"არ ვარ საქართველოში, ვარ სამშობლოდან შორს და სამწუხაროდ, არ ვარ იქ, სადაც ჩვენი შვილები დგანან" - დათო ტურაშვილი
საქართველოს პარლამენტის შენობასთან საპროტესტო აქციების ტალღა მესამე დღეა არ წყდება. აქტივისტები, საზოგადოებისათვის ცნობილი სახეები, რიგითი მოქალაქეები ე.წ. აგენტების კანონს აპროტესტებენ. საზოგადოებისთვის ცნობილი სახეები კი, რომლებიც საქართველოში არ იმყოფებიან განცხადებებს სოციალური ქსელის საშუალებებით ავრცელებენ. მწერალ დათო ტურაშვილის ქალიშვილი ანაკო ტურაშვილი ფეისბუქზე მამის მიმართვას ავრცელებს
"არ ვარ საქართველოში და ვარ სამშობლოდან შორს და სამწუხაროდ არ ვარ იქ, სადაც ჩვენი შვილები დგანან, მაგრამ მათი სიყვარულით სავსე გულების ხმა აქაც მესმის და მიხარია რომ თავისუფლება მათთვისაც ისეთივე ბედნიერებაა, როგორც იმ წინა თაობებისთვის, ვინც ამდენი იბრძოლა რუსეთის იმპერიის წინააღმდეგ.თუმცა ჩვენი ბრძოლა თავისუფლებისთვის, გაცილებით ადრე დაიწყო და მეტიც - ჩვენი ქვეყნის ისტორია თავისუფლებისთვის ბრძოლის თავგადასავალია და ეს თავგადასავალი მაშინვე დაიწყო, როცა საქართველო დაიბადა.
საქართველო კი მანამ იარსებებს, სანამ თავისუფლება იქნება მთავარი მოსახვეჭელი ამ ქვეყნის ადამიანებისთვის და სანამ თავისუფლება ბედნიერებაა, საქართველოც მარადიული დღესასწაულია..." - ნათქვამია დათო ტურაშვილის მიმართვაში