"დანის პირი აღმოჩენილია ქეთის თავში ანუ იმ სიმძლავრით დაარტყა, რომ დანის პირი გადატყდა... ცინდელიანი გოგოს დამამცირებელ მესიჯებს უგზავნიდა" - უმძიმესი დანაშაულის ახალი დეტალები

28 თებერვალს მომხდარმა მკვლელობამ მთელი ქვეყანა შეძრა. 22 წლის ქეთი ჯავახიშვილის დასახიჩრებული ცხედარი მის სახლთან ახლოს, ორმოში ხელოსნებმა იპოვეს, რის შემდეგაც მისი ამოცნობა მამამ შეძლო. როგორც საქმის პროკურორი ლევან ვეფხვაძე ამბობს, გოგონას 59 ჭრილობა ჰქონდა დანით მიყენებული, ძირითადად თავის და ზურგის არეში.

დანაშაულში ბრალდებული ოთარ ცინდელიანია დაკავებული, რომელსაც წინასწარი პატიმრობა უკვე შეეფარდა. ის მოკლული გოგონას ნათლიის შვილია.

რაც შეეხება მოტივს, გავრცელებული ინფორმაციით, დაკავებული, რომელიც ჯავახიშვილების ნათელ-მირონია, ახალგაზრდა ქალს აშანტაჟებდა და ფულს სძალავდა, მკვლელობის მომენტში კი ნარკოტიკული ზემოქმედების ქვეშ იმყოფებოდა.

ვეფხვაძემ "ტვ პირველს" უთხრა, რომ მსგავსი სასტიკი დანაშაული არ ახსოვს.

"ამგვარი სისასტიკით ჩადენილი მკვლელობა პრაქტიკაში არ მქონია. ამგვარი ჭრილობები, რომ არც ერთი ორგანო მთელი არ ჰქონდა, ჩემს პრაქტიკაში არ ყოფილა. ქეთის ჯავახიშვილის ცხედარზე 59 ჭრილობაა, სხეულის თითქმის ყველა ადგილას. დანის პირი არის აღმოჩენილი თავში, ანუ იმ სიმძლავრით დაარტყა თავის არეში, რომ დანის პირი გადატყდა. ზურგის არეში ათეულობით ჭრილობაა. ამ გადასახედიდან წაქცეულ მდგომარეობაში მყოფ ქეთევან ჯავახიშვილზე გააგრძელა ბრალდებულმა ჭრილობების მიყენება.

ბრალდებული ოთარ ცინდელიანი არ უარყოფს, რომ არის ნარკოტიკის მომხმარებელი. მან განმარტა, რომ შემთხვევის დღეს რამდენიმე ფსიქოტროპული საშუალება და ნარკოტიკული საშუალება ჰქონდა მიღებული. მოიხმარდა მათ შორის "ამფეტამინსაც". თუმცა სატელეფონო მიმოწერებში არც ნარკოტიკზე და არც ფულზე საუბარი არ არის. მათ შორის არის მიმოწერები, სადაც ჩანს, როგორ ეპყრობა ბრალდებული ჯავახიშვილს. რომ მის გარეშე არავის უნდა დაელაპარაკოს, არ უნდა გაადგილდეს და მსგავსი სტერეოტიპული მიდგომებით... არის დამამცირებელი ტექსტებიც" - ამბობს ლევან ვეფხვაძე.

ნახეთ ასევე:

• რა ნახეს გამომძიებლებმა ქეთი ჯავახიშვილის ტელეფონში - უმძიმესი დანაშაულის დეტალები სასამართლო პროცესიდან და გადაწყვეტილება აღკვეთზე: "ქეთის 59 ჭრილობა ჰქონდა"
• "ჩემი შვილი, ნარკოტიკების გამო, ფსიქიკურად ვერ იყო... აქ იყო, მაგრამ არ ვიყავი შინ მე უბედური და წამოსულა..." - რას ამბობს 22 წლის გოგოს მკვლელობაში ბრალდებულის მამა?
• "არავინ იცის, რა მოხდა და რატომ ჩაიდინა ოთომ ეს დანაშაული. ახლა მისი გამზრდელი ბებიის ცოდვით იწვის მთელი სვანეთი" - რას ჰყვებიან 22 წლის გოგონას მკვლელობაში ბრალდებულზე?