ჩრდილოეთ კორეამ სამხრეთში საჰაერო ბურთებით ნაგავი გაგზავნა - "ვაფრთხილებთ დაუყოვნებლივ შეწყვიტოს ეს არაადამიანური და უაზრო ქმედება"

ჩრდილოეთ კორეამ სამხრეთ კორეაში მინიმუმ 150 საჰაერო ბურთი გაუშვა, რომლებშიც პროპაგანდისტული ბროშურები და საყოფაცხოვრებო ნარჩენები იყო მოთავსებული. ამის გამო, სამხრეთ კორეის ხელისუფლებამ მოსახლეობას შენობებში დარჩენისკენ მოუწოდა.

სამხრეთ კორეის სამხედროებმა საზოგადოება გააფრთხილეს, რომ არც თეთრ ბურთებს და არც მათზე მიმაგრებულ პარკებს არ შეხებოდნენ, რადგან "მათში ბინძური ნარჩენები და ნაგავი იყო მოთავსებული".

• ასეთი ბურთები სამხრეთ კორეის ცხრა პროვინციიდან რვაში აღმოაჩინეს და ახლა მომხდარს შესაბამისი ორგანოები აანალიზებენ. როგორც სამხრეთ კორეის საინფორმაციო სააგენტო Yonhap იტყობინება, ზოგიერთ ბურთში, სავარაუდოდ, ფეკალიებიც კი იყო მოთავსებული...

აღსანიშნავია, რომ 1950-იანი წლების კორეის ომის შემდეგ ჩრდილოეთ და სამხრეთ კორეას თავიანთ პროპაგანდისტულ კამპანიებში მსგავსი ბურთები არაერთხელ გამოუყენებიათ. ჩრდილოეთმა ბურთების გაგზავნის გადაწყვეტილება მას შემდეგ მიიღო, რაც სამხრეთ კორეელმა აქტივისტებმა სასაზღვრო რაიონებში ანტიფხენიანური ბროშურები, მეხსიერების ბარათებზე ჩაწერილი კორეული მუსიკა და ვიდეო კლიპები მსგავსი ბურთებით გაგზავნეს.

სეულის ჩრდილოეთით და სასაზღვრო რეგიონებში მცხოვრებლებმა თავიანთი პროვინციული ხელისუფლებისგან შეტყობინება მიიღეს, რომელშიც მათ სთხოვდნენ, გარე აქტივობებისგან თავი შეეკავებინათ და უცხო ობიექტის შემჩნევის შემთხვევაში, უახლოეს სამხედრო ბაზაზე ან პოლიციის განყოფილებაში განცხადება დაეწერათ.

ქვეყნის სამხედროებმა ეს ქმედება დაგმეს და შეაფასეს, როგორც საერთაშორისო სამართლის აშკარა დარღვევა:

"ჩვენ მკაცრად ვაფრთხილებთ ჩრდილოეთ კორეას, დაუყოვნებლივ შეწყვიტოს ეს არაადამიანური და უაზრო ქმედება", - განაცხადეს მათ.

წყარო:bbc

მოამზადა: ანა სიბოშვილმა