"შევშფოთდი და ნათელმხილველს დავურეკე" - ყაზახეთში ყოფილმა მინისტრმა ცოლი წამებით მოკლა, ქალი 8 საათი იატაკზე იყო: შემზარავი დანაშაული, რომლის განხილვასაც მსოფლიო პირდაპირ ეთერში უყურებს

2023 წლის 9 ნოემბერს, საღამოს მსოფლიოსთვის ყაზახეთში მომხდარი შემზარავი დანაშაულის შესახებ გახდა ცნობილი. გამოძიების ინფორმაციით, ქვეყნის ეკონომიკის ყოფილმა მინისტრმა, კუანდიკ ბიშიმბაევმა მეუღლე რესტორანში განსაკუთრებული სისასტიკით მოკლა. მთავარი ეჭვმიტანილი მაშინვე დააკავეს. ქალი მიღებული მძიმე დაზიანებებისგან გარდაიცვალა.

• 31 წლის გარდაცვლილი სალტანატ ნუკენოვა ბიშიმბაევის მეორე ცოლი გახლდათ. როგორც მედია წერს, ქალი ასტროლოგიით იყო გატაცებული. სწორედ ამის წყალობით შეხვდა წყვილი - ყოფილი ჩინოვნიკი მომავალ ცოლთან კონსულტაციაზე მივიდა და ასე გაიცნეს ერთმანეთის.

გარდაცვლილ ნუკენოვას სხეულზე ექსპერტებმა დანით მიყენებული ჭრილობების კვალი ვერ აღმოაჩინეს. აღმოჩენილი იყო მხოლოდ სხეულის რბილი ქსოვილების ჰემატომები, მათ შორის, თავის არეში. სასამართლო ექსპერტების თქმით, თავში ბლაგვი საგნით მიყენებული ძლიერი დარტყმა ქალისთვის სასიკვდილო აღმოჩნდა.

• სასამართლო პროცესი

ორი დღეა YouTube-ზე მთელი მსოფლიო თვალს ადევნებს პოლიტიკოსის სასამართლო პროცესს. დეტალები იმდენად შემზარავია, რომ მისი ყურება ყველას არ შეუძლია. განსაკუთრებულად ემოციურია კადრები, როდესაც დამნაშავე მომხდარის დეტალებზე ჰყვება და ამ დროს კამერა გარდაცვლილი ქალის ძმისა და მშობლების სახეებს აჩვენებს.

ბიშიმბაევის მტკიცებით, მეუღლემ იმ საღამოს ბევრი ალკოჰოლი დალია და თავისი "აგრესიით გამოიწვია“.

ყოფილი მინისტრის განცხადებებმა არამარტო ყაზახეთში, არამედ მთელ მსოფლიოში საზოგადოების აღშფოთება გამოიწვია. ხალხი ელოდება, რა განაჩენს გამოუტანენ ბიშიმბაევს.

გავრცელებული ინფორმაციით, პოლიტიკოსმა ქვეყანაში ყველაზე ცნობილი და ძვირადღირებული ადვოკატები დაიქირავა. ხალხის აგრესია მიმართულია ასევე ადვოკატების მიმართ. ისინი სასტიკად გმობენ ადვოკატების არჩევანს, რომ დაიცვან ცოლის სასტიკად მკვლელობაში ბრალდებული.

ასტანას სასამართლოში განსასჯელის სკამზე 43 წლის კუანდიკ ბიშიმბაევი და მისი ბიძაშვილი ბახიტჟან ბაიჟანოვი სხედან. ისინი განაჩენს ელოდებიან. სასამართლო პროცესი ნაფიც მსაჯულთა მონაწილეობით მიმდინარეობს, ეს მოთხოვნა თავად ბიშიმბაევმა დააყენა.

გამომძიებლების თქმით, გასული წლის 9 ნოემბრის ღამეს, ბიშიმბაევმა რესტორანში ცოლი სასტიკად სცემა და ნაცემი ქალი 6-8 საათის განმავლობაში VIP განყოფილებაში იატაკზე დატოვა, სადაც ქალი გარდაიცვალა. უცნობია, რესტორნის თანამშრომლებმა რატომ არ მოიმოქმედეს არაფერი ქალის გადასარჩენად.

ყოფილი მინისტრის ბიძაშვილს ბრალი წაყენებული აქვს დანაშაულის შეუტყობინებლობაში - ასევე, გამოძიების მტკიცებით, მისი დავალებით, სათვალთვალო კამერების ჩანაწერების ნაწილი წაშალეს.

• "სასწრაფო დახმარების ნაცვლად ნათელმხილველი გამოვიძახე"

3 და 4 აპრილს სასამართლო პროცესზე ბიშიმბაევი დაკითხეს. ბრალდებულმა სხდომაზე ცოლის გარდაცვალების შესახებ თავისი ვერსია მოჰყვა. მისი თქმით, იმ საღამოს მისმა მეუღლემ სამი ბოთლი ღვინო დალია. ჩხუბის დროს ნუკენოვამ, ბრალდებულის თქმით, მისი პროვოცირება მოახდინა, აგინა და ძვირადღირებული აქსესუარები ტუალეტში ჩარეცხა.

"ის იდგა უნიტაზთან, ჩემგან ზურგით. როგორც ჩანს, იფიქრა, რომ ვაკავებდი და ამ დროს ხელი გავუშვი, წონასწორობა დაკარგა და პირქვე დაეცა ტუალეტზე. ”ძალიან ძლიერად”, - თქვა ბიშიმბაევმა, ამით ცდილობდა აეხსნა ქალის სახეზე მიყენებული დაზიანებების წარმოშობა.

პოლიტიკოსის თქმით, ქალი "ტუალეტის ფილებზე დაეცა". ყოფილი მინისტრი აღიარებს, რომ როდესაც ცოლი ადგომას ცდილობდა, მას ოთხი-ხუთჯერ დაარტყა წიხლი, "რათა გონზე მოეყვანა". თუმცა, ამავდროულად, ირწმუნება, რომ ამ დროს "არც ერთი სასიცოცხლო ორგანო არ დაზიანებულა“.

ამ დროს, როგორც ყოფილი მინისტრი ამბობს, მისმა მეუღლემ კვლავ დაიწყო ქმრის შეურაცხყოფა, რის შემდეგაც ოთხჯერ დაარტყა ხელი. შედეგად, ქალი კვლავ დაეცა. ”როდესაც დაეცა, სამ-ოთხჯერ დავარტყი წიხლი ბარძაყზე, დუნდულაზე, ადექი, რატომ ხარ ასე? ვეუბნებოდი, გავბრაზდი და თმაში მოვკიდე ხელი რომ ამეწია“, - განაცხადა ბიშიმბაევმა სასამართლოში.

• დაკითხვისას ცნობილი გახდა, რომ ბიშიმბაევმა ნათელმხილველს მას შემდეგ დაურეკა, რაც მისმა ცოლმა გონება დაკარგა და გონზე ვერ მოდიოდა.

"ძალიან შევშფოთდი და ნათელმხილველ მეგობარს დავურეკე. ვუთხარი, "გონზე არ მოსულა, სისხლჩაქცევა აქვს (სახეზე)“. რაზეც მითხრა: ”ის უბრალოდ დაიღალა, გონს მოვა, მოდი, სახლში წადი. გული დამიმშვიდდა“, - თქვა ყოფილმა მინისტრმა.

ბიშიმბაევმა სასწრაფო დახმარება არ გამოიძახა და სწორედ ამ დროს დაურეკა თავის ბიძაშვილს, ბახიტჟან ბაიჟანოვს და სთხოვა, პრეპარატების ასპირინისა და კეტონალის მიტანა.

სასამართლო პროცესზე ცნობილი გახდა, რომ ბიშიმბაევმა ასევე სთხოვა თავის ნათესავს წაეშალა ჩანაწერები ვიდეოკამერებიდან, რათა მათი კონფლიქტის ვიდეო არ გავრცელებულიყო ყოფილმა მინისტრმა ნუკენოვას ტელეფონი ბიძაშვილს მისცა და უბრძანა, სახლში წაეღო, რათა ქალი კარგა ხანს ვერავის ეპოვა.

• ექსპერტიზა და ვიდეოჩანაწერები

სასამართლო-სამედიცინო ექსპერტიზის დასკვნის მიხედვით, ნუკენოვა დახურული კრანიო-ცერებრალური ტრავმის შედეგად გარდაიცვალა. ქალს ცხვირი ჩატეხილი ჰქონდა და მრავლობითი სისხლჩაქცევები და დაზიანებები აღენიშნებოდა თავის არეში.

ექსპერტიზამ დაასკვნა, რომ ნუკენოვა ამგვარ დაზიანებებს მხოლოდ დაცემის შედეგად დაზიანებებს ვერ მიიღებდა. უფრო მეტიც, პროკურატურამ სასამართლოში გაავრცელა სათვალთვალო კამერებიდან ამოღებული ვიდეომასალა. "ბიშიმბაევი ნუკენოვას თმით სწევს მაღლა და სახეში ურტყამს. ამის შემდეგ შემდეგ ცდილობს მის VIP განყოფილებაში შეყვანას“, - განაცხადა პროკურორმა.

• პირველ სასამართლო სხდომაზე, 29 მარტს, ცნობილი გახდა, რომ რესტორნის თანამშრომლებმა წაშალეს ჩანაწერების ნაწილი ვიდეოკამერებიდან - ბაიჟანოვის, ბიშიმბაევის ბიძაშვილის მოთხოვნით, თუმცა ნაწილი ხელუხლებელი დარჩა.

პარალელურად, პროკურატურამ წაიკითხა ბარმენის ჩვენება. რომელიც ამბობს, რომ პოლიციის მისვლამდე ბიშიმბაევი დანით ხელში დადიოდა.

"ბიშიმბაევმა თქვა, რომ მან ცოლი მოკლა და ქალი რესტორნის VIP განყოფილებაში იწვა. ამის გამო, დიდი ალბათობით, თავის მოკვლაც სურდა“, - გააჟღერა მოწმის ჩვენება პროკურორმა.

• აღშფოთებული საზოგადოება

ბიშიმბაევის ჩვენებამ, ისევე როგორც დანაშაულის არ აღიარებამ, საზოგადოების პროტესტი გამოიწვია ყაზახეთსა და სხვა ქვეყნებში. მოკლული ქალის მხარდასაჭერად სოციალურ ქსელებში ჰეშთეგი #forSaltanat გამოჩნდა. ბიშიმბაევს ბრალად ედება მსხვერპლის დადანაშაულება და ინფორმაციით მანიპულირება.

ბიშიმბაევის ოპონენტები ყოფილი მინისტრისთვის სამუდამო პატიმრობას ითხოვენ.

კრიზისული ცენტრების კავშირის ხელმძღვანელმა, ზულფია ბაისაკოვამ BBC-ს განუცხადა, რომ სასამართლო პროცესის ონლაინ ჩატარებამ მხოლოდ გაზარდა საზოგადოების აღშფოთება.

როგორც დასაწყისში აღვნიშნეთ, სასამართლო სხდომა ყაზახეთის უზენაესი სასამართლოს YouTube არხზე გადაიცემა.

"პირადად ბიშიმბაევის მიმართ ინტერესი გაიზარდა, რადგან ეს რეციდივია. ის ადრეც იყო განსასჯელის სკამზე, მაგრამ სხვა მუხლით, კორუფციული თაღლითობისთვის. პრეზიდენტმა ის ციხიდან ვადამდე გაათავისუფლა და კვლავ დაარღვია კანონი - მან მკვლელობა განსაკუთრებული სისასტიკით ჩაიდინა“, - ამბობს უფლებადამცველი.

• როგორ სჯიან ყაზახეთში ოჯახურ ძალადობაში ბრალდებულებს?

ყაზახეთის გენერალური პროკურატურის მონაცემებით, პოლიცია ყოველდღიურად იღებს დაახლოებით 300 შეტყობინებას ოჯახური ძალადობის შესახებ და ყოველწლიურად მინიმუმ 80 ქალს კლავენ.

"ოჯახური ძალადობის პრევენციის შესახებ“ კანონის თანახმად, პოლიციას შეუძლია მოძალადის მიმართ გამოსცეს შემაკავებელი ორდერი, რომელიც კრძალავს მსხვერპლთან მიახლოებას 30 დღით. ორდერის დარღვევის შემთხვევაში, აგრესორს ადმინისტრაციული პატიმრობა 10 დღემდე ვადით ემუქრება.

ყაზახეთში ოჯახური ძალადობის სასჯელის გადახედვაც მიმდინარეობს. ქვეყნის ხელისუფლებამ მიიღო გადაწყვეტილება მსუბუქი დაზიანების შემთხვევაშიც კი, მოძალადეებმა პასუხი აგონ.