ოქსფორდის კურსდამთავრებულ ნატალი საბანიძის ცხოვრება და კარიერა - რა ქონებას ფლობს ცნობილი დიპლომატი?
"პიროვნებები, რომლებმაც საკუთარი საეჭვო ბიზნეს საქმეებისთვის ჩვენი რუსეთის “ნაცრისფერ სივრცედ” გადაქცევა გადაწყვიტეს, უნდა დაისაჯონ!" - ამის შესახებ აშშ-ის კონგრესში, საქართველოს შესახებ მოსმენაზე საქართველოს ყოფილმა ელჩმა, ნატალი საბანაძემ განაცხადა.
საბანაძის გამოსვლას ქართული პოლიტიკური ისტებლიშმენტი უარყოფითად გამოეხმაურა. მმართველი პარტიის მხარდამჭერები წერენ, რომ ყოფილი ელჩი გიორგი გახარიას პარტია "საქართველოსთვის“ წევრია და ამ მოსმენაზე მათ წარმოადგენდა. გაღიზიანდა "ნაციონალური მოძრაობაც“, რადგან საბანაძემ 10-15%-იანი პარტია უწოდა.
კონგრესში გამოსვლისას მიხეილ სააკაშვილის მხარდამჭერთა შესახებ დასმული კითხვის საპასუხოდ საბანაძემ განაცხადა:
"მიხეილ სააკაშვილის პარტიის მხარდაჭერა 10-დან 15 პროცენტამდეა და მისი მხარდაჭერაც ამით შეიძლება შევაფასოთ. იგი ციხეში კი არა, საავადმყოფოში იმყოფება. ევროპულმა სასამართლომ აღნიშნა, რომ მისი მდგომარეობა დამაკმაყოფილებელია“.
საბანაძის გამოსვლას ანი წითლიძე გამოეხმაურა. მისი თქმით, "ნაციონალური მოძრაობის“ მხარდაჭერა მაშინაც კი იზრდებოდა, როცა "გიორგი გახარია დასრულებით ემუქრებოდა“.
"ნატალია საბანაძე გახარიას პარტიის წევრია. გადაეცით, მისი ლიდერი გახარია რუსულ რეჟიმს რომ ამაგრებდა და ბიძინა მესია ეგონა, სულ რაღაც 3-4 წლის წინ, არც, ანაკლიის პორტი რომ ჩააფლავა, თვალებს რომ თხრიდა ხალხს, "ნაცებს“ კი დასრულებით გვემუქრებოდა, მაშინაც კი იზრდებოდა "ნაცების“ ამომრჩეველი და დღემდე ყველაზე დიდი ოპოზიციური პარტიაა, მიუხედავად შიდა და გარე მიზანმიმართული რყევებისა. შესაბამისად, სააკაშვილის ამომრჩეველი კარგად დაითვალოს. გახარია რომ უყალბებდა არჩევნებს და საარჩევნო ტერორს ხელმძღვანელობდა, მაშინაც კი გახარიაზე ასჯერ მეტი პერსონალური ხმა ჰქონდა მიშას. ცოტა მეტი მომზადება არ აწყენდა“, - დაწერა წითლიძემ სოციალურ ქსელში.
როგორც Ambebi. Ge-ს პარტია "საქართველოსთვის“ ოფისში განუცხადეს, ნატალი საბანაძე პარტიის წევრი არასოდეს ყოფილა.
"ნატა საბანაძე პარტიის წევრი არ ყოფილა. იგი ბოლო წლების განმავლობაში იყო გიორგი გახარიას მრჩეველი საერთაშორისო საკითხებში. ის პარტიული არასოდეს ყოფილა და უკვე მრჩეველიც აღარ არის. ის არის საერთაშორისო ურთიერთობების სამეფო ინსტიტუტის (ჩეთემ ჰაუსის) უფროსი მკვლევარი (Senior Research Fellow)“, - გვითხრეს პარტიაში.
-
ნატალია საბანაძის გზა ქართულ პოლიტიკაში
მომავალი დიპლომატი თბილისში დაიბადა. 1997 წელს დაამთავრა აშშ-ის სვართმორის და მოუნთ ჰოლიოკის კოლეჯები, საერთაშორისო ურთიერთობების მიმართულებით. 1999 წელს დაამთავრა ლონდონის ეკონომიკის სკოლა, სადაც საერთაშორისო ურთიერთობების სფეროში მაგისტრის ხარისხი მიიღო. ოქსფორდის უნივერსიტეტის დასრულების შემდეგ კი, 2005 წელს პოლიტიკისა და საერთაშორისო ურთიერთობების დოქტორის ხარისხი მიენიჭა.
2011-2013 წლებში საბანაძე ეროვნულ უმცირესობათა საკითხებში ეუთო-ს უმაღლესი კომისრის კაბინეტის აღმოსავლეთ ევროპის, კავკასიისა და ცენტრალური აზიის განყოფილების უფროსი გახლდათ. სხვადასხვა დროს მუშაობდა მიწვეულ მკვლევრად გერმანიაში, უმცირესობების საკითხებზე მომუშავე ევროპულ ცენტრში და ესპანეთში დეუსტოს უნივერსიტეტში; 2013-2021 წლებში საბანაძე ოცნების ხელისუფლებაში მოსვლიდან მალევე გახდა საქართველოს საგანგებო და სრულუფლებიანი ელჩი ბელგიის სამეფოსა და ლუქსემბურგის დიდ საჰერცოგოში და ევროკავშირთან საქართველოს მისიის ხელმძღვანელი.
2021 წლის 21 მარტს ნატალი საბანაძემ ელჩისა და ევროკავშირში საქართველოს მისიის ხელმძღვანელის თანამდებობა დატოვა. ამის შესახებ მან სოციალურ ქსელში დაწერა. საბანაძის გადადგომას წინ უსწრებდა გიორგი გახარიას პრემიერ-მინისტრობიდან წასვლა. შეგახსენებთ, რომ გახარიამ პრემიერის პოსტი 2021 წლის 18 თებერვალს დატოვა.
ოთხ თვეში ცნობილი ხდება, რომ ნატალი საბანაძე საერთაშორისო საკითხებში გიორგი გახარიას მრჩეველი ხდება.
როგორც გახარიამ იმჟამად ჟურნალისტებს განუცხადა, აღნიშნული ფაქტი მისი გუნდის გაძლიერებისთვის კიდევ ერთი წინგადადგმული ნაბიჯი იქნებოდა.
ნატალი საბანაძის ბოლო ქონებრივ დეკლარაციაში, რომელიც ქართულ პოლიტიკაში ყოფნისას, ბოლოს 2022 წლის ივლისს შეავსო, ვკითხულობთ, რომ დიპლომატს ოჯახის წვერებად მითითებული ჰყავს დედა, ნინო სარაული და ქალიშვილი - ნია პატრისია ვაილდი, რომელიც 2007 წელს ჰააგაში შეეძინა.
ნატალი საბანაძის მფლობელობაშია მსუბუქი ავტომანქანა Volvo CX60, რომელშიც 2021 წელს 15 400 დოლარი გადაიხადა. დიპლომატმა ავტომანქანა აშშ-ში შეიძინა და ნივთის ადგილსამყოფლად ამერიკაა მითითებული.
ქონებრივი დეკლარაციის შევსებისას, ნატალი საბანაძეს თიბისი ბანკის სახელფასო ანგარიშზე 50 ლარი ერიცხებოდა.
საპენსიო ფონდი Utmost Worldwide-ზე 410 775 დოლარი. ანაბრის სახით BNP Paribas-ზე 3788,53 ევრო, ხოლო Citizens Bank-ის სახელფასო ანგარიშზე 20 300 დოლარი.
დედას, ნინო სარაულს "ლიბერთი ბანკის" საპენსიო ანგარიშზე 300 ლარი ერიცხებოდა.
ნატალი საბანაძემ დიპლომატიური სამსახურში, ევროკავშირში ბელგიის სამეფოში საქართველოს საგანგებო და სრულუფლებიანი ელჩის თანამდებობაზე 2021 წელს ხელფასის სახით 24 220 ევრო მიიღო.
აშშ-ში, მაუნთ ჰოლიოკის კოლეჯში მოწვეული პროფესორის რანგში კი, ერთ კალენდარულ წელში 34 500 დოლარი.
დიპლომატმა ბინის ქირაში 2020-2021 წლებში სულ 2560 და 12 300 ევრო გადაიხადა.
ჯანმრთელობის დაზღვევაში 600 ევრო.
2022 წელს ნატალი საბანაძეს 1000 დოლარად ღირებული ლეპტოპი მაკბუქი აჩუქეს. ხოლო თავად დიპლომატმა შვილის ნია პატრისია ვაილდის სწავლის გადასახადში 6 720 ევრო გაიღო.
იხილეთ ასევე: