"ეფესბე"-ს განცხადება და პირველი შეფასებები - რას ამბობენ მოსკოვში, უკრაინასა და აშშ-ში "კროკუს სითი მოლში" მომხდარ თავდასხმაზე
მოსკოვში, "კროკუს სითი მოლში" მომხდარ თავდასხმასთან დაკავშირებით, პირველი ოფიციალური განცხადებები კეთდება.
- რუსეთის უსაფრთხოების ფედერალური სამსახურის, "ეფესბე"-ს ინფორმაციით, მოსკოვში საკონცერტო დარბაზში სროლისა და ხანძრის შედეგად 40 ადამიანი დაიღუპა, 100-ზე მეტი დაიჭრა.
რუსეთის უშიშროებამ მომხდარი ტერაქტად შეაფასა და განაცხადა, რომ დაზარალებულების მიმართ ყველა შესაძლო ღონისძიება მიიღება. განცხადების თანახმად, სპეცსამსახურები აქტიურ სამძებრო ღონისძიებებს ატარებენ.
- "ტერორისტებს მხოლოდ საპასუხო ტერორიზმი ესმით", - ამის შესახებ რუსეთის უშიშროების საბჭოს ხელმძღვანელის მოადგილე, დმიტრი მედვედევი “ტელეგრამის” პირად არხზე წერს.
განცხადებაში მედვედევი კიევს ახსენებს და აცხადებს, რომ თუკი "კიევის ტერორისტების" კავშირი დადგინდება, უნდა იპოვონ და გაანადგურონ, მათ შორის მათი "იდეოლოგიური შთამაგონებლები" და ხელისუფლების ოფიციალური პირები.
“ტერორისტებს მხოლოდ საპასუხო ტერორიზმი ესმით. არანაირი სასამართლოები და გამოძიებები არ დაგვეხმარება, თუ ძალას ძალას არ დავუპირისპირებთ, ხოლო სიკვდილს - ტერორისტების მასობრივ მკვლელობებსა და მათი ოჯახების წინააღმდეგ რეპრესიებს.
თუ დადგინდება, რომ ეს კიევის რეჟიმის ტერორისტები [იყვნენ], მათთან და მათ იდეოლოგიურ შთამაგონებლებთან სხვანაირად მოქცევა შეუძლებელია, ყველა მათგანი უნდა ვიპოვოთ და დაუნდობლად გავანადგუროთ, როგორც ტერორისტები. მათ შორის სახელმწიფოს ოფიციალური პირები, რომელთაც ასეთი ბოროტმოქმედება ჩაიდინეს. სიკვდილი სიკვდილის საპასუხოდ”, - წერს მედვედევი.
- "უკრაინას მოსკოვში მომხდარ თავდასხმასთან კავშირი არ აქვს. ამის შესახებ უკრაინის პრეზიდენტის ადმინისტრაციის ხელმძღვანელის მრჩეველმა, მიხაილო პოდოლიაკმა განაცხადა.
“რუსეთის მოსკოვის ოლქში “კროკუს სითიში” მომხდარ მოვლენებთან დაკავშირებით, სადაც ამ წამს გარკვეული მოვლენები, გარკვეული სროლა, დაუდგენელი პირების მხრიდან გარკვეული ტერორისტული ქმედებები მოხდა - მოდით, დავაფიქსიროთ: უკრაინას ნამდვილად არანაირი კავშირი არ აქვს ამ მოვლენებთან", - განაცხადა პოდოლიაკმა.
მან აღნიშნა, რომ უკრაინას არასდროს არ გამოუყენებია ომის წარმოების ტერორისტული მეთოდები და განაცხადა, რომ დასავლეთის ქვეყნების საელჩოები მარტის დასაწყისში რუსეთის ტერიტორიაზე დაგეგმილ ექსტრემისტულ აქციებთან დაკავშირებით გაფრთხილებებს ავრცელებდნენ.
“ამიტომ კიდევ ერთხელ ხაზს ვუსვამ, რომ “კროკუს სითიში” ტერაქტებთან ან სროლასთან, ან როგორც დაარქმევთ, უკრაინას ნამდვილად არანაირი კავშირი არ აქვს”, - განაცხადა პოდოლიაკმა.
- თეთრი სახლის განცხადებით, ამ დროისთვის, არ არსებობს არანაირი მანიშნებელი, მოსკოვში, "კროკუს სითი ჰოლში" განვითარებულ მოვლენებთან უკრაინის კავშირზე. თეთრი სახლის სპიკერმა ჯონ კირბიმ განაცხადა.
შეგახსენებთ, მოსკოვში, "კროკუს სითი ჰოლში" სროლისა და ხანძრის შედეგად, ოფიციალური ცნობებით დაიღუპა 40 და დაშავდა 100-ზე მეტი ადამიანი. რუსეთის უშიშროების სამსახურმა მომხდარი ტერაქტად შეაფასა. დიმიტრი მედვედევმა მომხდართან დაკავშირებულ განცხადებაში კიევი ახსენა და განაცხადა, რომ ტერორისტებს მხოლოდ საპასუხო ტერორიზმი ესმით. მისი თქმით, თუ დადგინდება, რომ ისინი "კიევის რეჟიმის ტერორისტები იყვნენ", მათთან და მათ შთამაგონებლებთან სხვანაირად მოქცევა შეუძლებელია.
- ნახეთ ასევე:
- დაღუპულია 40 ადამიანი, შენობაში ხანძარია, ადამიანები გამოსვლას ვერ ახერხებენ, ისმის აფეთქებების ხმა - მოსკოვში სპეცრაზმმა შტურმი დაიწყო: ბოლო ცნობები (ფოტოები)
- ჩამოინგრა შენობის სახურავის ნაწილი და არსებობს საფრთხე, რომ ჩამოინგრეს ერთ-ერთი სართული - რა ვიცით მოსკოვში მომხდარ თავდასხმაზე, რომელსაც კრემლში "სისხლიანი ტერაქტი უწოდეს" (ფოტოები)
- რუსული მედიის ცნობით, მაშინ როცა მოსკოვის Crocus City Hall-ში თავდასხმა დაიწყო, შენობაში 6200 ადამიანი იმყოფებოდა