შეტაკებები ერევანში პოლიციასა და აქციის მონაწილეებს შორის - დაშავდა 100-ზე მეტი ადამიანი: როგორია ვითარება მეზობელ ქვეყანაში (ფოტოები)
ერევანში, სომხეთის პარლამენტის შენობასთან აქციის მონაწილეებსა და პოლიციას შორის მომხდარი შეტაკების შემდეგ, სამედიცინო დახმარებისთვის 101-მა სამოქალაქო პირმა და პოლიციელმა მიმართა, - ინფორმაციას მედია სომხეთის ჯანდაცვის სამინისტროს პრესსამსახურზე დაყრდნობით ავრცელებს.
- "ბაგრამიანის გამზირზე განვითარებული მოვლენების შედეგად, სამედიცინო დახმარებას 101-მა სამოქალაქო პირმა და პოლიციელმა მიმართა“, - ნათქვამია სამინისტროს პრესსამსახურის განცხადებაში.
ჯანდაცვის სამინისტროში განმარტავენ, რომ 85 დაშავებული სამედიცინო დაწესებულებებიდან უკვე გაწერეს, 16 კი - მკურნალობას აგრძელებს.
შეგახსენებთ, გუშინ, ერევანში, პარლამენტის შენობის წინ პრემიერ-მინისტრ ნიკოლ ფაშინიანის გადადგომის მოთხოვნით საპროტესტო აქცია გაიმართა. აქცია დემონსტრანტებსა და სამართალდამცავებს შორის შეტაკებაში გადაიზარდა და სპეცრაზმმა მის დასაშლელად, ხმოვან-მანათობელი ყუმბარები გამოიყენა. მედიის ინფორმაციით, სამართალდამცავებმა, სულ მცირე, 60 ადამიანი დააკავეს.
