"ვგმობ და ვემიჯნები ყოველგვარ ძალადობას... მჯერა, რომ ძალადობრივი  ფაქტები გამოძიებული იქნება" - ღარიბაშვილი

"ქართული ოცნების“ თავმჯდომარის, ირაკლი ღარიბაშვილის განცხადებით, ყოველგვარ ძალადობას გმობს და ემიჯნება.

აღნიშნულის შესახებ ღარიბაშვილმა ჟურნალისტებს განუცხადა, როდესაც უპასუხა შეკითხვას მოქალაქეთა მიმართ განხორციელებულ ძალადობაზე.

"ვგმობ ძალადობას და ვემიჯნები ყოველგვარ ძალადობას, მაგრამ მოძალადეები რომ გველაპარაკებიან ახლა, რაღაც ცალკეულ ინციდენტებზე, ფაქტებზე, რომელიც რა თქმა უნდა, საჭიროებს თავის მხრივ გამოძიებას და მე მჯერა, რომ გამოძიებული იქნება ყველა ეს ძალადობრივი ფაქტი. ეს [ძალადობა] არის მიუღებელი. ვინ გველაპარაკება ჩვენ, რომელი ძალა გველაპარაკება? - ვინც ადამიანებს აუპატიურებდა, კლავდა, ხოცავდა, აწამებდა! საშინელება ხდებოდა და არც მედია იყო”, - განაცხადა ღარიბაშვილმა.

მან ასევე, ევროპელი მინისტრების ვიზიტზეც ისაუბრა. ღარიბაშვილის შეფასებით, მიუღებელია, როდესაც სხვა ქვეყნის საგარეო საქმეთა მინისტრები ოპოზიციის მიერ დაორგანიზებულ აქციებზე სიტყვით გამოდიან.

"ყველამ ვიხილეთ ევროპის ქვეყნების რამდენიმე საგარეო საქმეთა მინისტრების ვიზიტი. ჩამოვიდნენ, შეხვდნენ პრემიერ-მინისტრიც და ყველა შეხვდა ჩვენი გუნდიდან. ასევე, მგონი ოპოზიციის წარმომადგენლებსაც შეხვდნენ, მაგრამ ყველაფრის მიუხედავად, ოპოზიციის მიტინგზე გამოვიდნენ სიტყვით. რა ჰქვია ამას თუ არა შეურაცხმყოფელი ჩარევა ქვეყნის შიდა საქმეებში?

მიუღებელია, როდესაც ჩამოდის საგარეო საქმეთა მინისტრი, პირველი დიპლომატი და გამოდის და ჭკუას გვასწავლიან ოპოზიციის ტრიბუნიდან, ეს მიუღებელია. ეს გვერდში დგომა კი არა უხეში ჩარევა, დარღვევაა და ამ დროს მეგობრობაზე საუბრობენ. მოეწონებათ, რომ ჩავიდნენ ჩვენი გუნდის, რომელიმე დეპუტატი ან დეპუტატები და გამოვიდნენ მათი ოპოზიციის მიტინგზე? გგონიათ, არაფერი აქვთ სათქმელი მათ ოპოზიციას? ჩვენ ძალიან კარგად ვიცით იქ რაც ხდება, მაგრამ მათ პოლიტიკურ შიდა საქმეებში არ ვერევით. რატომ აძლევენ თავს ამდენის უფლებას?

იცით რა არის პრობლემა? თქვენ ვინ ხართ? საქართველო როგორ ბედავს ამდენ რამეს? - ეს დამოკიდებულება აქვთ. ერთი ძალიან კარგი ევროპელი კოლეგა მეუბნებოდა - როცა კანდიდატის სტატუსი არ მოგვცეს, ვუთხარი როგორ შეიძლება საქართველო გამოარჩიო და მოლდოვაზე და უკრაინაზე უკან დააყენო? როცა წინ ვართ და ყველაფერს ვაკეთებთ და იცით რა მითხრა? - მან მითხრა - ჩვენი ქვეყანა მაშინ, როცა წევრიანდებოდა, მუხლებზე იყო დაჩოქილი და ჩვენ ყველაფერს ვასრულებდით უსიტყვოდ და თქვენ, როდესაც იცავთ თქვენ პოზიციას ეს ბრიუსელისთვის მიუღებელია. ისინი არ არიან მიჩვეულები ბარიერებს, მათ უნდათ მოვიდეს დავალება და ჩვენ შევასრულოთ.

ევროკავშირის 27 ქვეყნიდან 25 ქვეყანაში ერთსქესიანთა ქორწინებაა დაკანონებული. დავალება მიიღეს და გააკეთეს. მე გეუბნებით, რომ შეიძლება იყოს მოთხოვნები, მაგრამ ქვეყანა ეწინააღმდეგებოდეს და თავის ეროვნულ ინტერესებს იცავდეს, მივიღებთ იმას რაც მიიღეს სხვებმა.

ჩვენმა ხალხმა უნდა იცოდეს, რომ როცა ქვეყანა ევროკავშირის წევრი ხდება, სუვერენიტეტის მინიმუმ 50% ბრიუსელს გადასცემს”, -განაცხადა ირაკლი ღარიბაშვილმა.