"თუ ჩვენს მებრძოლ ხასიათს გამოვავლენთ, ყველაფერი გამოგვივა" - რა განაცხადა სანიოლმა ჩეხეთთან მატჩის წინ?

ევროპის ჩემპიონატზე ჩეხეთთან მატჩის წინ ჩატარებულ პრესკონფერენციაზე საქართველოს ნაკრების მწვრთნელმა ვილი სანიოლმა ისაუბრა:

"თურქეთთან ძალიან ემოციურ შეხვედრაში საინტერესო რაღაცებიც ვაჩვენეთ. გუნდმა ფანტასტიკური რეაქცია გამოავლინა. წაგების გამო გულდაწყვეტილები ვართ, თუმცა ასეთ ტურნირზე, ასეთი თამაშის შემდეგ რომ გულდაწყვეტილები ვართ, ეს უკვე წინგადადგმული ნაბიჯია. გუნდმა კარგად დაისვენა და ძალები აღიდგინა. მხოლოდ კიტეიშვილი არ არის მწყობრში. ჩეხეთის ნაკრები გამოცდილია, სხვა სტილისაა, შესარჩევი ტურნირი მაღალ დონეზე ჩაატარა და განსხვავებული დაპირისპირება გველის.

მთავარია, ჩვენ როგორ ვითამაშებთ. დაშვებული შეცდომები არ უნდა გავიმეოროთ. მეტოქის შესახებ ბევრი რამ ვიცით, მისი ძლიერი და სუსტი მხარეები. ჩვენი პრობლემა არა მოწინააღმდეგე, არამედ ჩვენივე დისციპლინით თამაშია. თუ ჩვენს მებრძოლ ხასიათს გამოვავლენთ, ყველაფერი გამოგვივა.

ხანდახან ახალი ენერგიისათვის შემადგენლობაში ცვლილებების განხორციელებაა აუცილებელი. დაზუსტებით ვერ გეტყვით, თუმცა ცვლილებები იქნება.

მამარდაშვილის მეტოქის საჯარიმოში ჩასვლა? დიდი მნიშვნელობა არ ჰქონდა 1:2 წავაგებდით თუ 1:3-ს. შეიძლებოდა გოლი გაგვეტანა. რისკი არსებობდა და მეკარეს ამის უფლება ჰქონდა".