ხელნაკეთი თოჯინები, რომელსაც თქვენი ვიზუალის შესაბამისად შექმნიან - ინტერვიუ ავტორთან
ლიტერატურული აღმოჩენების ყუთის „ლიტბოქსის“ გამომწერებს სიახლე ელოდებათ - ისინი წიგნებთან და სხვადასხვა საინტერესო აქსესუართან ერთად საჩუქრად ხელნაკეთ დეკორაციულ თოჯინებს მიიღებენ. თითოეული თოჯინა ექსკლუზიურია, ხელით იქმნება და არ მეორდება, რაც მის განსაკუთრებულობას უსვამს ხაზს.
პატარა თოჯინებს 33 წლის თეკო ძნელაძე ქმნის. როგორც თავად გვიამბო, თითოეული თოჯინა პერსონაჟია, რომელიც საკუთარ ამბავს ჰყვება, შეიძლება, ის კონკრეტული პიროვნების ხასიათს, განწყობას გამოხატავდეს.
თეკომ თოჯინების შექმნა დაახლოებით ორი წლის წინ დაიწყო, თავდაპირველად, 5 წლის ქალიშვილისთვის, შემდეგ კი ჰობი საქმედ აქცია:
„მინდოდა ჩემი პატარა გოგონა გამეხარებინა და შევქმენი ნაძვის ხის ანგელოზი თოჯინები. ხელსაქმე ჩემთვის განტვირთვა და თერაპიაა, თითოეულ თოჯინას დიდი სიყვარულით ვქმნი.
თვითნასწავლი ვარ და ვფიქრობ, ხელსაქმის სიყვარული დედისგან გადმომეცა. ის ამ საქმის ნამდვილი ხელოვანია, ბავშვობაში ხშირად მეცვა ხოლმე მისი შეკერილი კაბები“, - აღნიშნავს ის.
როგორც თოჯინების ავტორი გვიამბობს, ყველაზე გამორჩეული ნამუშევარი მისთვის ცოლ-ქმარი თოჯინაა, რომელიც კონკრეტული ქორწილის ფოტოსურათის შესაბამისად დაამზადა. თოჯინების შექმნის პროცესი ძალიან სასიამოვნოა, თითოეული მათგანი გადმოსცემს თავის ხასიათს, ემოციებს“, - განმარტავს თეკო ძნელაძე.
თოჯინები მზადდება როგორც ინტერიერის დეკორისთვის, ისე გულსაბნევების, თმის სამაგრების სახით. ამასთან, შესაძლებელია, ავტორს უჩვენოთ თქვენი ან თქვენი საჩუქრის ადრესატის ფოტოსურათი და ის თავისი ფანტაზიით შესაბამის თოჯინას შექმნის.
„უმეტეს თოჯინას მომხმარებლის სურვილისამებრ ვქმნი, ადრესატის პორტრეტული შტრიხებით: თმის ფერი, თვალის ფერი, ჩაცმულობა. თითოეული თოჯინა მზადდება პერსონალურად, რაც მას მფლობელისთვის საყვარელ აქსესუარად აქცევს“, - განმარტავს თეკო ძნელაძე.
R