მნიშვნელოვანი ინფორმაცია
14
მარტიდღის ზოგადი ასტროლოგიური პროგნოზი
პარასკევი, მთვარის მეთექვსმეტე დღე დაიწყება 19:51-ზე, მთვარე სასწორს ესტუმრება 22:58-ზე
მშვიდობიანი საქმეები წარმატებით დასრულდება. კაპიტალდაბანდებებს მოერიდეთ. კარგი დღეა იურიდიული საკითხების მოსაგვარებლად, სასამართლო პროცესების დასაწყებად; შემოქმედებითი საქმიანობისთვის. გარშემო მყოფებთან ურთიერთობისას გამოიჩინეთ ტაქტი. უფროსს მნიშვნელოვან საკითხებზე საუბრისთვის ნუ შეხვდებით; წვრილ-წვრილი საკითხები მოაგვარეთ. კარგი დღეა დასვენების, მოგზაურობის, ფიზიკური დატვირთვისა და საოჯახო საქმეების შესრულებისთვის. მოერიდეთ ალკოჰოლის მიღებას, მოწევას. არც იშიმშილოთ და არც კუჭი გადატვირთოთ. გაუფრთხილდით თირკმლებს. მოერიდეთ სითხისა და ალკოჰოლის მიღებას. აგრეთვე სუსტდება ენდოკრინული სისტემა.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
Euro2024 ხურდება: საინტერესო და უხვგოლიანი დასაწყისი - ყველაზე სწრაფი გოლი ჩემპიონატის ისტორიაში მოქმედი ჩემპიონების კარში და დამწუხრებული მოდრიჩი
08:25 / 16-06-2024
ევროპის ჩემპიონატი ნელ-ნელა ხურდება. პირველი ტურის მატჩები გაიმართა 2 ჯგუფში. თამაშები, რომლებიც ვიხილეთ, ნამდვილად დაძაბულ, საინტერესო, უხვგოლიან ჩემპიონატს გვპირდება.
ევრო 2024. A ჯგუფი
გერმანია- შოტლანდია 5:1
14 ივნისს, გერმანიის ნაკრების შესანიშნავმა თამაშმა ევროპის ჩემპიონატის სტარტი გაალამაზა. ძნელი სათქმელია, როგორ გააგრძელებს იულიან ნაგელსმანის გუნდი, მაგრამ პირველმა თამაშმა სკეპტიკოსებს, წესით, არგუმენტები მოუსპო. მასპინძელი ნაკრები იმაზე გაცილებით ძლიერია, ვიდრე ტურნირის დაწყებამდე ჩანდა - როგორც იტყვიან, ცა და დედამიწა.
ბუნდესგუნდმა ნამდვილი ქარიშხალი დაატრიალა პირველივე წუთებიდან და "მამაცი გულებისგან" არაფერი დატოვა. უსასტიკეს მარწუხებში მოქცეული შოტლანდიის ნაკრები მეტოქის ნახევარზე გადასვლას ვერ ახერხებდა (სრული შემადგენლობითაც რომ იყო, მაშინაც) და ნიშანდობლივია, რომ მათი გასატანიც გერმანელებმა (ანტონიო რიუდიგერი) გაიტანეს.
მაღალი ტემპი, რომელიც გერმანიამ მეტოქეს შესთავაზა, დროდადრო იცვლებოდა ბურთის გორებით და პოზიციური შეტევებით, რითაც მასპინძლები ძალებს ზოგავდნენ, თორემ ასეთი პრესინგით თამაში 90 წუთის განმავლობაში წარმოუდგენელია.
თამაშმა აჩვენა ისიც, რომ გერმანიის ნაკრების სათადარიგო სკამიც არ ჩამორჩება ძირითად შემადგენლობას. ბოლოს და ბოლოს, გოლი იმ ფეხბურთელმაც (ემრე ჯანი) კი გაიტანა, ევროპის ჩემპიონატზე შემთხვევით რომ მოხვდა...
გოლები: 1:0 ვირტცი (10. კიმიხის პასით), 2:0 მუსიალა (19. ჰავერტცის პასით), 3:0 ჰავერტცი (45+1-პენ), 4:0 ფიულკრუგი (68), 4:1 რიუდიგერი (87-საკ. კარში), 5:1 ემრე ჯანი (90+3. მიულერის პასით)
მატჩის საუკეთესო მოთამაშე (უეფა-ს ვერსია): ჯამალ მუსიალა
უნგრეთი - შვეიცარია 1:3
ამ ჯგუფის მეორე მატჩი 15 ივნისს გაიმართა, რომელშიც შვეიცარიის ნაკრებმა დამსახურებული გამარჯვება მოიპოვა უშუალო კონკურენტთან, დიდი ნაბიჯი გადადგა მერვედფინალისკენ და აჩვენა, რომ ფავორიტებისთვისაც სერიოზული თავსატეხი იქნება. მურატ იაკინის გუნდს პირველ ტაიმში ულაპარაკო უპირატესობა ჰქონდა, მაშინ, როცა უნგრელებს აბსოლუტურად არაფერი გამოსდიოდათ...
მეორე ნახევარში აღმოსავლეთ ევროპელებმა მოუმატეს ტემპს, გვარიანად შეაწუხეს მეტოქე და სხვაობაც შეამცირეს, თუმცა, საკმარისი იყო წინ წასულებს ზურგი მოეშიშვლებინათ, რომ მყისვე დაისაჯნენ - შეცვლაზე შესულმა ბრილ ემბოლომ კარგად გამოიყენა მცველის შეცდომა და მეკარესთან პირისპირ გასულმა საბოლოო "განაჩენი გამოიტანა".
მეორე ტაიმში უნგრეთის ნაკრებმა აჩვენა, რომ არც ისეთი სუსტია, როგორც პირველ ტაიმში გამოჩნდა. ზოგადად, დიდი ტურნირების ისტორია გვასწავლის, რომ არიან გუნდები, რომლებიც ჩემპიონატის მსვლელობისას უმატებენ და რამდენად არის ეს მარკო როსის გუნდი, მეორე ტურში გამოჩნდება.
გოლები: 0:1 დუა (12. ებიშერის პასით), 0:2 ებიშერი (45. ფროილერის პასით), 1:2 ვარგა (66. სობოსლაის პასით), 1:3 ემბოლო (90+3)
მატჩის საუკეთესო მოთამაშე (უეფა-ს ვერსია): გრანიტ ჯაკა
II ტური ამ ჯგიფში 19 ივნისს გაიმართება
გერმანია-უნგრეთი 20:00
შოტლანდია- შვეიცარია 23:00
ევრო 2024. B ჯგუფი
ესპანეთი - ხორვატია 3:0
ესპანეთის ნაკრებმა პირწმინდად მოუგო ხორვატიას პირველი ტაიმი, უფრო ზუსტად, მისი ბოლო 18-წუთიანი მონაკვეთი და მეორე ნახევარი მოპოვებულის შენარჩუნებას მოანდომა. თუმცა იყო არაერთი მომენტი, როცა ანგარიშის შეცვლა შეიძლებოდა როგორც ერთი, ისე მეორე მხრიდან.
ხორვატიის ნაკრების ასეთი თამაში თან სიურპრიზიც იყო და თან ვერც იმას ვიტყვით, რომ რაიმე განსაკუთრებული მოხდა. ზლატკო დალიჩის გუნდი მობერებულია და "ახალ სისხლს" საჭიროებს. წლების განმავლობაში თითქმის ერთი და იმავე შემადგენლობით თამაში ხანდახან უპირატესობას კი არა ახალი იდეების ნაკლებობას ნიშნავს.
ხორვატიის ნაკრები აშკარად შენელებულია (ყოველ შემთხვევაში, ასე გამოჩნდა ესპანეთთა მატჩში) და სწორედ ეს მომენტი გამოიყენა "ფურია როხამ", რომელსაც რგოლებს შორის სანიმუშო ურთიერთქმედება გამოარჩევდა.
ჯერ მარტო ფაბიან რუისის პასი რად ღირდა პირველი გოლის (ალვარო მორატა) ეპიზოდში... ან კიდევ მესამე გოლი ავიღოთ, როცა მარჯვენა მცველი დანი კარვახალი ცენტრფორვარდის პოზიციაზე აღმოჩნდა.
და მაინც, მეორე ტაიმში ხორვატიის ნაკრებს ჰქონდა შანსი, შეემცირებინა სხვაობა და ცოტათი მაინც დაეძაბა ვითარება, მაგრამ 11-მეტრიანი ვერ გამოიყენა ბრუნო პეტკოვიჩმა, ვისაც დამატებულზე გოლი არ ჩაუთვალეს.
გოლები: 1:0 მორატა (27. ფაბიან რუისის პასით), 2:0 ფაბიან რუისი (32. პედრის პასით), 3:0 კარვახალი (45+2. იამალის პასით)
მატჩის საუკეთესო მოთამაშე (უეფა-ს ვერსია): ფაბიან რუისი
იტალია-ალბანეთი 2:1
ამ ჯგუფის მეორე მატჩი მართლაც მოულოდნელად დაიწყო. ევროპის მოქმედმა ჩემპიონებმა უსწრაფესი გოლი გაუშვეს.
...მატჩის 23-ე წამი, ფედერიკო დიმარკო აუტიდან აწვდის ბურთს საკუთარ საჯარიმოსთან... მაგრამ ამას ძალიან ცუდად აკეთებს და ნედიმ ბაირამი ხსნის ანგარიშს.
ეს გოლი ყველაზე სწრაფია ევროპის ჩემპიონატების ისტორიაში.
ნამდვილი ცივი შხაპი "სკუადრა აძურასთვის". იტალია ბურთზე ფეხის დაუკარებლად უშვებს გოლს და მდევრის როლშია ჯგუფის აუტსაიდერთან სასტარტო მატჩში...
მაგრამ ყველაფერი მალევე ჩადგა კალაპოტში - უკვე მე-16 წუთისთვის ალესანდრო ბასტონისა და ნიკოლო ბარელას გოლებით იტალია წინ გადის. ალბანელები დაბნეულები არიან, ეიფორია ქრება, ლუჩანო სპალეტის გუნდი კი კოლოსალურ ფსიქოლოგიურ უპირატესობას იღებს, მაგრამ...
...მაგრამ აქ ხდება უცნაური რამ - იტალიის ნაკრები ათავისუფლებს მეტოქეს მარწუხებისგან და გადადის პოზიციურ თამაშზე. ალბანელთა კართან აქა-იქ მომენტები იქმნება, მაგრამ ანგარიში უცვლელი რჩება.
თამაშზე ტოტალური კონტროლით "სკუადრა აძურას" გამარჯვებამდე მიჰყავს თამაში. იტალია იდეალური ვერ არის, მაგრამ არის დამაჯერებელი - სასტარტო მატჩში სპალეტიმ რისკზე წასვლა არ ისურვა.
...თუმცა იყო ერთი მომენტი თამაშის ბოლოს, როცა იტალიელ გულშემატკივრებს ძარღვებში სისხლი გაეყინათ - რეი მანაი კარიდან გამოვარდნილ ჯანლუიჯი დონარუმასთან პირისპირ რჩება, მაგრამ ბურთი მეკარეს ხვდება, მერე კარს სცდება და ეს ბოლო საფრთხეც განეიტრალებულია - 2:1.
გოლები: 0:1 ბაირამი (1), 1:1 ბასტონი (11. პელეგრინის პასით), 2:1 ბარელა (16)
მატჩის საუკეთესო მოთამაშე (უეფა-ს ვერსია): ფედერიკო კიეზა
II ტური
19 ივნისი, 17:00
ხორვატია- ალბანეთი
20 ივნისი, 23:00
ესპანეთი - იტალია
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კონექტიკურის ქუჩებში პატარა სელაპი იპვეს
კვირის კითხვადი სტატიები
მნიშვნელოვანი ინფორმაცია
მკითხველის რჩევით
