"რასაც გეტყვით, ძალიან მოულოდნელი იქნება" - რა თქვა პუტინმა ნავალნიზე და უკრაინაში დაწყებულ ომზე: როგორია რუსეთის მეთაურის გეგმა ახალ საპრეზიდენტო ვადაზე

რუსეთის ფედერაციის საპრეზიდენტო არჩევნებში ხმების 87.34%-ით მოქმედი პრეზიდენტი, ვლადიმერ პუტინი ლიდერობს, დათვლილია ბიულეტენების 98.02%, - ამის შესახებ რუსეთის ცენტრალურმა საარჩევნო კომისიამ განაცხადა.

რაც შეეხება დანარჩენ კანდიდატებს, ამ დროისთვის არსებული მონაცემებით: ნიკოლაი ხარიტონოვმა ხმების 4.30%-ი მიიღო, ვლადისლავ დავანკოვმა - ხმების 3.80%, ლეონიდ სლუცკიმ - 3.17%. შეგახსენებთ, რუსეთში საპრეზიდენტო არჩევნები 3 დღის განმავლობაში, 15-17 მარტს მიმდინარეობდა.

ახალი საპრეზიდენტო ვადის გეგმებზე საუბრისას პუტინმა თქვა, რომ რუსეთს ყველა პირობა აქვს, რომ ქვეყანა გაძლიერდეს.

"ეს არის ძალიან მნიშვნელოვანი სამუშაო ქვეყნისთვის, რომელიც საშუალებას გვაძლევს გავაერთიანოთ საზოგადოება, ვაჩვენოთ ჩვენი არჩევანის სისწორე, რომელსაც მივყვებით, სწორი გზა, რომელსაც მივყვებით და შევქმნათ პირობები შემდგომი წინსვლისთვის, რათა რუსეთი კიდევ უფრო ძლიერი, უფრო ეფექტური იყოს და ყველა პრობლემის გადაჭრა შეეძლოს“, - აღნიშნა პუტინმა, რომელიც არჩევნების დასრულების შემდეგ საარჩევნო შტაბში მივიდა.

• მან მან ხაზგასმით აღნიშნა, რომ აუცილებელია ე.წ. „სპეცოპერაციების“ ამოცანების გადაჭრა, თავდაცვისუნარიანობისა და შეიარაღებული ძალების გაძლიერება.

პუტინის თქმით, არ გამორიცხავს, რუსეთმა უკრაინის ტერიტორიაზე სანიტარული ზონა შექმნას.

"არ ვარ მზად ახლა ვისაუბრო იმაზე, თუ რა, როგორ და როდის უნდა შემოვიერთოთ, მაგრამ არ გამოვრიცხავ, რომ დღევანდელი ტრაგიკული მოვლენების გათვალისწინებით, რაღაც მომენტში იძულებული ვიყოთ - როცა მიზანშეწონილად ჩავთვლით - შევქმნათ გარკვეული სანიტარული ზონა დღევანდელ ტერიტორიებზე, რომელიც კიევის რეჟიმს ექვემდებარება. უსაფრთხოების ზონის შექმნა, რომლის გადალახვაც საკმაოდ რთული იქნება იმ იარაღის გამოყენებით, რომელსაც მტერი იყენებს, პირველ რიგში, რა თქმა უნდა, უცხოური წარმოების“, - განმარტა პუტინმა.

მისი თქმით, რუსეთი ყოველთვის ემხრობა უკრაინის საკითხზე სამშვიდობო მოლაპარაკებებს, მაგრამ არა იმიტომ, რომ მტერმა გადაიარაღებისთვის პაუზა აიღოს.

”ყოველთვის ვამბობდი და კიდევ ერთხელ ვიმეორებ - ჩვენ ვართ მშვიდობიანი მოლაპარაკებების მომხრე, მაგრამ არა იმიტომ, რომ მტერს ვაზნები ეწურება, არამედ, თუ მართლა სერიოზულად უნდათ, გრძელვადიან პერსპექტივაში ორ სახელმწიფოს შორის მშვიდობიანი, კეთილმეზობლური ურთიერთობების დამყარებისთვის და არა 1,5-2 წლით გადაიარაღებისთვის პაუზის მიზნით. ეს არის ძალიან სერიოზული კითხვები“, - განაცხადა პუტინმა.

მისივე განცხადებით, თანახმა იყო ალექსეი ნავალნი დასავლეთის ციხეებში მყოფ პირებში გაეცვალა.

„გეტყვით, ეს ძალიან მოულოდნელი იქნება: ბატონი ნავალნის გარდაცვალებამდე რამდენიმე დღით ადრე, ზოგიერთმა კოლეგამ, და არა ადმინისტრაციის წევრებმა, მითხრა, რომ იყო იდეა, ბატონი ნავალნი გაცვლილიყო ზოგიერთ ადამიანზე, რომლებიც დასავლეთის ქვეყნებში თავისუფლების აღკვეთის ადგილებში იმყოფებიან. შეგიძლიათ დამიჯეროთ, შეგიძლიათ არა, იმ ადამიანს, ვინც მესაუბრებოდა, წინადადება ჯერ დასრულებული არ ჰქონდა, ვუთხარი: „თანახმა ვარ! მაგრამ მოხდა ის, რაც მოხდა“, - განაცხადა პუტინმა.

მისი თქმით, მზად იყო წამოეყენებია მხოლოდ ერთი პირობა: „ჩვენ გავცვლით მას და არ უნდა დაბრუნდეს. მაგრამ ეს [სიკვდილი] ხდება, ვერაფერს გახდები, ასეთია ცხოვრება", - განაცხადა ვლადიმერ პუტინმა.