პირველი ქულა ევროპაზე და გიორგი მამარდაშვილის 11 "სეივი" - საქართველო - ჩეხეთი 1:1
საქართველოს საფეხბურთო ნაკრები ევროპის ჩემპიონატზე დღეს ჩეხეთის ნაკრებს დაუპირისპირდა და მატჩი ფრედ 1:1 დასრულდა.
ჩვენი ნაკრები ამ შემადგენლობით გავიდა მოედანზე:
- მამარდაშვილი, კაკაბაძე, კვირკველია, კაშია, დვალი, მექვაბიშვილი, წიტაიშვილი, ქოჩორაშვილი, დავითაშვილი, კვარაცხელია, მიქაუტაძე
პირველი ტაიმი ორმაგი შეტევებით დაიწყო, შეიძლება ითქვას, რომ ბურთი ცენტრში საერთოდ არ ჩერდებოდა და გიჟურ ტემპში მიმდინარეობდა თამაში. ჩეხებმა შეძლეს უპირატესობის მოპოვება, თუმცა მამარდაშვილის კარგმა თამაშმა არაერთხელ გადაარჩინა ჩვენი კარი გოლისგან.
პირველი ტაიმის პირველივე წუთებში სამი ძლიერი დარტყმა მოიგერია მამარდაშვილმა და გადაგვარჩინა. "მამარდა" შემდეგაც დამჯერებლად თამაშობდა, თუმცა მის კარში ბურთი ხელით გაიტანეს, რაც გაუქმდა.
ბოლო წუთზე ხვიჩას ჩაწოდებული ჯარიმის შემდეგ კაშიას ჰქონდა ბურთი გატანის შანსი, თუმცა ვერ შეძლო, სწორედ ამის შემდეგ გადაწყდა ვარს შეემოწმებინა საჯარიმოში ჩეხების თამაში, რის შედეგადაც პენალტი დაინიშნა, რომელიც შეუდარებლად შეასრულა გიორგი მიქაუტაძემ.
ბოლო წუთებზე კიდევ ერთხელ გადაგვარჩინა "მამარდამ" და პირველი ტაიმი ჩვენი გამარჯვებით დასრულდა. აღსანიშნავია, რომ პირველ ტაიმში გიორგის ანგარიშზე 8 "სეივია", მეორეში კი კიდევ 3 დაამატა.
მეორე ტაიმი საქართველოს ნაკრებმა საკმაოდ აქტიურად დაიწყო, ორმხრივი შეტევები და ბურთის ფლობაც გათანაბრდა, თუმცა 58-ე წუთზე საქართველოს ნაკრების კარში ჩეხებმა ბურთი გატანა მაინც შეძლეს, კუთხურის ჩაწოდების შემდეგ.
61-ე წუთზე საქართველოს ნაკრებში ორმაგი შეცვლა მოხდა, დავითაშვილის ნაცვლად მოედანზე შევიდა გიორგი ჩაკვეტაძე, წიტაიშვილის ნაცვლად კი - ლუკა ლოჩოშვილი.
აღსანიშნავია, რომ ჩეხები საკმაოდ უხეშად თამაშობდნენ. მათგან ყველაზე მეტი ხვიჩას მოხვდა, შედეგად მეორე ტაიმის მიწურულს აშკარად გაუჭირდა თამაში, ის 82-ე წუთზე სანიოლმა საბა ლობჟანიძით შეცვალა. მოედანზედ გავიდა გიორგი გველესიანიც, მან შეცვალა საბა კვირკველია. 88-ე წუთზე გიორგი მიქაუტაძის ნაცვლად თამაშში გიორგი ქვილითაია ჩაერთო. ზუსტად ბოლო წუთზე საქართველოს ჰქონდა გოლის გატანის საშუალება, თუმცა მეკარესთან პირისპირ გასულმა საბა ლობჟანიძემ ბურთი კარს ააცილა.
ცნობისთვის, ევროპის ჩემპიონატზე პირველი მატჩი საქართველოს ნაკრებმა თურქეთთან გამართა და 1:3 დამარცხდა. 26 ივნისს, საქართველოს ნაკრები გელზენკირხენში, პორტუგალიის ეროვნულ ნაკრებს დაუპირისპირდება.
EURO 2024-ის მატჩების ღია ჩვენებები საქართველოს ყველა ქალაქში დიდ ეკრანებზეა შესაძლებელი. ამასთან, როგორც ცნობილია, მიხეილ მესხის სტადიონზე საქართველოს ეროვნული ნაკრების ყველა თამაშს აჩვენებენ.
იხილეთ ასევე: