"ეს არის რუსეთის უშიშროების ძალზე ფატალური ჩავარდნა" - რას აჩვენებს მოსკოვში მომხდარი ტერაქტი: ქვეყანა ტერორისტების სამიზნე კვლავაც შეიძლება აღმოჩნდეს?
შესაძლოა, რუსეთი ტერორისტული ორგანიზაციების დამატებით სამიზნედ იქცეს.
22 მარტს მოსკოვის მახლობლად საკონცერტო დარბაზ "კროკუს სიტი ჰოლში“ განხორციელებულ ტერაქტზე რუსეთის საგამოძიებო კომიტეტს ჯერ არ წამოუყენებია ოფიციალური ვერსია თავდასხმის დამკვეთთა და ორგანიზატორთა თაობაზე. როგორც ცნობილია, მომხდარისთვის პასუხისმგებლობა იკისრა ტერორისტულმა დაჯგუფება "ისლამურმა სახელმწიფომ“. ტერაქტის შედეგად დაღუპულია, სულ მცირე 137 ადამიანი და დაჭრილია ასზე მეტი. რუსეთის ხელისუფლების წარმომადგენელთა თქმით, მსხვერპლის რიცხვი ალბათ გაიზრდება.
25 მარტს კრემლის პრესმდივანმა, დმიტრი პესკოვმა ჟურნალისტებს უთხრა, რომ რადგან გამოძიება გრძელდება და მკაფიო ვერსიები ჯერ არ არსებობს, ხელისუფლება საკონცერტო დარბაზის შენობაში მასობრივი მკვლელობის შესახებ არაფერს იტყვის.
როგორც BBC იუწყება, ტერორისტულ ორგანიზაცია "ისლამურ სახელმწიფოსთან“ დაკავშირებულმა საინფორმაციო სააგენტო "ამაკმა“ გამოაქვეყნა ვიდეო, რომელშიც ჩანს, თუ როგორ შედიან ტერორისტები საკონცერტო ცენტრის შენობაში, როგორ ხსნიან ცეცხლს და როგორ კლავენ ცივი იარაღით ძირს დაცემულ ერთ-ერთ ადამიანს.
ვიდეო გაფორმებულია არაბული სუბტიტრებით, რომლებიც თან ახლავს ტერორისტების მიერ გაჟღერებულ რელიგიურ ლოზუნგებს. ჩანაწერში ჩანს, როგორ უხსნის ავტომატიდან ცეცხლს ერთ-ერთი თავდამსხმელი შენობაში მყოფ ადამიანებს, მეორე კი როგორ ამხნევებს მას და მოუწოდებს, "მოკლას, არ დაინდოს ისინი".
"ისლამური სახელმწიფოს“ მტკიცებით, თავდასხმაში ოთხი ადამიანი მონაწილეობდა, ოთხივე დაკავებულია და მათგან მხოლოდ ერთი არ აღიარებს დანაშაულს.
შეგახსენებთ, რომ 22 მარტს, დაახლოებით საღამოს 6 საათზე, მოსკოვის ოლქში, კრასნოგორსკში, თავდასხმა მოაწყვეს ავტომატური ცეცხლსასროლი იარაღებით შეიარაღებულმა ადამიანებმა, რომლებიც სროლით შეიჭრნენ საკონცერტო დარბაზში და ცეცხლი გაუხსნეს კონცერტის დაწყების მოლოდინში შენობის ჰოლში მყოფებს და შემდეგ დარბაზში გადაინაცვლეს, სადაც ანსამბლ "პიკნიკის“ კონცერტს ათასობით ადამიანი უნდა დასწრებოდა.
"კროკუს სიტი ჰოლის“ საკონცერტო სივრცის მფლობელმა არაზ აგალაროვმა განაცხადა, რომ შენობაში ყველა ხანძარსაწინააღმდეგო სისტემა გამართულად მუშაობდა და რომ საკონცერტო ცენტრის დაცვამ ვერ მოახერხა შეიარაღებული თავდასხმის შეკავება.
გიორგი კობერიძე, პოლიტოლოგი, GIPA-ს პროფესორი:
- რუსეთსა და "ისლამურ სახელმწიფოს“ შორის ომი დიდი ხანია, რაც მიმდინარეობს, ეს არახალია. გვახსოვს, რუსეთის წინააღმდეგ მიმართული ტერაქტების ბევრი სერია, მათ შორის 2015 წელს ეგვიპტიდან პეტერბურგისკენ შარმალ-შეიხი - პეტერბურგის რეისის აფეთქება და თვითმფრინავის ჩამოგდება. ასევე ხშირია, როდესაც "ისლამური სახელმწიფოს“ წარმომადგენლები დაპირისპირებაში შედიოდნენ რუსეთის სხვადასხვა ოლქებში და ცდილობდნენ ტერაქტების განხორციელებას...
ახლა, როდესაც რუსეთი მთლიანად გადართულია უკრაინაში ომზე და საგარეო პოლიტიკაზე, ნაკლები ყურადღება ეთმობა სხვა ლოკალურად მნიშვნელოვან უსაფრთხოების დეტალებს. სწორედ ეს მომენტი გამოიყენა და ამით ისარგებლა "ისლამურმა სახელმწიფომ“. მით უმეტეს, ეს არის "ისლამური სახელმწიფოს“ ხორასანის განშტოება, რომელიც ავღანეთში გვხვდება და მისი დიდი ნაწილი დაკომპლექტებულია შუა აზიელებით. ასევე, უნდა გვახსოვდეს, რომ შუა აზია დიდი ხნის განმავლობაში რუსეთის უკანა ეზოს წარმოადგენდა. თუკი ის ვერსია მართლაც დადასტურდა, რომ ტერორისტული ქმედება მოსკოვში მართლაც ტაჯიკების მიერაა განხორციელებული, რუსეთი თავად 90-იანი წლებიდან დგას ტაჯიკეთში და ვიცით, მაშინაც სწორედ ამ რეგიონში გამოდიოდა რადიკალური ისლამური ძალების წინააღმდეგ. ჩვენ რაც ახლა ვიხილეთ, ეს არის "ისლამური სახელმწიფოს“ გამოყენებული შესაძლებლობა იმიტომ, რომ როგორც აღვნიშნე, ნაკლები ყურადღება ეთმობოდა რუსეთის შიდა უსაფრთხოებას.
რუსეთის უშიშროება ჩავარდა და პუტინის მცდელობა, რომ ეს ყველაფერი მიმართოს და რაღაც დონეზე მაინც უკრაინასთან დააკავშიროს, სხვა არაფერია, თუ არა საკუთარ თავზე პასუხისმგებლობის მოხსნა - რუსეთის უშიშროება ისე სუსტად და მყიფედ გამოიყურება, რომ მათ დემონსტრანტების და პროტესტანტების დაკავება რამდენიმე წუთში შეუძლიათ, ხოლო ტერორისტულ ქმედებაზე სათანადო პასუხს ვერ სცემენ. ამიტომ უნდა პუტინს რაღაც დამატებითი საფეხური შექმნას, თითქოს ეს თავისი ჩავარდნა რაღაცით გაამართლოს და უფრო სერიოზული გახადოს საერთაშორისო ძალების მონაწილეობა, რაც სასაცილო მცდელობაა. ყველასთვის გასაგებია, რომ ეს არის შიდა მოხმარების პიარი, რომლისაც ნაკლებად სჯერათ თავად რუსეთის შიგნითაც კი. გასაგებია, პასუხისმგებლობა "ისლამურმა სახელმწიფომ“ აიღო, რომელიც "თალიბანის“ წინააღმდეგ გამოდის, თავის მხრივ, თალიბანის მომხრეა რუსეთი. ცნობილია, რომ "ისლამური სახელმწიფო“ და "თალიბანი“ ერთმანეთს ავღანეთისთვის ებრძვის და რუსეთი ორი ტერორისტული ორგანიზაციიდან ერთ-ერთს (თალიბანს) უჭერს მხარს. სრულიად რეალისტური ვერსიაა, რომ ტერაქტი "ისლამურმა სახელმწიფომ“ განახორციელა, თავდასხმა მათ აიღეს საკუთარ თავზე, რუსეთმა კი ვერ მოახდინა რეაგირება, ამიტომაც მოიყვანეს სისრულეში ეს აქტი.
ეს ტერორისტული აქტი განკერძოებული მოვლენაა და რუსეთის მიმდინარე აგრესიის საკითხთან რაიმე კავშირში ყველაზე ნაკლებადაა. რუსეთს ახლა იმდენად დიდი რესურსები აქვს სხვა მიმართულებით გადართული, რომ მას ეს ტერაქტი, უბრალოდ, გაეპარა. ჩვენ ახლა ვხედავთ იმას, რომ დასავლეთმა უკეთ მოახდინა რეაგირება, როდესაც რუსეთი წინასწარ გააფრთხილა მოსალოდნელი საფრთხეების შესახებ და ისიც ვნახეთ, თავად რუსეთმა ეს ინფორმაცია როგორ უგულებელყო, როცა ამბობდნენ, გვაშინებენ, მეტი არაფერიო. ეს არის რუსეთის უშიშროების ძალზე ფატალური ჩავარდნა, რაც იმ ფაქტზე მიუთითებს, რომ რუსეთი შესაძლოა ტერორისტული ორგანიზაციების დამატებით სამიზნედ კვლავ იქცეს - ტერორისტები მოწინააღმდეგეებში სისუსტეებს ეძებენ და თუ დაინახეს და დაიჯერეს, რომ მოწინააღმდეგე საკმარისად სუსტია და წინააღმდეგობას ვერ გაუწევს, შესაძლებელი ხდება ხოლმე, რომ ამ ქვეყნების წინააღმდეგ კვლავ გამოვიდნენ.
ტერორიზმი განკერძოებული საკითხია და ის პოლიტიკური რეჟიმების კონსოლიდაციას უფრო ახდენს ხოლმე, ვიდრე დაქსაქსულობას. საბოლოოდ კი, ყველაფერი მიანიშნებს იმაზე, რომ რუსეთს არ აქვს საკმარისი რესურსი, ერთდროულად ებრძოლოს ტერორიზმსაც და სხვა ქვეყნების დაპყრობაც სცადოს.