32-ე სკოლაში, სადაც ორი დღის მოსწავლეები მოიწამლნენ, მშობლების თქმით, დღეს რამდენიმე ბავშვი ისევ შეუძლოდ გახდა - რას ამბობს სკოლის დირექტორი?

26 მარტს, დაახლოებით 11 საათისთვის, თბილისში, 32-ე საჯარო სკოლაში ერთ-ერთ საკლასო ოთახში მყოფი მოსწავლეები შეუძლოდ გახდნენ, სკოლის დირექტორმა სასწრაფო დახმარება გამოიძახა, რის შემდეგაც სკოლაში მივიდნენ სამაშველო და საპატრულო პოლიციის ჯგუფებიც. მოსწავლეთა ნაწილს დახმარება ადგილზე აღმოუჩინეს, ნაწილი კი პრევენციის მიზნით საავადმყოფოში გადაიყვანეს. როგორც ითქვა, სკოლაში ე.წ. წიწაკის სპრეი გაუშვეს.

შინაგან საქმეთა სამინისტრომ, ინციდენტის გამოძიება ნაკლებად მძიმე, ან მძიმე დაზიანებების გაუფრთხილებლად მიყენების კვალიფიკაციით, "სისხლის სამართლის კოდექსის“ 124-ე მუხლით დაიწყო. დაინიშნა ექსპერტიზაც, რომლის დასკვნაც ამ ეტაპზე უცნობია.

როგორც ცნობილი გახდა, დღეს, 28 მარტს, 32-ე სკოლაში იმავე მე-11-ე კლასის სამი მოსწავლე ისევ შეუძლოდ გახდა და სასწრაფო დახმარების ბრიგადის კვლავ გამოძახება გახდა საჭირო. ერთ-ერთი დაზარალებული მოსწავლის მშობელი ambebi.ge-ს უყვება:

"2 დღის წინ მომხდარ ფაქტზე სს საქმე აღიძრა. მე-11 კლასელი ბავშვის მიერ გაშვებული სპრეის შედეგად დაშავდა 23 ადამიანი, რომლებიც კლინიკაში გადაიყვანეს (თვითდინებითაც ბევრი მივიდა). სავარაუდოდ, ეს წიწაკის სპრეი არ იყო, ვინაიდან ბავშვებს სისხლში სხვადასხვა მომწამვლელი აირები ამოუვიდათ... ვინაიდან ექსპერტიზის პასუხი ჯერ არ გვაქვს, უცნობია, რა ნივთიერება იყო გაშვებული, გვითხრეს, - ნივთიერების შემცველობის დადგენას რამდენიმე დღე დასჭირდებაო. ჩვენმა დირექტორმა იმის მაგივრად, რომ სპრეის გაშვების მერე (თუნდაც წიწაკის ყოფილიყო), სასწავლო პროცესი შეეწყვიტა, კიდევ ორი გაკვეთილი ჩაატარებინა, ბავშვები კაბინეტებში იყვნენ გამოკეტილი. სკოლის ადმინისტრაციის სერიოზული გადაცდომაა, როცა ბავშვები იმ სივრციდან არ გამოათავისუფლეს და ჰაერზე არ გაუშვეს, იმ მოსწავლემ სპრეი მეორე გაკვეთილზე გაუშვა, ამის მერე ბავშვები ჩატოვეს და კიდევ ორი გაკვეთილი ჩაუტარეს, მიუხედავად იმისა, რომ ისინი ჩიოდნენ - ცუდად ვართ, ჰაერი არ გვყოფნის, ფანჯარა გააღეთო და ა.შ. როგორც ვიცით, ამ მოსწავლეს სპრეი ჯერ თავის საკლასო ოთახში გაუშვია, მერე გასულა და დერეფანში, ბოლოს კი გვერდზე კაბინეტთან ახლოსაც გაუსხამს.

დირექტორი აიძულებს მასწავლებლებს, ცალკე ბავშვებს, რომ იარონ სკოლაში. რა მოხდებოდა, რამდენიმე დღით რომ შეწყვეტილიყო სასწავლო პროცესი? დღეს შემაჯამებლები დაუნიშნა, მივიდნენ ბავშვები და რამდენიმე კიდევ მოიწამლა. აკადემიური სამედიცინო ცოდნა არ არის საჭირო იცოდე, რა აირია გაშვებული, შესაბამისი ხსნარით და მეთოდით რომ დამუშავდეს ტერიტორია. ჩვენ ხომ ზუსტად არ ვიცით სპრეის შემადგენლობა, შესაბამისად, შესაძლოა ის წყლითაც მოშორებულიყო, ან კონკრეტული ქიმიური საშუალებით, რომელიც არ იყო გამოყენებული. მაინტერესებს, რა გამოიყენა სკოლამ, როცა არ იცოდა, რა ნივთიერება იყო გაშვებული?

დღეს კიდევ მოიწამლნენ ბავშვები, სავარაუდოდ, ან კარგად არ გაიწმინდა იქაურობა ან ეს გამოიწვია იმ ხსნარმა, რითაც ოთახები დამუშავდა (სასწრაფომ ერთი პედაგოგი და ერთი ბავშვი გადაიყვანა სკოლიდან, 4 ბავშვი მშობლებმა წაიყვანეს სამედიცინო პუნქტში). არ ვიცი, ამას რა ჰქვია, რა დონეა, ნუცას სკოლაა, თუ რა?! სკოლის ადმინისტრაცია აშკარად ვერ ზრუნავს ბავშვების უსაფრთხოებაზე. ბავშვს რომ სკოლაში გაუშვებ და სასწრაფო კლინიკაში გადაიყვანს, რაზეა საუბარი? აქ მხოლოდ იმ მე-11-ე კლასელის ბრალეულობა არ იკვეთება, არის სკოლის ადმინისტრაციის სერიოზული გადაცდომაც - რაც უნდა ყოფილიყო, უსაფრთხოების წესებიდან გამომდინარე, ყველა შემთხვევაში შენობა სრულად უნდა დაეცალათ, არა თუ მეორე ცვლაში გაეგრძელებინათ გაკვეთილები.

მოწამლულებს შორის იყვნენ ბავშვები, რომლებიც იმ ღამით დატოვეს კლინიკაში, ზოგი გაითიშა და 20 წუთი გონზე ვერ მოიყვანეს. ძიების დასადგენია, იმ ბავშვმა რა გაუშვა, ერთია, მან რა დააშავა და მეორე - ადმინისტრაციამ თავისი უმოქმედობით და იძულების წესით ამ ბავშვების კაბინეტებში ჩაკეტვით. მეორე დღეს მშობლებმა უარი ვთქვით ბავშვების სკოლაში გაშვებაზე, დღეს მივიდნენ და ინტოქსიკაციით კიდევ გადაიყვანეს ბავშვები კლინიკაში. ნივთიერება რომ არ არის დადგენილი, რა იცი, რასთან გაქვს საქმე და რით ამუშავებ? ელემენტარული, ქიმიის მასწავლებლისთვის ეკითხათ ან ალერგოლოგი ჩაერთოთ საქმეში.

ambebi.ge 32-ე სკოლის დირექტორს ნინო ხუციძე - კაშიას დაუკავშირდა:

"დღეს ინტოქსიკაციას ადგილი არ ჰქონია. ამ დილით დავიწყეთ სწავლა, სასწავლო პროცესი არც ჩაშლილა, არ იყო ეს იმ მოქმედების სპრეი, რომ სასწავლო პროცესი შეგვეწყვიტა. ეს იყო წიწაკის სპრეი, რომელიც ჩემი ხელით გადავეცი გამოძიებას. 21 მოწამლულ ბავშვს ვესაუბრე და ჩემთან არც გამომძიებელს დაუფიქსირებია მსგავსი, რომ ეს სხვა აირია. ეს ალბათ უკვე ფსიქოლოგიური მომენტია, პანიკაა. ნუთუ სკოლაში შეიძლება ისეთი ნივთიერების გამოყენება, ბავშვები რომ მოწამლოს? ზოგადად, ყოველი დღის ბოლოს რითაც მუშავდება ოთახები, იმით დამუშავდა - ანტიბაქტერიული ხსნარებით, რომელიც კოვიდის დროს იქნა შემოტანილი და დაშვებულია, თავისი მარკირება აქვს და სერტიფიკაცია. დღის ბოლოს ამ ხსნარებით, სველი წესით მუშავდება სკოლა მეორე დღისთვის. 26 მარტს სასწრაფო დახმარებამ 21 ბავშვი გადაიყვანა კლინიკაში და აქედან 2 დატოვეს დილამდე. დღევანდელ დღეს რაც შეეხება, გამოვიძახეთ სასწრაფო და მისმა ექიმმა ჩემს თვალწინ უთხრა მშობელს, არ არის გადასაყვანი, თუ მაინც გნებავთ, გადავიყვანო. ექიმმა ისიც თქვა, რომელიმე ექიმი თუ იმას იტყვის, რომ ამ ბავშვს ალერგიული ფონი აქვს, ვტოვებ სამსახურს და ექიმის დიპლომსო. მეც იმას ვკითხულობ, რა იყო დღეს, რასთან გვაქვს საქმე. ბავშვს წნევა ჰქონდა მომატებული, მეტი არაფერი, ამიტომ გამოვიძახეთ სასწრაფო. ვინ თქვა, რომ იმ დღეს მეორე ცვლაშიც გაგრძელდა გაკვეთილები? მეორე ცვლის არცერთ ბავშვს პრობლემა არ ჰქონია და სასწრაფო არ დასჭირვებია, ამას გეუბნებით სრული პასუხისმგებლობით. დღეს მეტი პანიკაა, ვიდრე რამე სხვა. დღეს ცვლის პერიოდში (ერთი ცვლა გადიოდა, მეორე - შემოდიოდა), მასწავლებელი გაგვიხდა შეუძლოთ და სასწრაფო სულ სხვა რამის გამო გამოვიძახეთ, მეორედ - მოსწავლის გამო. მშობლებმა როცა ორი სასწრაფოს მანქანა დაინახეს, რა თქმა უნდა, ინერვიულეს, ეს ფსიქოლოგიური მომენტია. მეც ვინერვიულე, ყველანი იქ ვიყავით და გვესმოდა, რას ამბობდა სასწრაფო დახმარების ექიმი. ერთი კლასიდან იყო შეუძლოდ ერთი ვაჟი და ორი გოგონა, ვაჟი არ წაიყვანეს, გოგონები გადაიყვანეს, ექიმებმა ჩახედეს ყელში და შინ გამოუშვეს, უთხრეს, რომ არანაირი ალერგიული ფონი არ გაქვთო. სასწავლო პროცესი მიმდინარეობს, ყველანი ადგილზე და კარგად ვართ, საშიში აღარაფერია“.