საფრანგეთის პოლიციამ მოკლა პირი რომელმაც სინაგოგის დაწვა სცადა
საფრანგეთის პოლიციამ ჩრდილო-დასავლეთის ქალაქ რუანში განახორციელა მამაკაცის ლიკვიდაცია, რომელმაც სინაგოგის დაწვა სცადა, - ინფორმაციას BBC-ი საფრანგეთის შინაგან საქმეთა მინისტრზე დაყრდნობით ავრცელებს.
გავრცელებული ინფორმაციით, მამაკაცი დანით იყო შეიარაღებული და როდესაც ის პოლიციისკენ დაიძრა, მათ ესროლეს.
ადგილობრივი მედიის ინფორმაციით, პოლიცია მას შემდეგ გამოიძახეს, რაც სინაგოგიდან ამოსული კვამლი დააფიქსირეს. ადგილზე მისულმა ერთ-ერთმა პოლიციელმა დანით შეიარაღებულ მამაკაცს ესროლა.
საფრანგეთის შინაგან საქმეთა მინისტრმა, ჟერალდ დარმანინმა პოლიცია დროული რეაგირებისა და მამაცობისთვის შეაქო.