ხელოვნური ინტელექტით შექმნილი ფოტოები, რომლითაც ათასობით ადამიანი მოტყუვდა - კეტი პერის განმარტების გაკეთება მოუწია

წლევანდელი Met Gala-ს თემა "მძინარე მზეთუნახავები: მოდის გამოღვიძება" იყო, ცნობილი ადამიანები კი ღონისძიებაზე ყვავილებთან, აყვავებასთან ასოცირებული სამოსით გამოჩნდნენ.

საინტერესოა, რომ სოციალურ ქსელებში განსაკუთრებული ყურადღება Met Gala-ს კონტექსტში მომღერალმა კეტი პერიმ მიიქცია, რომელიც რაც უნდა გასაკვირი იყოს, ღონისძიებას საერთოდ არ დასწრებია.

საქმე ისაა, რომ ხელოვნური ინტელექტის გამოყენებით, მომღერლის თაყვანისმცემელმა შექმნა რეალისტური ფოტოები, სადაც ჩანდა, რომ თითქოს, კეტი პერიც Met Gala-ზე იმყოფებოდა. ამ ფოტოებით საზოგადოების დიდი ნაწილი მოტყუვდა და დაიჯერა, რომ ისინი რეალური იყო.

DailyMail.com ესაუბრა პოპ-ვარსკვლავ კეტი პერის ფანს, რომელმაც ხელოვნური ინტელექტის გამოყენებით ეს ფოტოები შექმნა. მისი თქმით, ხელოვნური ინტელექტის შემდეგ გამოიყენა ფოტოშოპიც ამგვარი შედეგის მისაღწევად.

ეს ამბავი არც თავად მომღერალს არ გამორჩენია, მან "ინსტაგრამზე" გამოაქვეყნა ხელოვნური ინტელექტით გენერირებული ფოტოები და განმარტა, რომ ის რეალური სურათები არაა და რომ არ დასწრებია Met Gala-ს.

ავტორი: ანასტასია შალიკაშვილი