"წიგნი არის საკითხავად და არა სარტყმელად" - პარლამენტში ხმაურია და სხდომა შეჩერდა: შალვა პაპუაშვილმა რამდენიმე დეპუტატი დარბაზიდან გააძევა (ვიდეო)
პარლამენტის პლენარული სხდომა, სადაც დეპუტატები "უცხოური გავლენის გამჭვირვალობის შესახებ“ კანონპროექტს პირველი მოსმენით იხილავენ, უმრავლესობისა და ოპოზიციის წევრების დაპირისპირების გამო დროებით შეწყდა და ტექნიკური შესვენება გამოცხადდა.
- პარლამენტის თავმჯდომარემ, შალვა პაპუაშვილმა, "ნაციონალური მოძრაობის“ თავმჯდომარეს, ლევან ხაბეიშვილსა და "სტრატეგია აღმაშენებლის“ ლიდერს, გიორგი ვაშაძეს სხდომათა დარბაზი დაატოვებინა. ასევე, სასესიო დარბაზიდან გააძევა ფრაქცია "ნაციონალური მოძრაობის“ თავმჯდომარე თინა ბოკუჩავა და "ლელოს“ დეპუტატი ანა ნაცვლიშვილი.
უმრავლესობის წევრების გამოსვლისას ოპოზიციონერი დეპუტატები სკანდირებდნენ "არა, რუსულ კანონს!“, "ყველა არის ქვეყნის მოღალატე“; "პასუხს აგებთ!“ ისინი ასევე, პროტესტს მაგიდაზე ხელისა და წიგნის ბრახუნით გამოხატავდნენ.
"წიგნი არის საკითხავად და არა სარტყმელად. დანიშნულებისამებრ რომ გამოიყენოთ, თქვენც წაგადგებათ და საქმესაც," - მიმართა პაპუაშვილმა დეპუტატებს და დარბაზიდან გააძევა.