ვიდრე ადამიანი ძაღლს მოიშინაურებდა, მანამდე მისი მეგობარი მელა იყო? - უნიკალური არქეოლოგიური აღმოჩენა, რომელიც შინაურ ცხოველებზე წარმოდგენას ცვლის

ახალი არქეოლოგიური აღმოჩენის მიხედვით, მეცნიერები ვარაუდობენ, რომ შესაძლოა, ძაღლების მოშინაურებამდე, ჩვენი წინაპრების მეგობრები მელიები იყვნენ.

არგენტინაში, 1500 წლით დათარიღებული საფლავის გათხრის შემდეგ, მეცნიერები საკმაოდ საინტერესო სურათის წინაშე აღმოჩნდნენ. მათ ნახეს, რომ სამხრეთ ამერიკელი ადამიანების სამარხებში, ადამიანებთან ერთად მელიებიც იყვნენ დამარხულნი.

არქეოლოგების აზრით, ამ საქციელის ყველაზე სარწმუნო ახსნა ისაა, რომ არგენტინის ამ ნაწილში მელიას, როგორც კომპანიონს, ან შინაურ ცხოველს, დიდ პატივს სცემდნენ. კვლევა აჩვენებს, რომ ეს მელია პრეისტორიულ მონადირეებთან ერთად იკვებებოდა და ბანაკის შიდა წრეს მიეკუთვნებოდა.

• მელა, რომელსაც Dusicyon avus ეწოდება, საშუალო ზომის იყო და 10-15 კგ-მდე იწონიდა. ის დაახლოებით 500 წლის წინ გადაშენდა, რამდენიმე ასეული წლის შემდეგ, რაც პატაგონიაში ძაღლები მოაშინაურეს.

დაახლოებით 10 წლის წინ, არგენტინის სხვა ნაწილში, ბევრად უფრო ძველ საფლავში იმავე სახეობის მელა აღმოაჩინეს. მისი კვების რაციონი მაშინ არქეოლოგებს არ გაუანალიზებიათ, თუმცა ახლა ვარაუდობენ, რომ შესაძლოა, ის სახეობაც შინაური ცხოველი იყო. "ეს ძალიან იშვიათი აღმოჩენაა. როგორც ჩანს, ამ მელას მონადირე-შემგროვებელთა საზოგადოებასთან მჭიდრო კავშირი ჰქონდა. ვფიქრობ, მხოლოდ სიმბოლური არ იყო მათი კავშირი და ეს მეგობრობას უფრო ჰგავს",- ამბობს ოქსფორდის უნივერსიტეტის დოქტორი, ოფელი ლებრასერი.

ველური მელას კბილები არგენტინასა და პერუს უძველეს სამარხებშიცაა აღმოჩენილი, რაც იმაზე მეტყველებს, რომ ცხოველს სიმბოლური მნიშვნელობა უნდა ჰქონოდა, მაგრამ მსოფლიო არქეოლოგიურ ისტორიაში ადამიანის საფლავში მელას თითქმის მთლიანი ჩონჩხის აღმოჩენა ძალზე იშვიათი რამაა.

წყარო: bbc

მოამზადა ანა სიბოშვილმა