თებერვალში მსოფლიო ოკეანის ზედაპირის საშუალო ტემპერატურამ რეკორდულ ნიშნულს მიაღწია - საფრთხეები იზრდება: მეცნიერები შიშობენ, რომ მალე ჩრდილოეთის ყინულოვანი ოკეანე ყინულის გარეშე დარჩება

მეცნიერები საგანგაშო ინფორმაციას ავრცელებენ. აღმოჩნდა, რომ მსოფლიო ოკეაანის ტემპერატურამ ბოლო თვეში უპრეცედენტოდ მოიმატა.

ეს ყველაფერი კი დედამიწის კლიმატს სერიოზული გამოწვევის წინაშე აყენებს.

მაგალითად, თებერვალში მსოფლიო ოკეანეების ტემპერატურამ რეკორდულ დონეს +21,06° ცელსიუსს მიაღწია.

Reuters-ის ცნობით, თებერვალში ოკეანის ზედაპირის საშუალო ტემპერატურამ უკვე გადააჭარბა წინა რეკორდს +20,98°-ს, რომელიც 2023 წლის აგვისტოში დაფიქსირდა.

შეგახსენებთ, რომ 2024 წლის თებერვალი ზედიზედ მეცხრე თვე იყო, რომელმაც ოკეანეების თვიური ტემპერატურის რეკორდი მოხსნა.

ცნობილია, რომ ელ - ნინიო (ელ - ნინიო, როგორც ანომალიური და გლობალური მოვლენა - გავლენას ახდენს მთელი დედამიწის კლიმატზე), ადამიანის მიერ გამოწვეული კლიმატის ცვლილებასთან ერთად, ასევე ხელს უწყობს ტემპერატურის მატებას.

"კიდევ უფრო გასაკვირი ის არის, რომ წყლის ზედაპირის ტემპერატურის ზრდა რეკორდულ დონეზეა ელ-ნინიოს ცენტრიდან მოშორებულ რეგიონებშიც. მაგალითად, ტროპიკულ ატლანტისა და ინდოეთის ოკეანეში”, - ამბობს კლიმატოლოგი რიჩარდ ალანი რედინგის უნივერსიტეტიდან. მისი თქმით, ეს მიუთითებს ატმოსფეროში სითბური გაზების გაზრდის ძლიერ გავლენაზე.

გავრცელებული ინფორმაციით, მიუხედავად იმისა, რომ წყლის ზედაპირის ტემპერატურის გლობალური საშუალო მაჩვენებლები არ ითვალისწინებს მსოფლიო ოკეანის პოლარულ ნაწილებს, იქაც ვითარება საკმაოდ მძიმეა. ანტარქტიდის ზღვის ყინულმა თებერვალში მიაღწია წლიურ მინიმუმს - მთელი სივრცის 28%-ზე ყინულის საფარის მაჩვენებელი საშუალოზე დაბალია.

მეცნიერთა თქმით, ახალმა კვლევამ აჩვენა, რომ ჩრდილოეთის ყინულოვანი ოკეანე შეიძლება მალე დარჩეს ზღვის ყინულის გარეშე, თითქმის 10 წლით უფრო ადრე, ვიდრე აქამდე წინასწარმეტყველებდნენ.

"ეს გარდაქმნის არქტიკას სრულიად განსხვავებულ გარემოდ - თეთრი ზაფხულის არქტიკიდან ლურჯ არქტიკამდე", - ამბობენ მეცნიერები.

მეცნიერთა თქმით, ელ-ნინიო ეკვატორულ წყნარ ოკეანეში ახლა სუსტდება, მაგრამ ოკეანეებზე ჰაერის ტემპერატურა მაინც უჩვეულოდ მაღალ დონეზე რჩება.