"ის ჩვენთვის პარიზის ღვთისმშობლის ტაძარი იყო" - დანიაში ისტორიული შენობა იწვის, რომელიც კულტურული მემკვიდრეობის უძვირფასეს ნიმუშებს ინახავდა (ფოტოები)

კოპენჰაგენის ისტორიული შენობა იწვის. მეხანძრე-მაშველები ისტორიული არტეფაქტების გადარჩენას ცდილობენ. ხანძრის შედეგად ჩამოინგრა შენობის ვერტიკალური სახურავი.

"დღეს დილით საშინელი ფოტოები ვრცელდება საფონდო ბირჟის გარშემო. დანიის კულტურული მემკვიდრეობა ხანძარშია გახვეული", - წერს სოციალურ ქსელ X-ში დანიის კულტურის მინისტრი იაკობ ენგელ-შმიდტი.

ტერიტორიაზე ამ დრომდე რჩებიან პოლიცია და მეხანძრე-მაშველები. ხელისუფლება ამბობს, რომ ხანძარი ზედმეტად სარისკოა შიგნიდან დასაძლევად და რომ ისინი ყველაფერს აკეთებენ ზარალის მინიმუმამდე დასაყვანად. სოციალური მედიით გავრცელებულ ვიდეოზე ჩანს, როგორ გამოაქვთ აალებული შენობიდან დიდი ნახატები.

"საშინელებაა. ეს იყო ქალაქის ერთ-ერთი ულამაზესი შენობა. ის ჩვენთვის პარიზის ღვთისმშობლის ტაძარია“, - განუცხადა ერთ-ერთმა მოქალაქემ სახელმწიფო მაუწყებელს DR-ის. დედაქალის რამდენიმე მთავარი ქუჩა გადაკეტილია, მოსახლეობას მოუწოდებენ თავი შეიკავონ ქალაქის შიდა ნაწილში გადადგილებისგან.

”ხანძარი ჯერ კიდევ არ არის კონტროლირებადი. ეს ეროვნული კატასტროფაა”, - თქვა მეხანძრე-მაშველმა ვედესტედ ანდერსენმა და დასძინა, რომ შენობის ნახევარი განადგურებულია. დაშავებულების შესახებ ინფორმაცია არ ვრცელდება.

ისტორიული შენობა 1619-1640 წლებში მეფე კრისტიან IV-ის დაკვეთით აშენდა და ჰოლანდიური რენესანსის სტილის წამყვან ნიმუშადაა მიჩნეული. ამჟამად რეკონსტრუქციის პროცესში იყო. გავრცელებული ინფორმაციით, ხანძარი სწორედ სარემონტო სამუშაოების დროს გაჩნდა.