როგორ აღინიშნა სოხუმის თეატრში ბავშვთა დაცვის დღე - საჩუქარი პატარებს

1-ელ ივნისს, ბავშვთა დაცვის საერთაშორისო დღე, ყოველთვის სხვადასსვა გასართობი და შემეცნებითი ხასიათის ღონისძიებებით აღინიშნება. სწორედ ამ თარიღთან დაკავშირებით, 2024 წლის 1-ელიდან 4 ივნისის ჩათვლით, ტრადიციულად თბილისში, უკვე მეოთხედ გოგი თოდაძის სახელობის თბილისის საბავშვო და ახალგაზრდული თეატრების საერთაშორისო ფესტივალი / Tbilisi Children & Youth International Theatre Festival დაანონსდა.

წლევანდელ ფესტივალზე საქართველოს ჩათვლით მონაწილეობს 6 ქვეყანა - 10-მდე სპექტაკლით; რომელთა პროგრამა სხვადასხვა ლოკაციებზეა წარმოდგენილი. (თბილისის გარდა, წელს პირველად სპექტაკლები წარმოდგენილი იყო მარნეულშიც). ასევე ბავშვებისა და ახალგაზრდებისთვის თეატრის მიმართულებით დაიგეგმა საერთაშორისო ვორქშოფები, როგორც დრამატული, ისე თოჯინური თეატრის მიმართულებით.

ისევე როგორც შარშან, (როცა 2 დღის განმავლობაში, სოხუმის თეატრის სცენაზე აღნიშნული ფესტივალის ფარგლებში ისრაელის ბერ შევის ბავშვთა და მოზარდთა თეატრის სპექტაკლი „მთვარეზე და უკან“ იყო წარმოდგენილი), წელსაც სოხუმის თეატრი აღნიშნული ღონისძიების ერთ-ერთი თანაორგანიზატორი და მასპინძელი გახლდათ.

ფესტივალი ბავშვთა დაცვის დღეს 1-ელ ივნისს, 20.00 სთ-ზე სოხუმის დრამატულ თეატრში (მის: დ. უზნაძის ქ. N68) გაიხსნა. ღონისძიების დაწყებისას, დამსწრე აუდიტორიას ეროვნული სასახლის დირექტორმა თიკა რუხაძემ და ფესტივალის დირექტორმა ლევან ხეთაგურმა მიმართეს და ბავშვთა დაცვის დღე მიულოცეს. შემდეგ კი, ფესტივალის გახსნის პირველი ნაწილი ეროვნული სასახლის ანსამბლების პროგრამას დაეთმო, ხოლო მეორეზე ჩინეთის თეატრის ასოციაციის საბავშვო თეატრმა, საქართველოში საგასტროლო სპექტაკლიდან ნაწყვეტები გაითამაშა.

სოხუმის თეატრი 2 ივნისსაც მთელი დღის განმავლობაში მასპინძლობდა პატარებსა და მოზარდებს. თავისუფალი დასწრების ფარგლებში წარმოდგენილი იყო სპექტაკლები: „აისია“ (მარნეული, საქართველო), „პატარა პრინცი“ (სომხეთი) და „ხმაური და ტროლები მთებში“ (საფრანგეთი/საქართველო).

ლევან ხეთაგური (თეატრმცოდნე, თეატრალური ფესტივალის დირექტორი, იუნესკოს თეატრის საერთაშორისო ინსტიტუტის საქართველოს ცენტრის გენერალური მდივანი):

- წელს ფესტივალი მეოთხედ ტარდება, იცვლება მონაწილეთა გეოგრაფია, იზრდება ფორმათა მრავალფეროვნება, მაყურებელთა გამოცდილება. წლევანდელი ფესტივალის სიახლე ჩინური საბავშვო თეატრის მონაწილეობაა, რომელიც ტრადიციულ სიჩუს /ე.წ. პეკინის ოპერას/ წარმოადგენს. შესაბამისად ერთი ვორქშოფიც მიეძღვნება ტრადიციულ ჩინურ თეატრს და ასევე ამერიკულ სამსახიობო იმპროვიზაციულ მეთოდოლოგიას. ფესტივალი კვლავ ითვალისწინებს პრინციპს პროფესიულ თეატრს ბავშვებისთვის და ბავშვების მიერ შექმნილ თეატრს. ვამაყობთ, რომ 2023 წლიდან მოყოლებული წელს ფესტივალმა კვლავ მიიღო ევროპის ფესტივალების ასოციაციის EFFE ხარისხის 2024/25 წლის ნიშანი და ეს ჩვენთვის დიდი პატივია.

ორგანიზატორების განმარტებით, ფესტივალის მიზანი თეატრალური ხელოვნების პოპულარიზაცია, ნიჭიერი ახალგაზრდების წარმოჩენა, საბავშვო და ახალგაზრდული თეატრალური სტუდიების საერთაშორისო თანამშრომლობის ხელშეწყობა, მოზარდთა შემოქმედების ერთმანეთისთვის გაცნობა და გამოცდილების გაზიარებაა. იმედი აქვთ, რომ სამომავლოდ ფესტივალი კიდევ უფრო მეტ ბავშვს მოიცავს და სოხუმის დრამატული თეატრიც კვლავ დიდი სიამოვნებით მიიღებს მონაწილეობას პატარებისთვის სიხარულის მინიჭებაში.

R