"მოღალატეებს დიდ ხანს ვერ დაიცავთ. ბოლოს ყველანი ჩვენ მხარეს უნდა გადმოხვიდეთ" - მორიგი აქცია-მსვლელობა თბილისში და სამართალდამცავები "ოცნების" ოფისთან (ფოტოები)

თბილისში ე.წ. აგენტების კანონის საწინააღმდეგო მორიგი აქცია-მსვლელობა იმართება. მომიტინგეები თავისუფლების მოედნიდან დაიძრნენ და მტკვრის მარჯვენა სანაპიროს გავლით, შინაგან საქმეთა სამინისტროს შენობამდე მიდიან. აქციის მონაწილეებს გაშლილი აქვთ დიდი ბანერი წარწერით, "ემსახურეთ საქართველოს", ასევე აქციაზე ბევრია საქართველოს, ევროკავშირისა და ამერიკის შეერთებული შტატების დროშები. აქცია-მსვლელობით ისინი აპროტესტებენ იმ პოლიტიკას, რაც შინაგან საქმეთა სამინისტროს აქვს, მათ შორის, იგულისხმება "აგენტების კანონის" მოწინააღმდეგე დემონსტრანტების დაკავება, დაჯარიმება და მათ წინააღმდეგ ადმინისტრაციული საქმეების წარმოება.

რუსული კანონის გაწვევა არის უმთავრესი რასაც საქართველოს მოსახლეობა მეორე თვეა მოითხოვს. პრეზიდენტის ვეტოს განხილვამდე პროტესტში ჩართულები კიდევ ერთხელ მოუწოდებენ ბიძინა ივანიშვილის ხელისუფლებას გააუქმოს რეპრესიული კანონი.

"თავისუფლების მარშის“ მონაწილეები, რომლებიც შსს-ს მიმართულებით მსვლელობას მართავენ, "ქართული ოცნების“ ოფისთან შეჩერდნენ, სადაც სამართალდამცველები იყვნენ მობილიზებული.

"რომ იცოდეთ, ამ მოღალატეებს დიდ ხანს ვერ დაიცავთ. ბოლოს ყველანი ჩვენ მხარეს უნდა გადმოხვიდეთ. სირცხვილი!” - მიმართავდნენ აქციის მონაწილეები სამართალდამცავებს.

შეგახსენებთ, რომ პროტესტის მონაწილეების ნაწილი რუსთაველის მეტროსთან, ხოლო ნაწილი საკანონმდებლო ორგანოს წინ შეიკრიბა და მათ მსვლელობა ამ ლოკაციებიდან დაიწყეს.

დღევანდელი მარშის იდეაც იმაში მდგომარეობს, რომ დავაფიქსიროთ სოლიდარობა ჩვენი პატრიოტი მოქალაქეების მიმართ და შევახსენოთ და დავანახოთ შინაგან საქმეთა სამინისტროს საკუთარი თავი, - ამის შესახებ განაცხადა "საქართველოს ევროპული ორბიტის“ ხელმძღვანელმა, ნინო ლომჯარიამ, რომელიც შინაგან საქმეთა სამინისტროსკენ მიმავალ "თავისუფლების მარშს“ შეუერთდა.

ნინო ლომჯარიას განცხადებით, "თავისუფლების მარშის“ მონაწილეები იმ სამართალდამცავების დასჯას ითხოვენ, ვინც "უცხოური გავლენის გამჭვირვალობის შესახებ“ კანონპროექტის საწინააღმდეგო აქციებზე დანაშაულები ჩაიდინა.

"საქართველოს ათეულობით მოქალაქე, მშვიდობიანი მანიფესტანტები სცემეს. მათ შორის დაკავების შემდგომ პოლიცია ფიზიკურად გაუსწორდა მათ სასტიკად. ადამიანებს დახვდნენ სადარბაზოებთან და სცემეს. ათასობით საქართველოს მოქალაქეს დაურეკეს, დაემუქრნენ. 200-მდე მოქალაქეა დაჯარიმებული უსაფუძვლოდ და დაუსაბუთებლად. პოლიციის მხრიდან არცერთი ადამიანი არ არის პასუხისგებაში მიცემული, არც პასუხისმგებელი პირები და არც შემსრულებლები. დღევანდელი მარშის იდეაც იმაში მდგომარეობს, რომ დავაფიქსიროთ სოლიდარობა ჩვენი პატრიოტი მოქალაქეების მიმართ და შევახსენოთ და დავანახოთ შინაგან საქმეთა სამინისტროს საკუთარი თავი. მოვითხოვთ ყველა იმ ადამიანის დასჯას, ვინც დანაშაულები ჩაიდინა“, - განაცხადა ნინო ლომჯარია.

• განახლება: 23:54

შინაგან საქმეთა სამინისტროსთან "თავისუფლების მარში“ დასრულდა

აქციის მონაწილეებმა ორი აქცია დააანონსეს. ახალგაზრდები ხვალ, 25 მაისს, 09:00 საათზე, თსუ-ს მე-2 კორპუსთან გეგმავენ მისვლას, სადაც პრემიერ-მინისტრმა ირაკლი კობახიძემ ლექცია უნდა წაიკითხოს.

ამასთან, მორიგი აქცია 26 მაისს, ვაკის პარკთან გაიმართება.