"მე და შალვა ოცი წელია, ერთმანეთს ვიცნობთ, მიწერ-მოწერის პრობლემა არ გვაქვს... ერთ-ერთი თემის გაგრძელება იყო მისი მესიჯი "ლაივში" - იაგო ხვიჩია
დღეს დილას, პარტია "გირჩის" ტრადიციული "ლაივის" დროს იაგო ხვიჩიასა და ვახო მეგრელიშვილის პირდაპირ ეთერში ყოფნისას, ეკრანზე გამოჩნდა მესიჯი, სადაც ჩანს, რომ იაგოს პირად შეტყობინებებში ჟურნალისტი შალვა რამიშვილი წერს და აქციის ორგანიზატორებს უცენზურო სიტყვებით მოიხსენიებს. სოციალურ ქსელში გავრცელებული "სქრინის" გამო, სადაც რამიშვილის მესიჯი ჩანს, იაგო ხვიჩიას რამიშვილთან თანამშრომლობაში დასდეს ბრალი.
Ambebi.ge-სთან საუბარში პოლიტიკოსი ამბობს, რომ რამიშვილთან ოცწლიანი ნაცნობობა აკავშირებს და მიმოწერაში სკანდალური არაფერია...
იაგო ხვიჩა:
- თქვენ იცით, რომ აქციის მონაწილეებს რამდენიმე დღის წინ საკმაოდ უხეშად მივმართე, იმავე საღამოს ჩემი ვიდეო შალვა რამიშვილმა „პოსტვს“ ეთერში გაუშვა. ზოგადად ამით დაიწყო გადაცემა და ამ თემის გაგრძელება იყო მისი მოწერილი მესიჯიც, რომელიც ჩვენს "ლაივში" მოხვდა, რომელიც ყოველდღე 11 საათზე გადის ხოლმე. მესიჯში, ის წერია, რაც სქრინზე ჩანს. არ ვიცი, ეს რატომ გახდა სკანდალური ამბავი, იმიტომ რომ შალვაც საჯარო სივრცეში აქციის ორგანიზატორებს ისეთად მიიჩნევს, რაც დაწერა და საჯარო სივრცეში არც მე არ დამიკლია ანალოგიური ეპითეტებით შემკობა და დღეს რატომ გახდა ეს სკანდალური არ ვიცი.
მე და შალვა ოცი წელია ერთმანეთს ვიცნობთ, კომუნიკაციის და მიწერ-მოწერის პრობლემა არ გვაქვს, მიუხედავად იმისა, რა პოზიციაზე ვდგავართ. ისევე როგორც "ნაცმოძრაობის" და სხვა პარტიების წარმომადგენლებთან. კარგია, რომ ამას ხმაური მოჰყვა, კიდევ მეტი იხმაურონ ამ თემაზე.
- ხალხის აღშფოთება შესაძლოა გამოიწვია თქვენი შალვა რამიშვილთან სიახლოვემ...
- რას მელაპარაკებით, არ არსებობს ისეთი ტელევიზია, სადაც ერთი ჟურნალისტი მაინც არ არის ვისთანაც არ ვმეგობრობ. სკანდალური ჩემი და ბატონი შალვას კომუნიკაცია რანაირად შეიძლება იყოს, ვერ წარმომიდგენია. როგორც გითხარით, ოცი წელია ვიცნობ მიუხედავად იმისა, რომ თანამოაზრეები არ ვართ. თქვენ არ გინახავთ, რომ მე შალვას პირად შეურაცხყოფას ვაყენებდე, შალვას კი ერთი ორჯერ წაუცდა, მაგრამ მაინც მოზომილია მოგეხსნებათ.