"მთელი ეს გლამურული პროცედურები საერთოდ არ მსიამოვნებს" - 56 წლის პამელა ანდერსონის მორიგი ფოტოსესია უმაკიაჟოდ
პამელა ანდერსონს თავდაჯერებულობისთვის მაკიაჟი სულაც არ სჭირდება. 56 წლის მსახიობმა კიდევ ერთხელ გადაწყვიტა თავისი ბუნებრივი სილამაზის გამოჩენა და ამჯერად CR Fashion Book-სთვის გადაღებულ ფოტოებში იპოზიორა.
- ჟურნალში გამოქვეყნებულ ფოტოებში პამელას Attico-ს გამჭვირვალე კოსტიუმი და Schiaparelli- ს ქუსლიანი ფეხსაცმელი ეცვა. ფოტოსესიის განმავლობაში მან Balenciaga-ს კაბასა და Prada-ს სამოსშიც იპოზიორა.
გამოცემასთან საუბრისას Playboy-ს ყოფილმა მოდელმა 2023 წლის ოქტომბრის პარიზის მოდის კვირეულზე ბუნებრივი ვიზუალით პირველად გამოჩენაზეც ისაუბრა. როგორც ანდერსონი ჰყვება, ბევრმა ჟურნალისტმა ჰკითხა, უმაკიაჟოდ თავს არაკომფორტულად ან დაუცველად ხომ არ გრძნობდა: "ვფიქრობ, რომ ეს ჩემთვის გავაკეთე. ჩემს თავს ვეკითხებოდი, შემეძლო თუ არა სახლიდან ასეთი ვიზუალით გასვლა. საკუთარ კანში თავს მშვენივრად ვგრძნობ. თან მთელი გლამურული პროცედურები და თამაში საერთოდ არ მეხალისებოდა."
პამელა ამბობს, რომ სილამაზის სტანდარტების შეცვლა სურს. როგორც გამოცემასთან ჰყვება, მისი ოჯახის წევრები და მენეჯერები კატეგორიულად აცხადებდნენ, რომ მას ვიზაჟისტების და სტილისტების გუნდი სჭირდებოდა. პამელას თქმით, კრიტიკამ კიდევ უფრო უბიძგა, რომ მოდის კვირეულზე ბუნებრივი იმიჯით წასულიყო: "ვთქვი, რომ მაკიაჟს საერთოდ არ გავიკეთებდი და ასეც მოვიქეცი. თავს თავისუფლად ვგრძნობდი".
მას შემდეგ ანდერსონი სამზადისში რამდენიმე საათს აღარ ხარჯავს და თავის ბუნებრივ გარეგნობას უფრო მეტად აფასებს:
"ამ ინდუსტრიაში ნახევარ ცხოვრებას ვიზაჟისტების სკამზე ვატარებთ. ბევრი არაჩვეულებრივი მეგობარი მყავს, რომლებიც ვიზაჟისტები და სტილისტები არიან. ისინი ძალიან მნიშვნელოვანი ადამიანები არიან, მაგრამ საბოლოოდ ისე გამოდის, რომ ყოველდღიურად ვკარგავთ ჩვენს თავს".
წყარო: pagesix
ნახეთ ასევე:
მოამზადა: ანა სიბოშვილმა