"ტროტუარზე დაახლოებით 30 მეტრი მათრიეს. მთელი გზა მცემდნენ და წიხლებს მირტყამდნენ" - რას წერს აშშ-ის მოქალაქე, იურისტი, რომელიც წუხელ აქციაზე დააკავეს

30 აპრილს თბილისში საპროტესტო აქციაზე დააკავეს და სცემეს ამერიკის შეერთებული შტატების მოქალაქე, იურისტი ტედ ჯონასი, რომელიც მომხდარის შესახებ სოციალურ ქსელში წერს და დეტალურად აღწერს მომხდარს:

"ძვირფასო მეგობრებო, პირველ რიგში გეტყვით, რომ სახლში ვარ, უსაფრთხოდ, თუმცა შესაძლოა, მთლად კარგად არ ვიყო. წუხელ, დაახლოებით 12:30 საათზე, რუსთაველზე მომიტინგეების ხაზიდან რობოკოპებმა მომიტაცეს.

დამიჭირეს. ტროტუარზე დაახლოებით, 30 მეტრი მათრიეს. მთელი გზა მცემდნენ და წიხლებს მირტყამდნენ. ცემა მაშინაც გააგრძელეს, როცა მიწაზე ვიწექი. 20-30 დარტყმა უნდა ყოფილიყო. დამთავრდა ყველაფერი ცხვირიდან სისხლისღვრით, დალურჯებებით სახეზე, ყბაზე, თვალთან, სისხლჩაქცევებით სხეულზე.

დაახლოებით, ორი საათი გავატარე პოლიციის შავ ფურგონში. ვიყავით მე და კიდევ 2 ახალგაზრდა ბიჭი, რომლებიც ჩემთან ერთად დააკავეს. ყოველ ხუთ წუთში ფურგონის კარი იხსნებოდა და პოლიციელები ძალადობრივად აგდებდნენ სხვა დაკავებულებს და აგინებდნენ. სანამ იქ ვიყავი, პოლიციელები პერიოდულად სცემდნენ 2 კონკრეტულ მოქალაქეს, ერთ მომენტში დაახლოებით 4 სამართალდამცავი შეიკრიბა ამ ორი ბიჭის საცემად. ფურგონში ყოფნისას ფარულად ვისარგებლე ჩემი ტელეფონით (პოლიციელებს ვუთხარი, რომ დავკარგე) და დავუკავშირდი მეგობრებს აშშ-ის სახელმწიფო დეპარტამენტიდან, ნინოს (ჩემს მეუღლეს) და ეკა გიგაურს.

რაღაც მომენტში მათ მიიღეს ინფორმაცია, რომ ფურგონში აშშ-ის მოქალაქე ჰყავდათ, მე გამომიყვანა პოლიციამ და წამყვანეს დიღმის მასივის პოლიციის განყოფილებაში. საკმაოდ მეგობრულები იყვნენ და "კაი კაციო", -მეძახდნენ.

#არარუსულკანონს #არარუსულმთავრობას", - წერს ტედ ჯონასი.