"არაფერი დამიშავებია, მოღალატე არც მე ვარ და არც ვალერი მელაძე... აგვისტოს ომის შემდეგ მე და ჩემი ოჯახი რუსეთიდან დავბრუნდით" - რას პასუხობს ანანო სახელაშვილი კრიტიკოსებს
7 აპრილს, მცხეთაში, "მარანი ჰოლში" ვალერი მელაძის კონცერტი გაიმართა. გავრცელებული კადრებიდან ჩანს, რომ საღამოს უამრავი ადამიანი დაესწრო. თაყვანისმცემლებმა ზეპირად იცოდნენ მელაძის ჰიტები და მათ შორის ბევრი ახალგაზრდა იყო.
უკრაინაში ომის დაწყების შემდეგ ეს არ ყოფილა პირველი შემთხვევა, როდესაც მელაძე საქართველოს ესტუმრა. 2022 წლის ნოემბერში მომღერალმა თბილისში ფილარმონია გაავსო, 2023 წლის აგვისტოში კი ბათუმელ მაყურებელს უმღერა.
- "მარანი ჰოლში" გამართული კონცერტიდან კადრები სოციალურ ქსელში გავრცელდა. კონცერტს ცნობილი ქართველი ინფლუენსერები, ანანო სახელაშვილი და მარიამ გველესიანიც ესწრებოდნენ. ერთ-ერთი სიმღერის შესრულებისას მომღერალმა, ანანო სცენაზე აიყვანა და მასთან ერთად იმღერა. კადრები, Instagram-ის საშუალებით გავრცელდა.ფეისბუქზე ანანოსა და მომღერლის საერთო ვიდეოს კრიტიკულად შეხვდნენ.
ბლოგერის მისამართით ერთ-ერთი მომხმარებელი წერს:
"რუსეთი არის მტერი და ვიღაცას სენსიტიური გრძნობები თუ აღეძრა, დიდი ბოდიში. ამხელა აუდიტორია როცა გყავს, მინიმუმ მეტი ყურადღება გმართებს, თორემ აქ პერსონალურად არავინ არავის უტევს..."
"ინსტაგრამზე" ანანო სახელაშვილს ნახევარ მილიონზე მეტი გამომწერი ჰყავს. ჩვენთან საუბარში ამბობს, რომ თავის გასამართლებელი არავისთან არაფერი აქვს და არც რუსულის ცოდნა არ არის დანაშაული.
ანანო სახელაშვილი:
- სამწუხაროდ, მე არ გავზრდილვარ საქართველოში, გავიზარდე იმ ქვეყანაში, სადაც ვალერი მელაძე იყო ჩემი ბავშვობის მომღერალი.
- რუსეთში გაიზარდეთ?
- დიახ, და ომის დაწყებისთანავე ვალერი მელაძე წამოვიდა რუსეთიდან და ცხოვრობს სხვა ქვეყანაში, მეუღლე უკრაინელი ჰყავს და პირველი აპროტესტებდა ომს. მეც იგივე პოზიცია მაქვს, მე ვარ ჩემი ქვეყნის პატრიოტი და მიყვარს ჩემი ქვეყანა. რუსული თუ ვიცი, ეს არ არის დანაშაული.
- პირველად დაესწარით მელაძის კონცერტს. რატომ ამოგარჩიათ სცენაზე ასაყვანად, ხომ არ იცნობდით მანამდე?
- არა, ეს შემთხვევით მოხდა, არ ვიცნობდი მანამდე ბატონ ვალერის.
- ზოგადად ძალიან დადებითად პოზიციონირებთ სოციალურ ქსელში, გყავთ ნახევარი მილიონი გამომწერი, არ მახსოვს, აქამდე სკანდალში აღმოჩენილიყავით. თქვენმა გამომწერებმა თუ მოგწერეს უკმაყოფილო გზავნილები?
- ვიცოდი, რომ ზოგი ვერ გაიგებდა, ამისთვის ვერც გავაკრიტიკებ, რომ რატომ ვერ მიგებთ მე. ამიტომ რატომ უნდა დამეწერა რამე და გამეღიზიანებინა ჩემი გამომწერი.
- დიახ, თუმცა სოციალურ ქსელში ხომ ნახეთ უარყოფითი გამოხმაურება. შეიძლება თავი არ გემართლებინათ, მაგრამ აგეხსნათ მათთვის...
- არა, ჩემი ცხოვრება მაქვს. რა უნდა ავუხსნა ან ვის წინ უნდა გავიმართლო თავი. არაფერი დამიშავებია, ქვეყნის მოღალატე არც მე და არც ვალერი არ ვართ. 2008 წლის ომის შემდეგ მე და ჩემი ოჯახი რუსეთიდან საქართველოში დავბრუნდით და ნულიდან დავიწყეთ ცხოვრება. როგორღაც გავუმკლავდით პრობლემებს, ოღონდ სამშობლოში ვყოფილიყავით.
ნახეთ ვიდეო: