"კოდორის სპეცოპერაციაში მონაწილეობდა. 2008 წელს კი მძიმედ დაიჭრა რუსებთან ბრძოლაში" - ვინ არის სასროლეთში მომხდარი აფეთქებისას გარდაცვლილი პოლკოვნიკი და რატომ ეჭვობენ, რომ შესაძლოა აფეთქება მოეწყოთ?
გუშინ ბოჭორმის ქუჩაზე, მაღაზია "ბეთლგრაუნდის" სასროლეთში აფეთქება მოხდა, რის შედეგადაც ადგილზე ორი ადამიანი გარდაიცვალა, ხოლო კიდევ ერთი ჰოსპიტალში გადაყვანის შემდეგ. გარდაცვლილთაგან ერთი, ხოლო დაშავებული პირებიდან ორი შინაგან საქმეთა სამინისტროს თანამშრომელია. დამწვრობის ცენტრის ხელმძღვანელის, გუგა ქაშიბაძის განცხადებით, სასროლეთში აფეთქების შედეგად დაშავებული სამი პირიდან, ერთი კვლავ რეანიმაციულ განყოფილებაშია მოთავსებული. მისი თქმით, პაციენტს სხეულისა და სასუნთქი გზების 20%-იანი დამწვრობა აღენიშნება. რაც შეეხება დანარჩენ ორ პაციენტს, მათი ჯანმრთელობის მდგომარეობა სტაბილურია.
"რეანიმაციულ განყოფილებაში 1 პაციენტია, რომლის ჯანმრთელობის მდგომარეობა შედარებით მძიმეა. სხეულისა და სასუნთქი გზების 20%-იანი დამწვრობა აღენიშნება. დანარჩენი ორი პაციენტი ქირურგიულ განყოფილებაშია მოთავსებული, მათი ჯანმრთელობის მდგომარეობა მძიმეა“, - აღნიშნა ქაშიბაძემ.
როგორც ირკვევა, ერთ-ერთი გარდაცვლილი 2008 წლის აგვისტოს ომისა და კოდორის სპეცოპერაციის მონაწილე, პოლკოვნიკი იური ლომიძეა, რომელიც დღესდღეობით "ბეთლგრაუნდის“ თანამშრომელი იყო.
ambebi.ge გენერალ-ლეიტენანტ გოგი თათუხაშვილს დაუკავშირდა, რომელიც ერთ-ერთი პირველი იყო, რომელმაც ლომიძის გარდაცვალების თაობაზე ინფორმაცია გაავრცელა.
"იური იყო 2008 წლის გმირი, ყველა ომში და ოპერაციაში მონაწილეობდა. აგვისტოს ომის დროს მძიმედ დაიჭრა რუსებთან ბრძოლაში. იური პროფესიონალი იყო, ყველა საქმე იცოდა...
10 წელზე მეტია, რაც ეს სასროლეთი გაიხსნა, იქ დადიან, ფულს იხდიან და ისვრიან. იური სასროლეთში დარაჯ-ინსტრუქტორად მუშაობდა. 2008 წლის ომის შემდეგ, ის განსაკუთრებულ დავალებათა დეპარტამენტში სამმართველოს უფროსის მოადგილედ დაინიშნა, შავნაბადაზე იყო, მერე ღარიბაშვილი რომ მოვიდა შსს-ს მინისტრად, ლომიძე დააქვეითეს და კრწანისში გადაიყვანეს ინსტრუქტორის თანამდებობაზე, მერე საერთოდ გაუშვეს უწყებიდან. ეს კაცი იყო ნაღდი პატრიოტი, მეომარი და პროფესიონალი. ოჯახი ხომ უნდა შეენახა და სასროლეთში დაიწყო მუშაობა. იურიმ როგორც კი კარი გააღო და სინათლე აანთო, ეგრევე აფეთქება მოხდა. ეს რაღაც მიზანმიმართულ აფეთქებას ჰგავს და აი, რატომ: როცა გაზი ფეთქდება, თეთრი კვამლია, აქ კი შავი იყო. ტყვია-წამალიც უცებ არა, თანდათან ფეთქდება. ჩემი შეფასებით, ეს არის ჩვეულებრივი ტერაქტი... მაგ. ჩადებული ნაღმი რომ განაღმო, მეორე ნაღმი უნდა გამოიყენო, იმ ნაღმს რომ დაარტყას. ვფიქრობ, ზუსტად ასეთი ნაღმია აფეთქებული, მიზანმიმართული იყო ტყვია-წამალზე.
გაზის აფეთქების დროს ყველა მხარე თითქმის ერთნაირად ზიანდება და როცა ნაღმია, რაზეცაა ის მიმართული, ის ადგილი ფეთქდება, ასეც მოხდა. ვვარაუდობ, რომ აფეთქება გათვლილი იყო იმაზე, ვინც იქ შუქს აანთებდა და პირველი შევიდოდა. კარს იური აღებდა და ის ანთებდა შუქს. ქართველ ოფიცერზე, სავარაუდოდ, მოსკოვიდან მოვიდა შეკვეთა, თანდათან იძიეს შური ამ ბიჭებზე... რა მოხდა, ზუსტად ვერ ვიტყვი, ახლა მხოლოდ ვერსიების დონეზე შეიძლება საუბარი, მაგრამ ფაქტია, გაზის მილი არაა. სვანეთში რომ იყო აფრასიძეების სპეცოპერაცია, მათ სახლში 2,5-3 საათი ვერ შევდიოდით, იმდენი ტყვია-წამალი იყო, რომელიც ნელ-ნელა ფეთქდებოდა, სახლთან ახლოს ვერ მივდიოდით. შემთხვევის ადგილიდან (სასროლეთი) ფოტომასალა რომ მქონდეს, უფრო ზუსტ შეფასებას მივცემდი, რა არის გამოყენებული, ახლა იქ არ ვიმყოფები და ზუსტად რა მოხდა, ამის თქმა გამიჭირდება“.
ბოჭორმის ქუჩაზე მდებარე სასროლეთში საგამოძიებო მოქმედებები გვიან ღამემდე გრძელდებოდა. სამართალდამცველებთან ერთად ადგილზე სხვადასხვა დარგის სპეციალისტები იმყოფებოდნენ. ისინი ახლა მომხდარი აფეთქების მიზეზის დადგენას ცდილობენ. არსებული ინფორმაციით, შინაგან საქმეთა სამინისტრო აფეთქების ერთდროულად რამდენიმე ვერსიას განიხილავს, თუმცა ძიება ობიექტზე უსაფრთხოების წესების დარღვევის მუხლით მიმდინარეობს, რამაც ორი ან მეტი ადამიანის სიცოცხლის მოსპობა გამოიწვია.
ambebi.ge შსს-ს დაუკავშირდა და შეეცადა გაერკვია, რა ვერსიებზე მუშაობს გამოძიება. როგორც შსს-ში გვითხრეს, გამოძიება 240-ე პრიმა მუხლით მიმდინარეობს და აფეთქების მიზეზებსაც გამოძიება დაადგენს.
იხილეთ ასევე: