დიდი შვიდეულის ლიდერები იტალიაში - ფოტოები იტალიიდან, სადაც ახლა ყველაზე "ცხელი" პოლიტიკური შეკრებაა
იტალიაში, ქალაქ პულიაში დიდი შვიდეულის სამიტი ტარდება. როგორც უცხოური მედია იტყობინება, სამიტის მთავარი საკითხები უკრაინა და ღაზა იქნება.
ამ დროისთვის, ლიდერები უკვე მრგვალ მაგიდას მიუსხდნენ, პირველი დღის პირველი სესიის მოლაპარაკებები კი აფრიკას, კლიმატის ცვლილებასა და განვითარებას დაეთმობა.
მრგვალ მაგიდასთან იტალიის პრემიერ-მინისტრმა, ჯორჯია მელონიმ თავის მისასალმებელ სიტყვაში აღნიშნა, რომ დიდი შვიდეული “ჩაკეტილი ციხესიმაგრე” კი არა, არამედ “ღირებულებათა კონტეინერია”, რაც “გვსურს, მსოფლიოსთვის გავხსნათ”. მისი თქმით, მომდევნო სამი დღის განმავლობაში, სამიტის გეგმებში უკრაინისა და ახლო აღმოსავლეთის განხილვა შედის.
უცხოური მედიის ცნობით, პროგრესია იმ გეგმების მიმართულებით, რომ რუსული აქტივების გამოყენებით, უკრაინისთვის 50 მილიარდი აშშ დოლარი გამოიყოს. აღნიშნული წინადადება ამერიკის შეერთებულ შტატებს ეკუთვნის და ის სავარაუდოდ, ოფიციალურად დიდი შვიდეულის სამიტის განმავლობაში დამტკიცდება. უკრაინა კრედიტს 2024 წლის ბოლომდე მიიღებს.
- უკრაინის პრეზიდენტის, ვოლოდიმირ ზელენსკის თქმით, ის სამიტზე "მნიშვნელოვან გადაწყვეტილებებს" ელოდება. "სამიტის დიდი ნაწილი უკრაინას, ჩვენს თავდაცვას და ეკონომიკურ მდგრადობას მიეძღვნება", - აღნიშნავს ის.
რეპორტიორები პულიიდან იტყობინებიან, რომ არსებობს მოსაზრება, რომ ლიდერებს სწრაფად მოქმედება მოუწევთ, რომ უკრაინის მიმართ ვალდებულებები აიღონ, რომლებიც შესრულებადი იქნება მანამ, სანამ ნოემბერში, დონალდ ტრამპის თეთრ სახლში დაბრუნდება გახდება შესაძლებელი.
სამიტს ასევე პირველად დაესწრება რომის პაპი - მოსალოდნელია, რომ პაპი ფრანცისკე ხელოვნური ინტელექტის საკითხზე ისაუბრებს. 87 წლის პაპს ხელოვნური ინტელექტის გლობალური რეგულაციის საჭიროებაზე ადრეც უსაუბრია, როდესაც ადამიანის უფლებებისა და ეთიკისთვის მის საფრთხეებს შეეხო.
შეგახსენებთ, დიდი შვიდეული მსოფლიოს შვიდი უდიდესი, ე.წ. განვითარებული ეკონომიკების გაერთიანებაა.
მისი წევრები - კანადა, საფრანგეთი, გერმანია, იტალია, იაპონია, გაერთიანებული სამეფო და შეერთებული შტატები - ყოველწლიურად, ერთ მთავარ სამიტზე, გლობალური მოვლენების განსახილველად იკრიბებიან.
გაერთიანებას რუსეთი 1998 წელს შეუერთდა, რის შედეგადაც ჯგუფი დიდი რვიანი გახდა, მაგრამ ყირიმის ანექსიის გამო, რუსეთი 2014 წელს გაერთიანებიდან გამორიცხეს.
მიმდინარე წელს ორგანიზაციის თავმჯდომარე იტალიაა, სწორედ ამიტომ, დიდი შვიდეულის სამიტი პულიაში, იტალიაში ტარდება.