"9 აპრილის ღამეს 15 წლის ვიყავი მამაჩემი ქუჩა-ქუჩა რომ მეძებდა. წუხელ, 15 წლის შვილი სახლში აღარ იყო. დავუწყე ძებნა და ლაივში ვიპოვე, რუსთაველზე" - რას წერს ირაკლი ოქრუაშვილი

თავდაცვის ყოფილი მინისტრი ირაკლი ოქრუაშვილი სოციალურ ქსელში 15 წლის შვილის შესახებ წერს, რომელიც თბილისში მიმდინარე საპროტესტო აქციების მონაწილეა.

"89 წლის 9 აპრილის ღამეს 15 წლის ვიყავი მამაჩემი ქუჩა-ქუჩა რომ მეძებდა.

წუხელ გამეღვიძა და შემთხვევით ვნახე 15 წლის შუათანა შვილი სახლში აღარ იყო. დავუწყე ძებნა და ქართლოს ნატროშვილის ლაივში ვიპოვე რუსთაველზე. შვილის საქციელი კი გამიხარდა, მაგრამ 35 წელი გავიდა 9 აპრილს შემდეგ და ბარიკადების მეორე მხარეს ისევ რუსები დგანან", - წერს ოქრუაშვილი.

ცნობისთვის რუსთაველის გამზირზე დარჩენილ აქციის მონაწილეებსა და პოლიციას შორის დაპირისპირება იყო. დაპირისპირების მიზეზი გახდა სამართალდამცავების მოთხოვნა, რომ აქციის მონაწილეებს გზის სავალი ნაწილი გაეთავისუფლებინათ. პოლიციამ აქციის ზოგიერთი მონაწილე დააკავა.

პარლამენტთან "უცხოური გავლენის გამჭვირვალობის შესახებ" კანონპროექტის საწინააღმდეგო აქციის მონაწილეების დაშლა დაახლოებით 21:30 საათიდან დაიწყო. სპეცრაზმმა აქციის მონაწილეების წინააღმდეგ 6 საათის განმავლობაში ე.წ. წიწაკის სპრეი, წყლის ჭავლი და ცრემლსადენი გაზი არაერთხელ გამოიყენა. დაშავდა ათეულობით ადამიანი, რომელთაც პირველადი დახმარება სასწრაფოს ბრიგადებმა ადგილზევე აღმოუჩინეს.