ხვალიდან გამოიდარებს, თუმცა 2 დღით... - როდემდე შენარჩუნდება ცვალებადი ამინდები: სვეტლანა ნიორაძე მაისის პროგნოზით

ხვალიდან საქართველოში გამოიდარებს და ტემპერატურაც მოიმატებს. ამის შესახებ AMBEBI.GE-ს გარემოს ეროვნული სააგენტოს ჰიდრო-მეტეოროლოგიური პროგნოზების სამმართველოს უფროსმა სვეტლანა ნიორაძემ განუცხადა...

- ჭარბი ნალექი, დაბალი ტემპერატურა ახლა უჩვეულოდ გვეჩვენება, მაგრამ ასე ნამდვილად არ არის. მაისში თოვლი არათუ ყაზბეგში, თბილისშიც მოვიდა რამდენიმე წლის წინ... ახლა ძლიერი ნალექი ნამდვილად იყო, განსაკუთრებით აღმოსავლეთ საქართველოში, კახეთში... გასულ ღამეს თბილისშიც ბევრი ნალექი მოვიდა, ტემპერატურაც დაბალი იყო, მაგრამ დღეს უკვე ამინდი გამოვიდა.

უახლოეს დღეებში მხოლოდ ცალკეულ რაიონებში იქნება ხანმოკლე წვიმა, ელჭექით... ტემპერატურა ხვალიდან მოიმატებს როგორც აღმოსავლეთ საქართველოში, ასევე დასავლეთ საქართველოში, სადაც ტემპერატურა 27-28 გრადუსამდე მიაღწევს. ასეთი ამინდი 10 მაისამდე შენარჩუნდება. 10 მაისს ისევ ველოდებით ამინდის პირობების გაუარესებას, ჯერ აღმოსავლეთ საქართველოში, კვირას კი დასავლეთ საქართველოში. ქარიც გაძლიერდება, მათ შორის თბილისშიც. ასეთი ცვალებადი ამინდი ნარჩუნდება თვის პირველ ნახევარში, 17 მაისამდე.

• მაისის მესამე დეკადა უკვე საკმაოდ თბილი იქნება, დაგვცხება კიდევაც... კიდევ ერთხელ გიმეორებთ, რომ უჩვეულოდ დაბალი ტემპერატურა არ არის. სტატისტიკურად კიდევ უფრო დაბალი ტემპერატურა ფიქსირდებოდა. მაისი და ივნისი ყველაზე ნალექიანი თვეებია აღმოსავლეთ საქართველოში, თორემ გასულ ღამეს ნამდვილად ძლიერი ნალექი მოვიდა. წუხანდელი ნალექი ჭარბი იყო, თბილისში გასულ ღამეს თითქმის თვის ნორმის ნახევარი ნალექი მოვიდა. ეს საკმაოდ სერიოზული წვიმაა.

ძლიერ ნალექზე, წყლის დონის მომატებაზე, მეწყერზე, თოვლზეც ჩვენ გაფრთხილებაც გვქონდა გავრცელებული რამდენიმე დღით ადრე... წყლის დონე საქართველოს მდინარეებში კარგად არის მომატებული, მაგრამ მადლობა ღმერთს მშვიდობაა, არაფერი მომხდარა.