"შესაძლოა რუსული სპეცსამსახურები ცდილობენ იმ ქვეყნების ახალგაზრდობის დაშინებას, რომლებიც კრემლის მიმართ ლოიალურნი არ არიან" - ვის აწყობს ჩვენში შიშის და პანიკის დათესვა?

გუშინ, 21 აპრილს სოციალურ ქსელში, მათ შორის "ტელეგრამარხებზე", რუსულ ენაზე გავრცელდა მუქარის შემცველი ინფორმაცია იმასთან დაკავშირებით, რომ 22 აპრილს თბილისის რამდენიმე სკოლასა და სავაჭრო ცენტრებზე თავდასხმა იგეგმებოდა.

სუს-ის ინფორმაციით, სახელმწიფო უსაფრთხოების სამსახურის კონტრტერორისტული დანაყოფების მიერ მთელი ღამის განმავლობაში მიმდინარეობდა შესაბამისი ოპერატიულ-საგამოძიებო მოქმედებები.

სუს-ის მიერ გავრცელებულ განცხადებაში ვკითხულობთ:

"მიმდინარე წლის 21 აპრილს, სოციალურ ქსელებში, კერძოდ ინტერნეტ აპლიკაცია "ტელეგრამში“ გავრცელებულ ინფორმაციასთან დაკავშირებით, თბილისის მასშტაბით საგანმანათლებლო დაწესებულებებსა და სავაჭრო ცენტრებში შესაძლო ასაფეთქებელი მოწყობილობების განთავსებისა და მოსალოდნელი თავდასხმების შესახებ მუქარის ფაქტებზე, სახელმწიფო უსაფრთხოების სამსახურის კონტრტერორისტული დანაყოფების მიერ მთელი ღამის განმავლობაში მიმდინარეობდა შესაბამისი ოპერატიულ-საგამოძიებო მოქმედებები. სპეციალური კონტრტერორისტული ღონისძიებების შედეგად რაიმე სახის ასაფეთქებელი ნივთიერება ან მოწყობილობა აღმოჩენილი არ ყოფილა“.

"შესაძლოა, ეს უკავშირდებოდეს რუსული სპეცსამსახურების მიერ იმ ქვეყნების ახალგაზრდობის დაშინებას, რომლებიც კრემლის მიმართ არ არიან ლოიალურნი. გამოიყენებს თუ არა ხელისუფლება სათავისოდ ამ სხვის მიერ დაგეგმილ და განხორციელებულ ოპერაციას, ეს სხვა საკითხია“, - ამბობს კიბერუსაფრთხოების სპეციალისტი ანდრო გოცირიძე.

"ამგვარი მუქარა ახალი არ არის, მიმდინარე თვეში ზუსტად იგივე ტექსტი და მუქარა იმავე არხებით გავრცელდა ასტანისა და ერევნის საშუალო სკოლების მიმართ. შესაძლოა, ეს უკავშირდებოდეს რუსული სპეცსამსახურების მიერ იმ ქვეყნების ახალგაზრდობის დაშინებას, რომლებიც კრემლის მიმართ არ არიან ლოიალურნი. ცნობილია, რომ ყაზახეთმაც და სომხეთმაც ბოლო დროს მნიშვნელოვანი განცხადებები გააკეთეს რუსული იმპერიალიზმის წინააღმდეგ. ახალგაზრდობა ყოველთვის ამ ბრძოლის ავანგარდშია. ამას გარდა, შესაძლოა, რუსული სპეცსამსახურები ამოწმებენ ჩვენი უსაფრთხოების სისტემის მდგრადობას, კრიზისულ ვითარებაში მოქმედების წესს, ჩართულ ძალებსა და საშუალებებს, საზოგადოებასთან კომუნიკაციის ხარისხსა და არხებს.

პანიკის დათესვა, ბუნებრივია, რუსეთს უნდა აწყობდეს, მითუმეტეს, რომ საქართველოს ახალგაზრდობა მკვეთრად დასავლური ორიენტაციისაა და მოცემულ მომენტშიც ე.წ. რუსული კანონის მიღებას უპირისპირდება. ხელისუფლება, ცხადია, დაინტერესებულია ახალგაზრდებში საპროტესტო მუხტის კლებით, თუმცა ამ პროვოკაციის დაგეგმვას მას ობიექტური მიზეზებიდან გამომდინარე, ვერ დავაბრალებთ. როგორც აღინიშნა, ზუსტად იმავე ხელწერით განხორციელებულ ქმედებას ადგილი ჰქონდა სხვა ქვეყნებშიც. რამდენად გამოიყენებს ხელისუფლება ამ სხვის მიერ დაგეგმილ და განხორციელებულ ოპერაციას, ეს სხვა საკითხია.

ასეთ დროს სახელმწიფო აკეთებს იმას, რასაც უნდა აკეთებდეს:

ტარდება პროტოკოლით გათვალისწინებული ღონისძიებები, მოწმდება სიგნალი, მიმდინარეობს პრევენციული ღონისძიებები. ასეთ ვითარებაში მეტად მნიშვნელოვანია საზოგადოებასთან კომუნიკაცია და სამოქალაქო მზაობა. მნიშვნელოვანია, არ გავავრცელოთ ტერორისტული მოწოდების ფოტოები ან შინაარსი, არ ვისაუბროთ თითქოსდა, სადღაც აღმოჩენილ იარაღსა და საბრძოლო მასალებზე, არ შევუწყოთ ხელი პანიკის გავრცელებას. მოსახლეობა უნდა ენდოს მხოლოდ ოფიციალურ ინფორმაციას და მიჰყვეს სახელმწიფო სტრუქტურების რეკომენდაციებს. ჩვენი ანტიტერორისტული დანაყოფები წლების განმავლობაში ყალიბდებოდა დასავლურ წარმატებულ სპეცსამსახურებთან მჭიდრო კოორდინაციაში, მათი მატერიალური, ტექნიკური თუ ინტელექტუალური დახმარებით, ასე რომ, მათ შესწევთ უნარი, მოახდინონ მსგავსი საფრთხის პრევენცია“.

იხილეთ ასევე:

• "ასაფეთქებელი ნივთიერება ან მოწყობილობა აღმოჩენილი არ ყოფილა“ - სუს-ი სკოლებსა და სავაჭრო ცენტრებზე გავრცელებულ ინფორმაციაზე განცხადებას ავრცელებს
• "არავითარი პანიკის და მით უმეტეს სწავლის გადადების საფუძვლები არ არსებობს, ეს იყო ცრუ განგაში" - განათლების მინისტრი "ტელეგრამში“ გავრცელებულ ინფორმაციაზე