მადრიდის "რეალი" ლეგენდას ემშვიდობება - "ჩემი შვილების ცრემლებმა გამანადგურა..." (ფოტო/ვიდეო)
ესპანური ლა ლიგის ბოლო, 38-ე ტურში "რეალმა" "ბეტისს" უმასპინძლა, მატჩი ფრედ 0:0 დასრულდა.
"სანტიაგო ბერნაბეუზე" უკანასკნელი მატჩი ჩაატარა ლეგენდარულმა ტონი კროოსმა. მოგეხსენებათ, გასულ კვირას გერმანელმა განაცხადა, რომ ევროპის ჩემპიონატის შემდეგ ბუცებს ლურსმანზე ჩამოკიდებდა. ამ გადაწყვეტილებას "რეალში" კროოსის მეწყვილე ლუკა მოდრიჩი გამოეხმაურა და გერმანელს მიმართა.
"ამის დაწერა ძალიან რთულია. ახლა საფეხბურთო სამყარო სევდიანია, რადგან უნიკალური ფეხბურთელი მიდის. ვერ დავმალავ, ძალიან ვწუხვარ. შენ ამ სპორტისა და მადრიდის "რეალის" ლეგენდა ხარ. ამ კლუბის მაისურით შენთან ერთად თამაში უდიდესი პატივი იყო. შენ გაქვს ის თვისებები, რომლებიც უნიკალურს გხდის, სხვა ტონი კროოსი აღარასდროს დაიბადება.
არაერთი ევროპული ტიტული და მაგია "ბერნაბეუზე". ყველაფერს მიაღწიე, თუმცა არის კიდევ რაღაც, რაც აუცილებლად უნდა გავაკეთოთ. მოდი, მოვიგოთ მე-15 ჩემპიონთა ლიგა. მომენატრები, მეგობარო", - დაწერა მოდრიჩმა სოციალურ ქსელში.
დამშვიდობება ძალიან ემოციური გამოდგა, "ბერნაბეუზე" მყოფი გულშემატკივრები კროოსის სახელს სკანდირებდნენ. ცრემლები ვერც თავად გერმანელის შვილებმა შეიკავეს.
"მადრიდისტებო, ერთადერთი რამ, რაც მინდა გავაკეთო, არის ის, რომ მადლობა გადაგიხადოთ. 10 წლის განმავლობაში თავს ისე ვგრძნობდი, როგორც საკუთარ სახლში. ეს 10 წელი მართლაც დაუვიწყარი იყო. თავს შესანიშნავად ვგრძნობდი მანამ, ვიდრე ჩემი შვილები არ დავინახე, მათმა ცრემლებმა გამანადგურა", - განაცხადა კროოსმა.
ტონი მადრიდის "რეალს" 2014 წელს, მიუნხენის "ბაიერნიდან" 25 მილიონი ევროს სანაცვლოდ შეუერთდა, გერმანელმა "თეთრების" მაისურით 464 მატჩი ჩაატარა, 28 გოლი გაიტანა და 98 საგოლე პასი მიითვალა. კროოსსმა "რეალთან" ერთად 22 ტიტულის მოგება მოახერხა, სულ მალე კი ამ რიცხვის გაზრდას ჩემპიონთა ლიგის ფინალში "დორტმუნდთან" მოგებით შეეცდება.
შეგახსენებთ, "რეალისა" და "დორტმუნდის" დაპირისპირება 1-ელ ივნისს, თბილისის დროით 23:00 საათზე გაიმართება.