სოხუმის თეატრის მიმდინარე რეპერტუარი - რა ჟანრის სპექტაკლებს იხილავს მაყურებელი
სოხუმის კონსტანტინე გამსახურდიას სახელობის პროფესიული სახელმწიფო დრამატული თეატრი მაყურებელს თბილისში დიმიტრი უზნაძის N68-ში მასპინძლობს. ამ ეტაპზე, რეპერტუარში 4 სპექტაკლია: „მარტორქები“, „ვაჟიშვილი“, „ვთამაშობთ კაბუკის“ და „სტუმარი“.
„სტუმარი“
სოხუმის თეატრის სპექტაკლი ,„სტუმარი“ , ჯონ ბოინტონ პრისტლის პიესის „ინსპექტორის ზარის“ მიხედვით რეჟისორმა დავით საყვარელიძემ განახორციელა, ხოლო გადმოქართულებული ვერსიის ავტორი ლაშა იმედაშვილია.
ინგლისელი მწერლის ჯონ ბოინტონ პრისტლის ეს კლასიკად ქცეული ნაწარმოები მსოფლიოში ერთ-ერთ ყველაზე ხშირად განხორციელებულ დადგმებს შორისაა. არსებობს პიესის არაერთი წარმატებული ეკრანიზაციაც. რაც ალბათ, იმან განაპირობა, რომ პიესაში დასმული პრობლემები, გამოწვევები მარადიულია და ყველა დროსა თუ სივრცეში გვხვდება. სოხუმის თეატრის ვერსიაში კი, პიესის მოქმედების დრო და ადგილი საქართველოს პირველი დემოკრატიული რესპუბლიკის პერიოდშია გადატანილი და ამ გზით სპექტაკლის ავტორები შეეცადნენ ინგლისში მომხდარი ამბავი, ქართველი მაყურებლისთვის უფრო „ახლობელი“ გამხდარიყო.
ერთმოქმედებიან დეტექტიური ჟანრის სპექტაკლში მონაწილეობენ მსახიობები: ლილი ხურითი, ბადრი ბეგალიშვილი, მერაბ ყოლბაია, გიორგი ყორღანაშვილი, ნათია ჩიკვილაძე, ნიკოლოზ წერედიანი და ნათია ბუნტური.
(+ 14)
„მარტორქები“
აბსურდის დრამის მსოფლიოში ერთ-ერთი ცნობილი წარმომადგენლის ეჟენ იონესკოს „მარტორქები“ ადამიანის ღირსების ჰიმნია. ნაწარმოები, ყველა იმ „იზმები“-ს წინააღმდეგ ილაშქრებს, რომლებიც ადამიანურ გრძნობებზე მაღლა დგება. სპექტაკლი „არას“ თქმის უნარს ეხება, რის გამოც პიროვნება შეიძლება საზოგადოებასთან დაპირისპირებაში სულ მარტოც დარჩეს - რაც ძალიან რთულია, თუმცა ყოველთვის გამოჩნდებიან ისეთი ინდივიდები, რომლებსაც არ სურთ კოლექტიურ სიტყვებსა, „საყოველთაო“ აზრებში გაერთიანება და თავის პრინციპების ერთგულნი რჩებიან.
ორ მოქმედებიანი სპექტაკლის რეჟისორი ზურაბ გეწაძეა. სპექტაკლში მონაწილეობენ მსახიობები: ზურაბ ყიფშიძე, ვანო თარხნიშვილი, ქეთი ასათიანი, ნინო შავგულიძე, ნიკოლოზ წერედიანი, ბადრი ბეგალიშვილი, ედემი ხვიჩია, დავით ბერაძე, ვერიკო კალანდია, ნანუკა ლითანიშვილი, ნანა შონია, თემო ნატროშვილი, პაატა ვახტანგიშვილი, სანათა ძაძამია, გიორგი გოგიშვილი და ბექა ქავთარაძე. (12+)
„ვაჟიშვილი“
მხიარული ბავშვი ნიკოლა მოულოდნელად შეიცვალა. ის მოღუშულ, ფეთქებად მოზარდად იქცა. 17 წლის ზნეშეცვლილი შვილის გამო, დედა ძალიან ღელავს, მაგრამ სიტუაციიდან გამოსავალს ვერ პოულობს. ნიკოლა გადაწყვეტს, საცხოვრებლად მამასთან გადავიდეს, რომელსაც ახალი ოჯახი ჰყავს. მამაკაცი ცდილობს შვილს გვერდში დაუდგეს, სიცოცხლის ხალისი დაუბრუნოს, მაგრამ...
თანამედროვე ფრანგი დრამატურგის ფლორიან ზერელის პიესა ძველსა და ახალ თაობათა შორის ურთიერთობას ეხება. რა უნდა გავაკეთოთ, იმისათვის, რომ მშობლებსა და შვილებს შორის განსხვავებული ხედვები დავაბალანსოთ, ორ თაობას შორის წყვეტა რომ არ მოხდეს და შვილებმა დედ-მამის მხრიდან ყურადღების დეფიციტი არ იგრძნონ - სწორედ ეს თემებია წამოჭრილი მსახიობისა და რეჟისორის მერაბ ყოლბაიას სპექტაკლში „ვაჟიშვილი“. ერთმოქმედებიან დრამაში მონაწილეობენ მსახიობები: ეკატერინე არჩაია, ჯანო იზორია, ჯულიეტა პაკელიანი, მარინა სოლომონია და ნიკა ჭკადუა. ( 7+)
„ვთამაშობთ კაბუკის“
ტრადიციული იაპონური თეატრ „კაბუკის“ პიესა „აბრეშუმის ფარანი“ მისტიკური კომედიაა მარადიული სიყვარულის, კარმისა და ბედის ძალების შესახებ. პოეტური ენით დაწერილი პიესა ახალგაზრდა სამურაისა და ოდესღაც მცხოვრები ქალის აჩრდილის სიყვარულის ამბავზე მოგვითხრობს. მეგობრები სამურაის აფრთხილებენ, რომ მისი სიცოცხლე საფრთხეშია და გოგონასთან შეხვედრებს წერტილი უნდა დაუსვას, მაგრამ მასში რაციონალურ აზროვნებაზე ძლიერი - ლტოლვა და გრძნობა აღმოჩნდება. სიყვარულით მოცული ბიჭი ქალის აჩრდილთან სქესობრივ კავშირს ამყარებს, რაც მისთვის საბედისწერო ნაბიჯი აღმოჩნდება...
რეჟისორ დავით პაპავას ამ ნამუშევარს, მაყურებელი აფასებს როგორც ერთ-ერთ ყველაზე ლამაზ სანახაობას. ერთმოქმედებიან მისტიკურ კომედიაში 11 ქალი მსახიობი მონაწილეობს: ნანკა გვარიშვილი, სანათა ძაძამია, მარიამ სარდანაშვილი, ქრისტინე ჩხიკვაძე, ეკატერინე არჩაია, მარინა სოლომონია, ჯულიეტა პაკელიანი, ვერიკო კალანდია, ლონდა კაცია, ნინო პაპავა და მილენა აჟიბა. (ასაკობრივი შეზღუდვა 12+)
მიმდინარე აფიშის და დეტალური ინფორმაციის ნახვა შეგიძლიათ აქ:
თეატრის Facebook გვერდი: https://www.facebook.com/SokhumiTheatre
თეატრის Instagram გვერდი: https://www.instagram.com/sokhumi_theatre/
ბილეთების შეძენა შესაძლებელია TKT.GE - ზე
https://tkt.ge/show/11313/vazhishvili
სოხუმის თეატრის საინფორმაციო მხარდამჭერები არიან: ambebi.ge • ამბები.ge და Palitranews - პალიტრანიუსი