ბელარუსი აცხადებს, რომ ლიეტუვის ტერიტორიიდან მინსკზე დრონებით თავდასხმა აღკვეთეს - როგორია ვილნიუსის პასუხი
ბელარუსის სახელმწიფო უშიშროების კომიტეტის ხელმძღვანელის განცხადებით, ბელარუსმა ლიეტუვის ტერიტორიიდან მინსკზე დრონებით თავდასხმა აღკვეთა.
"სახელმწიფო უშიშროების კომიტეტმა, სხვა სამართალდამცავ უწყებებთან თანამშრომლობით, ახლახან უსაფრთხოების არაერთი ზომა მიიღო, რამაც ლიეტუვის ტერიტორიიდან მინსკსა და მის შემოგარენში მდებარე ობიექტებზე საბრძოლო დრონების თავდასხმის აღკვეთა შესაძლებელი გახადა“, - განაცხადა ბელარუსის სახელმწიფო უშიშროების კომიტეტის ხელმძღვანელმა, ივან ტერტელმა.
ტერტელმა აღნიშნა, რომ საზოგადოებისთვის დეტალური ინფორმაციის გაზიარება ჯერჯერობით შესაძლებელი არ არის.
ლიეტუვის შეიარაღებული ძალების სტრატეგიული კომუნიკაციების დეპარტამენტის წარმომადგენელმა, გინტაუტას ციუნისმა ტერტელის მიერ გავრცელებული ინფორმაცია მალევე უარყო.
"100%-ით შემიძლია ვთქვა, რომ ეს დეზინფორმაციაა. უაზრობაა, რომ ლიეტუვა ბელორუსზე დრონის გამოყენებით თავდასხმას განახორციელებდა, სხვა სიტყვას ვერ ვპოულობ“, - განაცხადა გინტაუტას ციუნისმა.