჩემთვის ერთი ან ორი ღამით ბუნებში გასვლა უჩვეულო არაა", - განაცხადა მან Times-სთან.
თუმცა, პირველ ცივ ღამეს, როდესაც მაკლიშმა პატარა ბანაკის აგება სცადა, ტოტები, რომლებიც ცეცხლის დასანთებად სჭირდებოდა, სველი იყო. უკეთესი თავშესაფრის მოსაძებნად ხეობა გადაკვეთა, მეორე დღეს კი ახლომდებარე ნაკადულის ძებნა დაიწყო.
"ასე რომ, უბრალოდ ვლაშქრობდი. ყოველდღე გადავკვეთდი ხეობას, მერე უკან ვბრუნდებოდი, ჩანჩქერთან მივდიოდი, ჩემი ჩექმიდან წყალს ვსვამდი. იქ ყოფნისას თავს სულ კომფორტულად ვგრძნობდი, ამ ყველაფრის გამო არ ვღელავდი. მთის ლომი გამომეკიდა, მაგრამ არა უშავდა. ის ჩემთან დისტანციას ინარჩუნებდა. ვფიქრობ, უბრალოდ, ჩემზე ზრუნავდა”, - აღნიშნა მაკლიშმა.
მეხუთე დღეს მოლაშქრე უკვე შეშფოთდა და ცივილიზაციაში დაბრუნებისთვის გზის პოვნა სცადა.
"ვიცოდი, რომ თუ მზეს მივყვებოდი, საბოლოოდ, ოკეანემდე მივაღწევდი, მაგრამ არ ვიცოდი, რამდენად შორს ვიყავი მისგან", - თქვა მან.
ამასობაში, მისმა ოჯახმა დაკარგული პირის შესახებ განაცხადი გააკეთა. ამას მასიური სამძბრო სამუშაოები მოჰყვა, რომელშიც თითქმის 300 ადამიანი და რამდენიმე სააგენტოდან საგანგებო სიტუაციების პერსონალი მონაწილეობდა.
მოლაშქრის თქმით, რამდენიმე დღის შემდეგ, ჩვეულ საჭმელზე დაიწყო ოცნება, რადგან იძულებული იყო, თავი ველური კენკრით გადაერჩინა.
საბოლოოდ, ორმა პარკის რეინჯერმა, რომლებიც გორაკზე ადიოდნენ, მაკლიშის ყვირილი გაიგონეს.
"ვფიქრობდი, იმედია, ეს მირაჟი არ არის-მეთქი", - გაიხსენა მაკლიშმა.
სახანძრო დეპარტამენტმა დრონი მალევე გაუშვა და მაკლიშის გამოსახულება დაინახა, ამასობაში კი მას მეძებარმა ძაღლმაც მიაგნო. შემდეგ პოლიციამ ის ველური ბუნებიდან გამოიყვანა და თავის ოჯახს შეახვედრა.
მაკლიშმა პირველი ღამე ადგილობრივ საავადმყოფოში გაატარა, სადაც ექიმებმა ზურგიდან ქვები ამოუღეს.
მან თქვა, რომ ველური ბუნების არც ამ შემთხვევის შემდეგ ეშინია, მაგრამ აღიარა: "ალბათ, მთელი დარჩენილი წლისთვის უკვე საკმარისად ვილაშქრე".