"წლებია ასეთ დღეში ვართ, რომ არა ადამიანების თანადგომა, ალბათ ფატალურად დამთავრდებოდა ყველაფერი" - მამა შვილის გადასარჩენად იბრძვის

"მაისი კლიმატის მხრივ არასტაბილური ამინდებით გამოირჩეოდა და ამან ჯაბას ჯანმრთელობაზე გარკვეული გავლენა იქონია, ხშირი იყო გულყრის ეპიზოდები. ასეთი ავადმყოფებისთვის კი არა, მსგავსი ბუნებრივი კლიმატი, ჯანმრთელ ადამიანებზეც მოქმედებს. ჯაბას შემთხვევაში კი მოგეხსენებათ, რა მძიმე დიაგნოზთან გვაქვს საქმე. ეს მის გულზეც მოქმედებს და გონებრივ განვითარებაზეც, რადგან, როგორც ვთქვი, მატულობს ეპილეფსიური მომენტები (გულყრა)", - გვეუბნება თავად შშმ პირი გოგიტა მურცხვალაძე მძიმე დიაგნოზი მქონე შვილზე. მას ამჯერადაც საზოგადოების მხარდაჭერის იმედი აქვს.

- ასეთ კრიზისულ სიტუაციაში ადამიანი ლოცულობ, გინდა, რომ უფალს შვილის გადაგარჩინა სთხოვო. ამიტომ ახლა ვიმყოფები ხვამლის წმინდა გიორგის სალოცავში და წმინდა მაქსიმეს საფლავიც მოვილოცეთ. მეგობრები, ახლობლები მოდიოდნენ და მეც წამოვყევი.

უფალს შევავედრე ჯაბას სიცოცხლე, ვთხოვე შვილი გადამირჩინოს. ასევე უფალს ვავედრებ ქველმოქმედ ხალხს, რომლებიც აგერ უკვე წლებია, დაუშურებლად გვერდში გვიდგანან და ჩემი შვილის გადარჩენაში ლომის წილი შეაქვთ. მათი ჯანმრთელობისთვის, კარგად ყოფნისთვის, ფინანსური კეთილდღეობისთვის ვლოცულობ. ღმერთმა ამრავლოს ქართველი ქველმოქმედი ხალხი.

ჯაბას მდგომარეობას კიდევ ერთხელ რომ მივუბრუნდე, ამ ეტაპზე თავს კარგად ვერ გრძნობს, მომატებულად აქვს გულყრის ეპიზოდები. აქამდე რატომღაც არ ვაქცევდი ყურადღებას და თურმე მასზე მთვარის ფაზებიც მოქმედებს და ზღვის მიქცევა-მოქცევაც...

კი, ასეთი ავადმყოფები მეტად მგრძნობიარეები არიან ბუნებრივი კლიმატის ცვალებადობაზე. ყოველთვის უჭირს ამ პერიოდების გადატანა და მასთან ერთად ჩვენც... ამ დროს განსაკუთრებული ყურადღების მიქცევა უნდა.

- ვინ უვლის ჯაბას?

- ჩემი მეუღლე. მისი წყალობით ჯაბას მოვლა არ აკლია, მაგრამ საბოლოოდ ყველაფერი ფინანსებამდე მიდის - წამალი, დამხმარე საშუალებები, გამოკვლევა, პამპერსი, ანუ ის, რაც საყოველთაო დაზღვევაში არ შედის. არის დამხმარე მედიკამენტები, რომლებიც გაუთვალისწინებელი შემთხვევისთვის გვინდა.

წლებია, ასეთ დღეში ვართ, მაგრამ რომ არა ადამიანების მხარდაჭერა და თანადგომა, ალბათ, ფატალურად დამთავრდებოდა ყველაფერი. მე ისევ მათ დახმარებას ვითხოვ და ღვთის მადლით იმედიანად ვარ, რომ ყველაფერი კარგად იქნება.

საბანკო ანგარიშები, სადაც შეგიძლიათ დაეხმაროთ ჯაბას:

საქველმოქმედო ფონდი "ხომლი" ჯაბა მურცხვალაძის დასახმარებლად. ანგარიშის ნომერი:

საქართველოს ბანკი: GE42BG0000000162421607

თიბისი ბანკი: GE45TB7420136080100007

თიბისი ბანკი. მიმღები: გოგიტა მურცხვალაძე. ანგარიში: GE57TB7080645064300028

ლიბერთი ბანკი. ბანკის კოდი: LBRTGE22 მიმღების ანგარიში: GE04LB0711186007624000