"კაცმა კუთხეში თქვა თავისთვის რაღაც, ვის არ შეგიგინებიათ ოჯახში, ან პრივატულად გამწარებულზე" - ირაკლი ზარქუა ბექა ოდიშარიაზე
კაცმა (ბექა ოდიშარიამ) კუთხეში თქვა თავისთვის რაღაც, ვის არ შეგიგინებიათ ოჯახში, ან პრივატულად გამწარებულზე, - ამის შესახებ საპარლამენტო უმრავლესობის დეპუტატმა, ირაკლი ზარქუამ პარლამენტის პლენარულ სხდომაზე განაცხადა.
როგორც ზარქუამ აღნიშნა, ოპოზიციის ნაწილი "ყველაფრით სპეკულანტობს".
"მინდა გამოვეხმაურო, ხატია დეკანოიძე იყო და მეორე ხელმოცარული დიპლომატი რომ გვყავს პარლამენტში, დაგმეს ვითომდა, დიდი შეშფოთებები გამოთქვეს.
ადამიანმა (ბექა ოდიშარიამ) გუშინ პრივატულ საუბარში რაღაც თქვა არმოსაწონი, გამოვიდა და დააფიქსირა საკუთარი პოზიცია. თქვენ რანაირად ამოგეღებათ ხმა?! თქვენი მებრძოლი და სულიერი მეგობარი გვარამია მთელი ქვეყნის მასშტაბით დედაზე აგინებდა საზოგადოებას და ხმა ამოგიღიათ?! დაგიგმიათ პირდაპირ ეთერში?! ეს არის, ორმაგი სტანდარტი რომ გაქვთ. ყველაფრით სპეკულანტობთ, ვითომ აქ შეშფოთდნენ. კაცმა კუთხეში თქვა თავისთვის რაღაც, ვის არ შეგიგინებიათ ოჯახში, ან პრივატულად გამწარებულზე. გამოვიდა და თქვა, არასწორად მოვიქეციო და ბოდიში მოიხადა. გამოხვედით და გინდათ, რომ რეკლამა დაიწეროთ.
ან ამ კანონს რას ერჩით?! სამადაშვილის მესმის, იმიტომ რომ ამით მიეცემა შესაძლებლობა ბატონ ხაზარაძეს, რომ არ ჩასვას სიაში, ვალდებულება ჰქონდა ჩაესვა. ახლა დაწინაურდა გუშინ ანა მასწავლებელი რომ ჰყავს. თუ წარმოდგენილები ხართ თქვენი კომპეტენციით, პოზიციებით, სახელმწიფოებრივი პოზიციით, დაიმსახურებთ ადგილს აქაც და იქაც. "ქართული ოცნება“ ვამაყობთ ჩვენი ქალბატონებით, მათი პატრიოტიზმით და კომპეტენციით“, - განაცხადა ზარქუამ.
ინფორმაციისთვის, გუშინ პარლამენტის პლენარულ სხდომაზე საპარლამენტო უმრავლესობის წევრმა ბექა ოდიშარიამ შეურაცხმყოფელი რეპლიკა მაშინ გამოიყენა, როცა პარლამენტის ტრიბუნიდან გენდერული კვოტირების გაუქმების კრიტიკით "ლელოს“ დეპუტატი ანა ნაცვლიშვილი გამოდიოდა.