საპატრიარქოს "მცირე შენიშვნა" პატრიარქის გუშინდელ მიმართვაზე - "ეს იყო მოწოდება ლოცვისაკენ და პოლიტიკური ნიშნით მისი ინტერპრეტაციის მცდელობა არასწორია"
საპატრიარქოში განმარტავენ, რომ პატრიარქის გუშინდელი განცხადება იყო მრევლისადმი მოწოდება ლოცვისაკენ და ამ განცხადების პოლიტიკური ნიშნით ინტერპრეტაციის მცდელობა არასწორია.
"მცირე შენიშვნა - სრულიად საქართველოს კათოლიკოს-პატრიარქის ამა წლის 12 მაისის მიმართვა მრევლისადმი იყო მოწოდება ლოცვისაკენ, მშვიდობისა და ერთობის შენარჩუნებისათვის. ნებისმიერი პოლიტიკური ნიშნით მისი ინტერპრეტაციის მცდელობა კი არის არასწორი, სამწუხარო და ლოცვის არსის დამახინჯება. შევთხოვთ უფალს, მშვიდობით აკურთხოს საქართველო" - ნათქვამია საპატრიარქოს ინფორმაციაში.
ცნობისთვის, გუშინ პატრიარქის მიმართვა გავრცელდა, სადაც ქვეყანაში არსებულ ვითარებაზეც საუბრობს. ილია მეორე მიმართავს მრევლს "შევთხოვოთ ყოვლისშემძლე და ყოვლადძლიერ ღმერთს, რომ, საქართველოც გადაარჩინოს და მშვიდობითა და ერთობით გვაკურთხოს“.
"დღევანდელო დღე გამორჩეულია და ამიტომაც მინდა გთხოვოთ, რომ სწორედ დღეიდან კიდევ უფრო გავაძლიეროთ ლოცვა საქართველოსთვის.
ამჟამად ჩვენი ქვეყანა თავისი განვითარების ერთ-ერთ რთულ მონაკვეთს გადის. მშვიდობა ყველას გვინდა, მაგრამ მისი მიღწევა ხშირად გვიჭირს, რადგან არ ვიქცევით სწორად, არ მივმართავთ და არ ვსასოებთ მას, ვინც არის სათავე და წყარო მშვიდობისა,- ყოვლადწმინდა სამება.
მინდა შეგახსენოთ ჭეშმარიტი ღვთის სადიდებელი ლოცვა სამი ახალგაზრდისა: - ანანია, აზარია და მისაელისა, რომლებიც ბაბილონის მეფე ნაბუქოდონოსორმა დასჯის მიზნით ისეთ გავარვარებულ ღუმელში ჩაყარა, რომ მის ახლოს მყოფი ადამიანებიც ცეცხლის ალისგან დაიწვნენ, ისინი კი სრულიად უვნებელნი დარჩნენ, რადგან უფლის ანგელოზი იყო მათთან და ცეცხლის მხურვალებამ ვერაფერი დააკლოთ.შევთხოვოთ ყოვლისშემძლე და ყოვლადძლიერ ღმერთს, რომ, როგორც ანანია, აზარია და მისაელი გადაარჩინა მან უდიდეს განსაცდელს, საქართველოც გადაარჩინოს და მშვიდობითა და ერთობით გვაკურთხოს." - ნათქვამია მიმართვაში.
წაიკითხეთ სრულად