"ჩამიდგეს "პლატინა"... დამტვრეული მაქვს ზედა ყბა, ასევე ჩამტვრეულია თვალბუდის ძვალი" - დავით ქაცარავას კომენტარი მის მდგომარეობაზე

ინგოროყვას საუნივერსიტეტო კლინიკაში განმარტავენ, რომ "ანტისაოკუპაციო მოძრაობის“ წევრის, დავით ქაცარავას ჯანმრთელობის მდგომარეობა სტაბილურია.

როგორც "ინტერპრესნიუსთან“ საუბრისას აღნიშნავენ, დავით ქაცარავა სამედიცინო დაწესებულებაში კიდევ 2 დღე დარჩება.

"დავით ქაცარავა კლინიკაში რჩება. მისი ჯანმრთელობის მდგომარეობა სტაბილურია. ექიმების მეთვალყურეობის ქვეშ იმყოფება. გუშინ ჩაუტარდა ქირურგიული ოპერაცია. სტაციონარშია მოთავსებული, 2 დღე კვლავ კლინიკაში დარჩება“,- აღნიშნავენ ინგოროყვას საუნივერსიტეტო კლინიკაში და განმარტავენ, რომ მეტ დეტალზე ოჯახის თხოვნით ვერ ისაუბრებენ.

თავად დავით ქაცარავამ "ტვ პირველთან" საუბარში განაცხადა, რომ ჰემატომები აღენიშნება თავზე.

"რაც შეეხება ოპერაციას, თვალბუდის ძვალია ჩამტვრეული, ასევე დამტვრეულია ზედა ყბა. სერიოზული ჰემატომები მაქვს თავზე. ტვინის შერყევა საკმაოდ მძიმე ფორმის. ჩამიდგეს "პლატინა" ოპერაციის შედეგად“, - აღნიშნა ქაცარავამ „ტვ პირველთან“.

ცნობისთვის, პოლიციის მხრიდან დავით ქაცარავას მიმართ სამსახურებრივი უფლებამოსილების ძალადობით გადამეტების ფაქტზე, სპეციალურმა საგამოძიებო სამსახურმა გამოძიება დაიწყო. მეუღლის ინფორმაციით, გუშინ, საკანონმდებლო ორგანოსთან მიმდინარე აქციის დროს, დავით ქაცარავას დაკავებისას სამართალდამცავებმა ფიზიკურად გაუსწორდნენ.