ბილი აილიში: “დამგოსთეს", სიგიჟე იყო”

როგორც ჩანს, მუსიკის უდიდესი ვარსკვლავი, ბილი აილიშიც კი არაა იმისგან დაცული, რომ "დაგოსთონ". 22 წლის ამერიკელმა არტისტმა BBC-ის პოდკასტში Miss Me? თქვა, რომ ის გასულ წელს "დაგოსთეს" და დასძინა: "ეს სიგიჟე იყო".

• "დაგოსთვა" - ვინც არ იცის - არის, როდესაც საზოგადოება, მეგობარი ან რომანტიკული ინტერესის ობიექტი უეცრად, ყველანაირი ახსნის გარეშე, შენთან ყოველგვარ კომუნიკაციას წყვეტს.

ლილი ალენთან და მიკუიტა ოლივერთან საუბრისას, აილიშმა აღნიშნა: "დიახ, რა თქმა უნდა, ჩემგანაც გამქრალა ვიღაც".

მან განაცხადა, რომ ეს ინციდენტი გასული დეკემბრის თვეში მოხდა და დასძინა, რომ "სრულიად დაუჯერებელი იყო. დღემდე მას ჩემთვის არ მოუწერია".

"ვფიქრობდი, იქნებ მოკვდა? იქნებ მართლა მოკვდა?" - თქვა მან.

"ეს იყო ვიღაც, ვისაც წლების განმავლობაში ვიცნობდი და იმ დღეს ტელეფონით გვქონდა დაგეგმილი შეხვედრა, რომელიც არ შედგა და მას შემდეგ მისგან აღარაფერი მსმენია. აღარასდროს. ვერც კი ვიჯერებდი."

აილიშმა თქვა, რომ მოგვიანებით გაიგო, რომ ის ბიჭი სხვას ხვდებოდა.

"ვიფიქრე, - ოჰო, არ ვიცოდი, რომ ხალხი ჯერ კიდევ აკეთებდა ასეთ რამეს. სერიოზულად, არ ვიცოდი, რომ ხალხი ასე იქცევა ხოლმე".

მომღერლისა და სიმღერების ავტორის მესამე სტუდიური ალბომი, "Hit Me Hard and Soft", გასულ თვეს გამოვიდა. წლის დასაწყისში, მან და მისმა ძმამ და კოლეგამ, ფინეას ო'კონელმა "ოსკარი" მოიპოვეს საუკეთესო სიმღერისთვის "What Was I Made For?", რომელიც მათ კინოფილმ “ბარბისთვის" შექმნეს.

What Was I Made For-ის შემსრულებელმა ასევე თქვა, რომ როდესაც პირველად ცნობილი გახდა, მეგობრებთან ურთიერთობის შენარჩუნება გაუჭირდა. აილიში მხოლოდ 14 წლის იყო, როცა თავისი სადებიუტო სიმღერა Ocean Eyes გამოუშვა. მას შემდეგ, იგი გლობალურ ვარსკვლავად იქცა და მრავალი ჯილდოც მოიპოვა.

"იცით, ყველა მეგობარი დავკარგე, როცა ცნობილი გავხდი. უცებ ცნობადი გავხდი და ვეღარავისთან დავაკავშირე თავი. ეს რთული იყო. ეს ძალიან რთული იყო”, - აღნიშნა მან.

აილიშის თქმით, მისი საუკეთესო მეგობარი, ზოი მის გვერდით დარჩა, მაგრამ სხვა მეგობრები, უბრალოდ, მისი თანამშრომლები იყვნენ.

"მახსოვს, ჩემს მე-20 დაბადების დღეზე როგორ მიმოვიხედე ოთახში და აღმოვაჩინე, რომ იქ მხოლოდ ის ადამიანები იყვნენ, ვინც დასაქმებული მყავდა. ყველა მათგანი ჩემზე 15 წლით ან მეტით უფროსი იყო".

აილიშის მონაყოლით, ამ თანამშრომელთაგან ერთ-ერთმა შემდეგ უეცრად სამსახურს თავი დაანება და მასთან საუბარიც შეწყვიტა.

"ეს ყველაზე ცუდი რამ იყო, რაც ოდესმე დამმართნია.

აილიშმა აღნიშნა, რომ მას შემდეგ უჭირს მეგობრობა გააბას იმ ადამიანებთან, ვისთანაც მუშაობს: "დანაკარგის ძალიან მეშინია და მიტოვებასთან დაკავშირებით ბევრი პრობლემა მაქვს", - დასძინა მან.

მისივე თქმით, ახალი მეგობრების შესაძენად და ძველი მეგობრების აღსადგენად ბევრს მუშაობდა.

"ზუსტად ერთი წლის წინ, ძველ მეგობრებს დავუკავშირდი და ახლა ბევრი მეგობარი მყავს. მთელი გუნდი მყავს! შეიძლება, მართლა ვიტირო - ეს საუკეთესო რამაა, რაც შემმთხვევია”.