"ბიძინა იანუკოვიჩი", "ნეკროფილური გამოსვლა", "ივანიშვილის მონები"... - პარლამენტში პრეზიდენტის ვეტოს განხილვა ურთიერთბრალდებებით დაიწყო
"პარლამენტი უცხოური გავლენის გამჭვირვალობის შესახებ“ კანონზე პრეზიდენტის მოტივირებულ შენიშვნებს და მასზე თანდართულ კანონპროექტს განიხილავს. ვეტოს დაძლევის შემთხვევაში, თუ პრეზიდენტი კანონს დადგენილ ვადაში ხელს არ მოაწერს, მას 5 დღის ვადაში ხელს პარლამენტის თავმჯდომარე მოაწერს... განხილვა საკანონმდებლო ორგანოში ხმაურით მიმდინარეობს.
"ნაციონალური მოძრაობის“ დეპუტატმა დავით ხაჯიშვილმა პარლამენტის პლენარულ სხდომაზე ბიძინა ივანიშვილს "ბიძინა იანუკოვიჩი“ უწოდა, საპასუხოდ კი პარლამენტის თავმჯდომარე შალვა პაპუაშვილმა თქვა, რომ "ქართველი იანუკოვიჩი“ მიხეილ სააკაშვილია და ის დღეს ციხეში ზის.
ოპოზიციონერი პოლიტიკოსის, თინა ბოკუჩავას თქმით, დღევანდელი დღე არის ბოლო შესაძლებლობა უმრავლესობის თითოეული დეპუტატისთვის, რომ, ერთი მხრივ, თავი გადაირჩინოთ პერსონალური სანქციებისგან და მეორე მხრივ, ქვეყნის ევროატლანტიკურ არჩევანს აარიდონ უდიდესი დარტყმა.
"დღეს დილით დავბრუნდი ბულგარეთიდან, სოფიადან, სადაც იმართებოდა ნატო-ს საპარლამენტო ასამბლეის სხდომა. ნატო-ს საპარლამენტო ასამბლეამ ერთხმად მიიღო დეკლარაცია, სადაც კატეგორიულად მოუწოდებს საქართველოს ხელისუფლებას, დაუყოვნებლივ გაიწვიოთ ე.წ. "აგენტების კანონი“. ნატო-ს საპარლამენტო ასამბლეის პრეზიდენტის ინიციატივით, ბიურომ, ასევე, მოუწოდა და შესაბამისად, ნატო-ს წევრმა ყველამ ქვეყანამ, ასევე, კატეგორიულად მოუწოდა საქართველოს ხელისუფლებას, გაიწვიოს აღნიშნული კანონი. მინდა გითხრათ, რომ ივანიშვილის დეპუტაციას ან საერთოდ აღარ ხვდებიან საერთაშორისო პარტნიორები, ან ხვდებიან მხოლოდ იმიტომ, რომ გააფრთხილონ იმ მძიმე შედეგების შესახებ, რომელიც ელის ყველას, ვინც ძირს უთხრის საქართველოს დემოკრატიას. დელეგაციის ხელმძღვანელის, ხატია წილოსანის სამარცხვინო და მოღალატეობრივ არგუმენტებს აღარავინ ისმენდა, თურმე როგორ აწყობდნენ არასამთავრობო ორგანიზაციები რევოლუციას საქართველოში ორჯერ. დღეს პრეზიდენტი ზურაბიშვილის ვეტოს გათვალისწინება, არის კანონის გაწვევის უკანასკნელი შანსი. მე ამ დარბაზში, თუ მის მიღმა, იშვიათადღა მოგმართავთ ხოლმე ივანიშვილის დეპუტაციას, რადგან ვხედავ, რომ ქვეყნის ინტერესები ივანიშვილის მონობაში გაცვალეთ. მაგრამ უკანასკნელად მინდა მოგმართოთ დღეს - დღევანდელი დღე არის ბოლო შესაძლებლობა თითოეული თქვენგანისთვის, რომ, ერთი მხრივ, თავი გადაირჩინოთ პერსონალური სანქციებისგან და მეორე მხრივ, რაც ჩემთვის ყველაზე მნიშვნელოვანია, ქვეყნის ევროატლანტიკურ არჩევანს აარიდოთ უდიდესი დარტყმა. თითოეულ თქვენგანზეა დღეს დამოკიდებული, როგორ შევა დღევანდელი დღე საქართველოს უახლეს ისტორიაში - როგორც დღე, როდესაც კოლექტიური მონობით ივანიშვილის დეპუტაციამ გაყიდა ქვეყნის ევროპული პერსპექტივა, თუ დღე, როდესაც თუნდაც რამდენიმე ადამიანის პერსონალურმა და პოლიტიკურმა გამბედაობამ ქვეყანა გადაჩეხას გადაარჩინა. თითოეულ თქვენგანს აქვს არჩევანი ქვეყნის ინტერესების დაცვასა და ვერშემდგარი დიქტატორის, ივანიშვილის, მონურ მსახურებას შორის. თითოეულ თქვენგანს აქვს არჩევანი თავისუფლებასა და მონობას შორის. დღეს არის არჩევანი თქვენ წინაშე - რუსი ოლიგარქის "რუსული კანონის“ დაცვა საქართველოს რუსეთთან პირისპირ დატოვების მიზნით, თუ საქართველოს ევროპული მომავლის გადარჩენა. არასდროს ყოფილა ასეთი მკაფიო არჩევანი. ეს არჩევანი ჩვენი ქვეყნის არჩევანი და შანსი აღარ მოგეცემათ თქვენ, რომ არ ჩაეწეროთ ქვეყნის უახლეს ისტორიაში, როგორც მოღალატეები. არ არსებობ იმაზე მძიმე განაჩენი, ვიდრე განაჩენი, რომელიც შენს ხალხსა და ისტორიას გამოაქვს. ღალატის დამღით ივლით მთელი დარჩენილი ცხოვრება. საქართველო მაინც გაიმარჯვებს, გაიმარჯვებენ ახალგაზრდები და მათთან ერთად გავიმარჯვებთ ჩვენ, ადამიანები, ვინც ყველა ასპარეზზე ვიბრძვით ჩვენი ქვეყნის ევროპული მომავლის გადასარჩენად. ივანიშვილის პოლიტიკური სამარე გათხრილია და თქვენ რომ შეგეძლოთ გამოსვლა და დადგომა იმ ახალგაზრდებთან, რომლებიც ყოველდღიურად იცავენ ჩვენი ქვეყნის ევროპულ მომავალს, ამას საკუთარი თვალით დაინახავდით, ჩახედავდით ივანიშვილის პოლიტიკურ სამარეს თვალებში. არჩევანი კი თქვენზეა - ჩაჰყვებით ივანიშვილს პოლიტიკურ სამარეში თუ არა!“ - განაცხადა თინა ბოკუჩავამ.
თინა ბოკუჩავას სიტყვით გამოსვლის შემდეგ, პარლამენტის თავმჯდომარემ კომენტარი გააკეთა და "ნაციონალური მოძრაობის" ერთ-ერთი ლიდერის გამოსვლას ნეკროლოგიური უწოდა.
"ზედმეტად ნეკროფილური გამოსვლა იყო, მგონი", - აღნიშნა პაპუაშვილმა.
"უცხოური გავლენის გამჭვირვალობის შესახებ“ კანონის მიღებით აშშ-თან თუ ევროკავშირთან ურთიერთობები ვერ დაზიანდება - ეს კანონი მიმართული არ არის ქართულ-ამერიკული სტრატეგიული ურთიერთობის წინააღმდეგ! კანონი ამ ურთიერთობის არცერთ ასპექტს არ ეხება! - ეს განცხადება პარლამენტის პლენარულ სხდომაზე “ქართული ოცნების“ დეპუტატმა ირაკლი ქადაგიშვილმა გააკეთა.
როგორც ქადაგიშვილმა ამ კონტექსტში აღნიშნა, სუვერენული ქვეყნის საკანონმდებლო საქმიანობა არც ერთი საერთაშორისო სტანდარტით სანქცირებას არ ექვემდებარება, სანქცია არის კონტრპროდუქტიული, არაეფექტური და სანქციით შანტაჟი მიზანს ვერ მიაღწევს.
მისივე თქმით, ქართულმა საზოგადოებამ უნდა გაცნობიეროს, რომ საქართველო არის სუვერენული სახელმწიფო, მას აქვს უფლება იცოდეს, რა ხდება ქვეყანაში და ქვეყნის გარშემო, ამასთან დაკავშირებით შესაბამისი კანონები მიიღოს და ასეთი სუვერენიტეტით აღჭურვილი საერთაშორისო ურთიერთობების სუბიექტი იყოს.
“დღეს ჩვენ მოგვიწევს ვეტოს დაძლევა კანონპროექტზე, რომელსაც ვეტო პრეზიდენტად წოდებულმა დაადო. გუშინ, ჩვენ იურიდიულ საკითხთა კომიტეტის სხდომაზე, იმ საცოდავ მდგომარეობას ვუსმენდით, როდესაც ვეტოს დამდებს არც ერთი სამართლებრივი არგუმენტი არ ჰქონდა - სამართლებრივი შენიშვნაც კი არ ჰქონდა იმასთან დაკავშირებით თუ რატომ არის გამჭვირვალობის შესახებ კანონპროექტი ცუდი, რატომ არის ის რუსული, რატომ არის დისკრიმინაციული, რატომ არის ანტიდემოკრატიული. ამ კანონის გარშემო ათასი ცოდვა ითქვა, მაგრამ არასდროს არ თქმულა, თუ რატომ არის გამჭვირვალობა ცუდი.
ამიტომ ჩვენ დავინახეთ, რომ არც ერთი სამართლებრივი არგუმენტი არ არსებობს, მაგრამ არსებობს უამრავი სპეკულაცია ამასთან დაკავშირებით - ადამიანის სექსუალური ცხოვრებიდან დაწყებული, დამთავრებული საქართველოს ოკუპირებული ტერიტორიების არაღიარების პოლიტიკის ჩამოშლით. ყველაფერზეა ლაპარაკი, რაც კი დედამიწის ზურგზე ადამიანმა შეიძლება მოიფიქროს, ოღონდ არ იყოს ლაპარაკი, რომ გამჭვირვალობის არის დემოკრატიის და ევროპის ერთ-ერთი უმთავრესი მოთხოვნა.
როდესაც სამართლებრივი არგუმენტები ამოწურულია, ხდება იმით შანტაჟირება, რომ გინდა თუ არა საქართველოს სანქციები დაემუქრება, სანქციები დაემუქრება დეპუტატებს და ასე შემდეგ.
სუვერენული ქვეყნის საკანონმდებლო საქმიანობა არც ერთი საერთაშორისო სტანდარტით სანქცირებას არ ექვემდებარება - ეს კანონი მიმართული არ არის ქართულ-ამერიკული სტრატეგიული ურთიერთობის წინააღმდეგ, კანონი ამ ურთიერთობის არც ერთ ასპექტს არ ეხება.
ამ ვითარებაში სანქციებზე საუბარი ამ ურთიერთობებისთვის არის კონტრპროდუქტიული, დამაზიანებელი და მათ ინტერესებში შედის, ვისაც ქართულ-ამერიკული სტრატეგიული ურთიერთობები არ მოსწონს.
ჩვენ ჩვენი პოლიტიკური და გეოსტრატეგიული მიზნები არ შეგვიცვლია. ყველას, ქვეყნის შიგნით თუ ქვეყნის გარეთ მოვუწოდებთ - ამ ურთიერთობებით ვიყოთ ორმხრივად ღია, არა ორმაგი სტანდარტებით, გავიზიაროთ ერთმანეთის კანონიერი წუხილები და ვიაროთ ერთმანეთთან დაკავშირების გზით“, - განაცხადა ქადაგიშვილმა პარლამენტის სხდომაზე.
- ლევან ხაბეიშვილის შეფასებით, "ქართული ოცნების“ წარმომადგენლები ყველაფერზე მიდიან, რომ კრემლიდან გაცემული ბრძანება შეასრულონ.
"თქვენი მთავარი მიზანი საქართველოს პარლამენტში უნდა წარმოადგენდეს ქართველ ხალხზე ზრუნვას და მთელი ამ წლების განმავლობაში, 12 წელზე მეტია ხელისუფლებაში ხართ, თქვენი საქმიანობა უნდა უკავშირდებოდეს ხალხს, ხალხის პრობლემების მოგვარებას, გადასახადების შემცირებას, ადამიანებისთვის სამსახურის შექმნას, ასევე, უკეთესი მომავლის შექმნას, სტუდენტების დასაქმებას. ამ წლების განმავლობაში, შესაძლოა, აქ ცხარე კამათი ყოფილიყო ხალხის კეთილდღეობაზე, ახალგაზრდების კეთილდღეობაზე, მაგრამ 12 წლის თავზე, თქვენ ხელისუფლებას ასრულებთ და მათ შორის, დიდი ნაწილი საპარლამენტო ცხოვრებას ისე, რომ ადამიანებს თავს ამახსოვრებთ, როგორც კანონშემოქმედები, რომლებიც საქართველოს ევროკავშირს აშორებთ, კარებში ეჩხირებით ფაქტობრივად, ქართველ ხალხს და ევროკავშირს შორის. ამიტომ თქვენ უნდა გესმოდეთ ის პასუხისმგებლობა, რომელიც ისტორიის წინაშეც გექნებათ.
გულწრფელად გეტყვით, არცერთი თქვენგანის სანქცია არ გამიხარდება, უბრალოდ თქვენ იქცევით ისე, რომ იძულებულია, მათ შორის ჩვენი სტრატეგიული პარტნიორი ასე მოიქცეს. მაგალითად, მე გამიხარდებოდა, რომ თქვენ არ დაგეძლიათ ვეტო, ეს კანონი არ ამოქმედეს და ხალხს 5 თვის თავზე არჩევნებზე გადაეწყვიტა, თუნდაც ამ კანონის ბედი, მაგრამ თქვენ ძალმომრეობით, ადამიანების ლეწვა-მტვრევით, გატაცებით, სახლებთან დახვედრებით, ოჯახების დაწიოკებით, გინდათ ეს კანონი მიიღოთ, არა და თქვენ ხომ ამბობდით, რომ "თქვენ არცერთი ადამიანის თმის ღერი არ გიღირდათ არანაირ კანონად“, მაგრამ ახლა ისე დაიჟინეთ, ეს კონკრეტული დავალება, რომელიც კრემლიდან გაქვთ, რომ ეს აღასრულოთ, აბსოლუტურად, ყველაფერზე მიდიხართ.
პირდაპირ გეუბნებით, თქვენს გამო ძალიან ვღელავ, იმიტომ, რომ იმ პრობლემებს ვერ აცნობიერებთ, რომლებიც თქვენ გექნებათ, ასევე თქვენს გარშემო ადამიანებს ექნება. ყველას ძალიან მძიმე მდგომარეობაში აყენებთ. ამ თვეების განმავლობაში, ყველა ზღვარს გადახვედით. პროპაგანდირებთ, რომ სუვერენიტეტს იცავთ აშშ-სგან. უკაცრავად, მაგრამ საქართველოს უსაფრთხოების მთავარი გარანტი, სწორედ ჩვენი სტრატეგიული პარტნიორი ამერიკის შეერთებული შტატებია. თქვენ მუჭი მოუღერეთ სტრატეგიულ პარტნიორს, თითებს უქნევთ, ღალატში ადანაშაულებთ, რომ თურმე ისინი ჩვენი მეგობრები არ არიან. ძვირფასებო, დაგავიწყდათ, რომ საქართველოს ტერიტორიები ოკუპირებულია? დაგავიწყდათ, რომ ჩვენ მართლა და მთავარ მტერს, პუტინს ერთი სული აქვს, რომ საქართველო რუსეთის გუბერნიად გადააქციოს? - თქვენ ამაში ხელს უწყობთ, აი, ამ "რუსული კანონით“, - განაცხადა ხაბეიშვილმა.
იხილეთ ასევე:
- "მიჩივლეთ... არ გრცხვენიათ?" - სიტყვიერი დაპირისპირება შალვა პაპუაშვილსა და ხატია დეკანოიძეს შორის
- "წარმოიდგინეთ, უდაბნო, მშრალი, ყამირი მიწა და ბუნდოვანი ჰორიზონტი - ეს არის პოლიტიკური მომავალი ამ ადამიანებისა, ვინც აპირებს "რუსულ კანონს“ მხარი დაუჭიროს" - დეკანოიძე
- "რად გიღირთ სკამი, როცა "რობოკოპების“ და კრიმინალური პოლიციის გარეშე სესია და კომიტეტის სხდომები ვერ ჩაგიტარებიათ" - ანა წითლიძე
- "ვის მკვდარს ტიროდით ირანში, როდესაც გაკოტრებულები, სრულიად ბანკროტები ხართ პოლიტიკურ ასპარეზზე?!" - ეკა ხერხეულიძე